Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Tau pangeh linibut lun nekali' luk mula' ineh. Ngaceku ineh do' tau nala' anid-anid babeh luk meberat, idi sala' luk malé ngabet netau, idi do' tau upun dengan mulai niat bang peribatun luk tinina' kuan tau.
2 Do' tau nier Yésus, luk nenganau' idi luk neriput anu tau. Ieh pana' ngaceku awang luk litep kuanNeh pangeh netuman ratnan dereh salib, dengan na ngerawé igu'Neh, idi Ieh tudo pa tinueh kerusi Allah.
3 Do' muyuh ngerawé Neneh luk pangeh nedereh ku gateh niat lemulun luk mesala', pad muyuh na musam idi metalang niat.
4 Muyuh nateh nepebunu' dengan sala' pad macing muyuh maté.
5 Pangehké muyuh nekelupan bala Allah luk ngubuk nemuyuh mepad kudeng anak-anak kebalaNeh, 'O anakKu, aleg iko necan bada' Tuhanmu, idi aleg metalang niat kareb ukumNeh macing namu.
6 Ngaceku Tuhan mada' anid-anid lemulun luk inanNeh mawa, idi mebal lemulun luk mangun ku anakNeh."
7 Mabeh dereh muyuh mepad kudeng bada' ratnan aceh taman, ngaceku dereh muyuh ngegala' ratnan Allah ngerawé nemuyuh mepad kudeng anak-anakNeh. Anak idéké luk na bida' tamanneh?
8 Kudeng muyuh na badén, mepad kudeng anakNeh, ilungneh muyuh baken anak-anak luk matu, iamo' muyuh ineh anak-anak batek.
9 Taman tau bang tana' ini nemada' netau, idi tau nengedita' nedeh. Meluun teh petulu tau ngebeneh burur tau pa kiung Taman roh ineh, pad tau ngalap ulun!
10 Ideh nengukum netau segageh mo', maya' luk petulu sirendeh. Iamo' Allah ngukum netau pad ngacing peruan kuan tau, pad tau ngalap babpat bang liganNeh.
11 Kareb tau badén, bada' ineh na ngacing awang niat iamo' susa' niat. Iamo' muci lemulun luk bida' ineh ngalap bua'-bua'neh luk matu luk ngacing awang kuan lemulun luk bida' ineh.
12 Ngaceku ineh ngiding amung-amung ticu' luk melaya' idi aleb luk meliai!
13 Do' maya' dalan luk mesiri, pad liai ineh na mepekisu'; iamo' pad ieh uen ngedo'.
14 Do' muyuh nakap pedo' dengan amung-amung lemulun idi nutun maya' ulun luk mleigan, ngaceku dengan na ligan ineh seburur pana' na miak nier Tuhan.
15 Matar do'-do' pad seburur pana' na teketed ratnan katu Allah. Matar do'-do', pad aceh "uat luk mepét" na mulun idi nganau' susa' kuan muyuh pad amung-amung lemulun uenneh ngelutak.
16 Idi aleg seburur pana' mesawa', idi mangun ku lemulun luk na sembayang, mepad kudeng Esau, luk nemasui babpat anak luk atun ngaceku ratnan sesuut luk kenen.
17 Ngaceku muyuh pangeh kali' idi muci ratnan ineh, kareb ieh sikal ngalap babpat peruan ineh, idi ieh tila', ngaceku na inan kareb ieh miak uren, sagan pana' peruan ineh tikapneh dengan tangi'.
18 Ngaceku muyuh na macing nan aceh pegkung luk miak kamen mepad kudeng Pegkung Sinai, luk mebudung ku apui, luk melungung, medacem, idi mebui,
19 dengan uni serupit, idi uni tang, pad lemulun luk neninger ineh nemutuh Neneh na maré bala peh.
20 Ngaceku ideh na miak tuman ku uni tang ineh luk nepebala, "Idi kudeng sebuleng pung pana' ngakem pegkung ineh kali' rungen ieh uen mitung ku batu."
21 Ideh pelaba gagap ku luk sinierdeh ineh, pad Musa nepebala, "Ui pelaba tot idi megegker."
22 Iamo' muyuh pangeh nacing déi' Pegkung Sion, idi bawang Allah luk mulun, ieh ineh Yerusalim luk déi' surga, dengan tuda'-tuda' ngeribu melaikat pana'.
23 Muyuh pangeh nacing kuan tebubpun amung-amung anak Allah luk atun, luk pangeh inayud ngadandeh déi' surga, idi kuan Allah, Lun luk Mutut Besara' kuan amung-amung lemulun, idi kuan amung-amung roh lemulun luk matu luk pangeh linigan.
24 Muyuh pangeh nacing inan Yésus, Gatum Pejani' luk Mebaruh ineh, idi kuan dara' luk inisak, luk pebala-pebala luk meluun do' ratnan dara' Abil.
25 Matar do'-do', aleg muyuh ngarung Neneh luk pebala ineh. Lemulun luk nengarung Neneh luk nepebala bang tana' ini, na nepuit. Meluun teh tau ini na mepuit kudeng tau lumi rat Neneh luk pebala rat surga.
26 Kareb ineh tangNeh nengegio tana' ini, iamo' nekini Ieh pangeh pejani' idi pebala, "Idi sekua' teh Ui miak ngeruyuh baken tana' ini mo' iamo' langit pana'."
27 Idi bala ineh, "Sekua' teh," ilungneh, idi amung-amung luk tigio ineh miak buro, ieh ineh amung-amung luk pangeh pinudut, pad luk na sigio ineh miak ketecan.
28 Ngaceku ineh tau ini luk ngalap Imet luk na miak sigio ineh, do' tau maré ubur, idi dengan dalan ineh miak tau sembayang maya' kudeng luk petulu pa kiung Allah dengan ngedita' Neneh idi matot;
29 ngaceku Allah tau, Ieh ineh mepad kudeng apui luk ngeseb.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA