Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sababu ngone ne'ena naga 'o sakisii posironga manga gudai 'inasigilolitino 'inalega-lega, ge'enau so nou ngone pamada 'iodumu gee 'inasitu-tubuso, de 'o sowono gee naga koinamadawa. De nou ngone de nanga singina 'ikua-kuata pomariwo pomakarebese 'isoka gee 'inasitatapuokau.

² Ma 'orasi ngone pomariwo nanga ngo-ngakuoka, ngone salingou tatapu potaari 'o Yesusika, sababu 'unau wosibaoro nanga ngo-ngaku de wapaliara ma ngale wositotomo ka ma guruenosi sigado ma do-dogumu. 'O Yesus wotahani wosangisara. 'Una wosongene 'o salipoka ma kowokalesanguwa 'ato ge'ena 'o mahe. 'Una duga wongano-nganono dua ma du'uruoka de kawomore-morene. De ma 'orasi ne'ena 'una wopareta de ma Jo'oungu ma Dutu 'o ngii 'isure-sureka.

³ Bika niongano-nganono kokia 'o Yesus wotahani wakidaari 'o nyawa yosowo-sowono gee posironga yomalawanioka 'unaka! Sababu ge'ena 'uwa nia singina 'itingoono de 'i'ogu.

⁴ Sababu nimariwo nialawani 'o sowono, koma'iwasi sigado niosongene.

⁵ De 'uwa niamongoro ma Jo'oungu ma Dutu 'awi besesongo naneda, gee nikula nginika ma ngale ngini to 'una wi ngowa-ngowaka: "'Ai ngowaka, niaga-gao niosidi-diai ma Jou wi do-dotoko, de 'uwa nia singina 'itingoono nako winitawanono 'ikua-kuata.

⁶ Sababu ma Jou wakidotoko 'o nyawa gee wakidora-dora, de wakitawanono 'ikua-kuata 'o nyawa gee wosironga to 'una wi ngowa-ngowaka."

⁷ Ngini salingou niadawongo 'o do-dotoko 'ikua-kuata ma Jo'oungu ma Dutuno 'isoka 'o do-dotoko 'o dea wimoino. Sababu koi'iwa 'o ngowaka moi koma'iwa ma dea wadotoko koikuatuwa.

⁸ Nako ngini konitawanonuwa 'isoka to 'una 'awi ngowaka 'iregu-regu, ge'ena ma ngale ngini ko to 'unawa wi ngowa-ngowaka.

⁹ To ngone nanga dea 'o duniaka ne'ena 'inatawanonokau, de ngone pakihoromati 'ona. 'Ifoloiosi nanga Deaka gee daku 'o sorogaaka, ngone salingou 'ifoloiosi posingounu 'unaka la ngone po'ahu.

¹⁰ To ngone nanga balusu 'o duniaka, 'inadotoko ma 'orasi koikurutuwa, moteke 'okia naga gee 'ona yamaoku yaowa. Ma ma Jo'oungu ma Dutu wonadotoko ma ngale to ngone ma sirete nanga laha, la ngone 'idadi potebini pomasidogogere de de 'una.

¹¹ Ma goungu gee ma 'orasi ngone 'inadotoko, 'o do-dotoko 'ikua-kuata ge'ena kopoduakuwa, so duga ka nanga singina 'isusa. Ma ge'enaka de ngone gee 'inadoto-dotokokau, 'o do-dotoko ge'ena 'inasidadi ngone po'ahu moteke ma Jo'oungu ma Dutu wi mau, de ma duanguku pamao posanangi.

¹² Sababu ge'ena niakuatuku nia giama gee 'ila-lamahani de nia bu-buku 'iti-tirine ma ngale niomariwo 'ania ngo-ngakuoka ge'ena!

¹³ Kaitaurika niotagi 'o ngekomo 'iti-tiaika, la nia dou 'iliga-liga gee 'uwa 'isugara, ma 'ena 'idadi 'i'aiki.

¹⁴ Nimariwo nio'ahu nimarimoi de 'o nyawa 'iodumu. Nimariwo mita nio'ahu 'itebini de duga ka de ma Jou. Sababu komoiwa moi 'idadi wimake ma Jou nako manga 'ahu koitebinuwa.

¹⁵ Salingou nimasidiaino la nginioka naga ka moi ma 'uwa koyamakewa ma Jo'oungu ma Dutu 'awi co-catu. De 'uwa munuka naga yodadi matero ka 'o 'ubutu 'ipa-padosa naga nia sigoronaka so yakisisusa de yakisitorou 'o nyawa manga gudai de to 'ena ma padosa.

¹⁶ Nimasitiari la 'uwa sigado naga munuka yomakapake kaitimaronga, bolo koyosikiamoiwa 'o barangi 'itebi-tebini 'isoka gee 'o Esau wadi-diai. 'Una wawukunu 'awi hak ma ngale 'o ngowaka 'o riaka, ma sababu ka 'o 'inomo 'o sude moi.

¹⁷ Ngini nianako 'ato ge'ena 'ipasa de 'o Esau womau wamake 'o co-catu ge'ena ma deano, ma 'una kawiitomo. Sababu ngaro wosigari-gari wanonu ma ngekomo ma ngale wosidiai 'awi sala ge'ena, duga ma 'orasi ma ngale ge'ena, koi'iwau.

¹⁸ 'Esa moi riaka dodoto, ngini koniamakewa 'o kianikia 'isoka ma sira 'o Israeloka yoda-daari. 'Ona yodaarika 'o Sinai ma gigie gee kaidadi pa'ao. 'Ona yamake 'o 'uku 'ilala-lala, 'o darusu, 'o sakautu de 'o rato.

¹⁹ 'Ona yo'isene 'o torompet ma 'ilingi de 'o 'ilingi ma kiamati. 'O Israeloka yo'isenoka 'o 'ilingi ge'ena, de 'ona yoga'asoko yosigou-goungu la 'o 'ilingi ge'ena 'uwau 'ibicarali 'onaka.

²⁰ Sababu 'ona koyotahanuwa yo'isene 'o pareta gee 'o 'ilingi ge'ena 'isitotara. Sababu 'o 'ilingi ge'ena 'ingose, "'Iodumu gee yatigi-tigi 'o gigie ne'ena, 'o haewani bolo nago'ona bato, salingou yakiteto sigado yosongene."

²¹ 'Okia naga gee 'o Israeloka yamake-make ge'ena posironga de yodomodongoka sigado 'o Musa wongose, "Ngoi 'imodongo katoti-tirine!"

²² Ma ngini niongaku-ngaku gee niaikakau 'o Sion ma gigieka de ma Jo'oungu ma Dutu wowango-wango wi kotaka, ge'ena la 'o Yerusalem 'o sorogaaka gee ma mala'ekati 'icaanoka.

²³ Ngini niamotekokau 'o lo-lomu moi 'irame-rame, ge'ena la 'o nyawa yongaku-ngaku gee manga ronga-ronga 'ilefokou 'o sorogaaka manga lo-lomu. 'Ona ge'ena matero ka ma Jo'oungu ma Dutu wi ngowa-ngowaka 'o riakoka. Ngini nioboakau ma Jo'oungu ma Dutuka gee wahaki-hakimi 'o nyawa 'iodumu. De ngini naga de 'o nyawa ma owa gee yakisitotomokau.

²⁴ Ngini nioboakau 'o Yesusika gee ma ngekomo 'una so 'idadi 'o jaji ma sungi ge'ena. Ngini nioboa 'unaka ma ngekomo 'awi 'aunu 'ipoa de wosongene. 'Awi 'aunu 'ipoa de wosongene ge'ena ma ngale watuusu 'o sowono, ge'enau 'isitantuuokau 'okia sonaa 'ifoloi yaowa-owa so koimaterowa de gee to Habel wi 'aunu.

²⁵ Sababu ge'ena, niomasitiari la 'uwa nginioka naga wiitomo 'una gee wobi-bicara. 'O Israeloka gee ma 'orasi 'o Sinai ma gigieka de yooluku yosigisene ma Jo'oungu ma Dutu 'awi demo gee wositota-totara 'o duniaku, 'ona koidadiwa yomasiresene 'o hukumanioka. 'Ifoloiosi ngone gee po'ise-'isene 'una gee wobi-bicara daku 'o sorogaaku! Nako ngone pooluku posigisene, kokia ngone pomasimada gee podo-domodongo!

²⁶ Ma 'orasi ge'ena ma Jo'oungu ma Dutu 'awi 'ilingi 'o dunia yatiwiwiri. Ma ne'ena 'una wojaji wongose 'ato, "Ma moiosi ngoi 'asa tatiwiwiri duga ka 'o duniawa ma 'ena de 'o diwanga mita."

²⁷ 'O demo "ma moiosi" 'isidumutu 'ato 'o dunia 'iodumu gee 'isidadi-dadiku 'asa 'ikagiwi de yatingaka, la 'imadaku duga ka gee koidadiwa 'igiwi.

²⁸ Sababu ge'ena ngone salingou po'amalaha ma Jo'oungu ma Dutuka, sababu ngone padawongo 'unano 'o ngii moi gee ma pareta koidadiwa 'igiwi. Ngone salingou po'amalaha de powisuba ma Jo'oungu ma Dutuka, powihoromati de powidomodongo, moteke ma do-dagi gee 'una ma sirete wodua-duaka.

²⁹ Sababu to ngone nanga Jo'oungu ma Dutu matero ka 'o 'uku gee 'okia sonaa ya'uku-'uku.

Ibrani

Video Ibrani 12

Ikuti Kami:

KONTAK | PARTISIPASI | DONASI