Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali boros kojo tau to tempo owi etu to mawali matamanasa resi kita, apa yako sarita-sarita mangkonong katuwu nsira, see naka manasa resi kita bae kojo batuanginya pangaya resi i Pue Allah. Wali anu kita mangalulu pangaya nsira etu ri raya ngkatuwu ngkita. Apa kita raporapaka ewa tau to matilumba. Wali ewa naika ntau to damatilumba mamposaka yau samparia anu to mabeu, anu kita mamposaka yau samparia to mangantalas kita. Pasi ewa naika ntau to damatilumba mangawonsu ruyu pake to mampakayona pariponya, anu kita mamposaka yau dosa to manta’amaka kita. Pasi ewa naika ntau to matilumba maripo mangalulu jaya to rapakatantuka yami, anu kita mampakabae sabaranta mangalulu jaya to napakatantuka i mPue Allah kita.
2 Pasi anu kita mangalo’aka yau resi i Yesu apa Ia semo mata njaya to nalulu ngkita pasi Ia semo to mampasilonga pangayanta. Ia mate rapaku ri kaju pasape, pasi kapate to etu napobuuka ntau to tempo etu kapate to masipato kojo rapokea. Pei nempo ewa wetu, taa mawei resi i Yesu, Ia ojo mangainsoka apa Ia mampobuuka kandende ndaya to Ia damangarata karoonya Ia mangika palaong to etu. Wali si’i-si’i Ia matunda ri awe nggadera i mPue Allah ri sambali tondo ngkana.
3 Wali pobuuka i Yesu. Ia mangainsoka tempo mangarata kasesa etu yako resi tau madosa to mangewa Ia. Pobuuka Ia see komi taa damawali manganga pasi mayu’u raya ngkomi ane mangarata kasusa.
4 Apa komi raporapaka ewa mangamusu dosa, pei ri rayanya komi mangewa dosa etu komi tawa mangarata kasesa ewa kasesa to narata i Yesu, ewa Ia rapopate yau. Wali insoka ane komi mangarata kasesa.
5 Pasi wimba komi bara roo mangkalingan yau gombo i mPue Allah to Ia manganto’o damampakaroso raya ngkomi? Ia magombo resi komi ewa nika mpa’a mampogomboka ananya, Ia manganto’o, “AnangKu, padongeka kojo tempo komi napotunde i mPue. Pasi ne’e mayu’u raya ngkomi tempo Ia manganseko komi.
6 Apa i Pue mampotundeka tau to Ia mamporayang. Pasi Ia mangantidas samparia tau to Ia mampoanika manganto’o, ‘Tau si’i anangKu.’” Etu semo gombo i mPue Allah.
7 Wali insoka tempo mangarata kasusa pasi pobuuka kasusa etu ewa patunde to yako resi i Pue Allah. Apa ane komi mangarata kasusa, batuanginya i Pue Allah mampotundeka komi ewa to masipato naika mpa’a resi ananya. Apa tare ana to taa napotunde mpa’anya.
8 Wali i Pue Allah mampotunde samparia anaNya. Wali ane komi taa napotunde i mPue Allah, batuanginya kamonsonya komi si’a anaNya. Batuanginya komi sewaju ewa ana bule.
9 Pei si’a ojo etu, apa rapanya pa’a ngkoro ngkita, sira mampotunde kita pasi kita manga’angga sira. Wali ane kita mampolaika pa’a ngkoronta etu, masipato kojo kita buya wo’u rayanta mampolaika Pa’a ntoniinta see kita datuwu.
10 Apa pa’a ngkoronta, sira mampotunde kita bara ojo sawei nto’u kasaenya. Pasi tempo sira mampotunde kita etu, sira mangika ewa wimba naepe nsira matao raika. Pei ane i Pue Allah, tempo Ia mampotunde kita Ia mangika ewa wimba bae batuanginya resi kita see kita damawali mapasing seja ewa Ia.
11 Wali ri rayanya kita rapotunde, matempo-tempo kita ratidas. Pasi tempo kita ratidas etu kita taa ndende rayanta, kita mawo rayanta. Pei yako patunde etu, roo see kita mangika lengko to singkonong pei i Pue Allah pasi kanjo’u-njo’u tiduga-dugang kalindo ndayanta.
12 Wali see naka pakaroso pale ngkomi to mayu’u pasi wakotu ngkomi to rongko.
13 Pasi pakalempe jaya to nululu ngkomi see tau to sampungku to mangalulu komi taa datikaledo, pei witinya sampungku etu matao muni.
14 Wali ri raya ngkatuwu ngkomi, pakadota tuwu masingkatao resi samparia tau, pasi pakadota mangika lengko to masipato naika ntau to i Pue Allah Puenya. Apa tau to taa mangika palaong to etu, tau etu taa damangansani ewa wimba kamonsonya i Pue.
15 Pakatao see tare pasi samba’a komi to mangandolika tangonya yako kanoto i mPue Allah. Pasi ne’e mangabiaka tau mangarotai komi. Apa tau to ewa wetu raporapaka ewa kale to tuwu mawali pinumuya to mapa’i. Apa yako tau samba’a etu, taa masae boros tau rapakasusa panewa damangika dosa.
16 Wali pakatao seja see tare komi to masala bara magoyal. Pasi pakatao seja see tare lengko ngkomi to ewa lengko i Esau. I Esau etu ia bo’onya manga’angga i Pue Allah. Pasi panta to ia masipato danawaika mpa’anya apa saba ia semo ana to tu’anginya, panta to etu ia mampobalu yau resi tua’inya mangoli sampinggaja pangkoni.
17 Wali komi nunsani sarita etu. I Esau re’e mampobalu yau panta to masipato ia damangantima, pei roo see ia tiroo rani damangantima yako resi pa’anya, pei pa’anya tamo mangawaika ia. Nempo tumangi ia mamporapi panta etu, tamo re’e jaya to mangawali pampobuuka mpa’anya. Wali ne’e ewa i Esau to mampobuuka panta yako resi pa’anya taa bae batuanginya.
18 Wali kita to tempo si’i taa sewaju pei to Israel to tempo owi. Apa tempo etu ane sira rani mampotango i Pue Allah, sira mampotango anu to maya rakita pasi raepe, etu semo tongku Sinai. Wali anu to nakita nsira nja’u ria mampakameka kojo sira apa sira mangkita apu to mawea kojo ndate ria, pasi sira mangkita wuri, limu mupu pasi lambuwu.
19 Sira mangandonge loo ntarompet pasi loo to mampogomboka sira. Wali tempo sira mangandonge loo to magombo etu, sira mamporapika kojo see tamo re’e loo etu mangampogomboka sira.
20 Naka pei sira mamporapika ewa wetu apa sira meka kojo raya nsira mangandonge porenta to nato’o nu loo etu, to’onya, “Sakowa binatang ane mampotaka tongku si’i, taa maya taa rapopate ratasoka watu bara rapana yau.”
21 Wali anu to nakita nto Israel pasi anu to nadonge nsira etu mampakameka kojo sira. See naka i Musa manganto’o, “Aku meka kojo rayangku pasi rongko.”
22 Wali ewa wetu tempo to Israel mampotango tongku Sinai tempo owi. Pei si’a ewa wetu resi kita to tempo si’i. Kita taa mampotango tongku to ewa wetu. Ane ri pangkita i mPue Allah kita roomo mampotango anu to rato’oka tongku Sion, kota to nakaroo i Allah to tuwu, etu semo Yerusalem to ndate saruga. Pasi kita roomo simparata pei pomakau i mPue Allah to taa nakoto ntau mangabilang kaborosinya. Pomakau etu siromu ri kandende ndayanya.
23 Pasi kita roomo masua seja resi samparia tau to mangaya. Kita samparia rato’oka ana i mPue Allah to tu’anginya, pasi sanga ngkita ratulis ndate saruga. Wali kita roomo mangampago i Pue Allah, to pobotus ntau samparia. Pasi kita roomo simparata pei tonii ntau to lengko nsira singkonong pei i Pue Allah pasi to roomo mawali masilonga.
24 Wali kita roomo seja simparata pei i Yesu, to mamponsaruka kita pasi to mampasilonga parajanji to bou. Pasi kita roomo mampotango raa to rapedasaka ndate saruga, raa etu mampakanasa mangkonong ewa wimba kita ralapa yako ri dosa. Wali kareba etu to tao-tao pei anu to napakanasa nu raa i Habel tempo owi, apa to etu mampakanasa tau rahuku.
25 Wali pakatao kojo naka ne’e kita mampobo’o mangandonge Ia to mampogomboka kita si’i-si’i. Apa ewa wetu naika nto Israel tempo owi. Sira bo’onya mampodongeka Ia to mampogomboka sira ri lino si’i, wali sira tare jaya miyai tempo Ia mangahuku sira. Wali taa manto’o kita. Kareba to Ia manganto’oka kita semo to bae-bae batuanginya, apa tempo si’i Ia mampogomboka kita yako ndate saruga semo. Wali ane kita mampobo’o Ia, kita taa kojo re’e jaya mampiyaika huku.
26 Tempo i Pue Allah mampogomboka to Israel tempo owi etu, tempo etu looNya mangalengko lino si’i. Pei si’i-si’i Ia re’e mangika parajanji, to’oNya, “Ane sangkani wo’u, si’a ojo lino to Aku damangalengko. Pasi yangi seja.”
27 Wali gombo to manganto’o “sangkani wo’u” etu mampakanasa i Pue Allah damangalengko pasi mangabolos yau anu to napapowali, Ia damangika ewa wetu see yako etu anu to taa kalengko jamo to etu toronya.
28 Wali kita rawaika mawali tau to i Pue Allah Makolenya, pasi paporenta i mPue Allah etu taa kalengko. See naka anu kita manganto’oka Ia tarima matao. Apa ewa wetu to masipato naika ngkita mampue mampakabae i Pue Allah. Pasi anu kita mampakabae pasi mampalaika Ia saba manga’angga Ia.
29 Apa Allah ngkita ewa apu to mangkoni yau samparia.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA