Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Nah, tentang ram tenggalan, sekeliling ram wat lamon nihan saksi! Ulihni seno, ijado ram ngetokko sunyin sai ngebiakko ram rik dusa sai terus ngelekok jama ram. Rik ijado ram tekun menempuh perlumbaan sai wat di hadap ram.

² Hagani pandangan ram tertuju jama Isa, mani Iado sai ngebangkitko iman ram rik melihara jak permulaan sampai akher. Isa tahan menderita di kayu salib! Ia mak peduli bahwa mati di kayu salib udi iado suatu hal sai ngeliamko. Ia angkah ingok jama keriangan sai haga dirasako-Ni kak raduni. Tano Ia mejong di kebelah kanan takhta-Ni Allah rik memerintah jejama jama Ia.

³ Cuba pikerko injuk repa sengsara-Ni Isa ngehadapi jelma-jelma bedusa sai gigih nihan ngelawan Ia! Ulihni seno dangdo lunik hati rik putus asa.

⁴ Mani delom perjuanganmu ngelawan dusa, keti makkung pernah bejuang sampai harus ngeluahko rah.

⁵ Rik dangdo ngelupako petuah-Ni Allah inji, sai dikeniko jama niku sebagai anak-anak-Ni: "Anak-Ku, perhatikodo betik-betik ajaran-Ni Tuhan, rik dangdo lunik hati kik Ia butong jama niku.

⁶ Mani Tuhan ngehajar unggal jelma sai dikasihi-Ni, rik Ia ngelecut unggal jelma sai diakui-Ni sebagai anak-Ni."

⁷ Hagani keti nerima lecutan jak Allah sebagai suatu hajaran jak bak. Mani api pernah sai anak mak dihukum ulih bakni?

⁸ Kik keti mak nutuk dihukum injuk sunyin anakni sai lain inji retini keti lain anak sah, melainko anak sai mak sah.

⁹ Ram ngedok bak di dunia. Ia ngajar ram, rik ram ngehormati ia. Nah, apilagi tehadap Bapa rohani ram sai di surga, tantu ram harus lebih lagi patuh jama Ia in ram hurik.

¹⁰ Ulun tuha ram sai di dunia ngajar ram angkah delom waktu sai terbatas, nutuk api sai tian rasa betik. Kidang Allah ngajar ram untuk kebetikan ram tenggalan, in ram dapok jadi suci jejama jama Ia.

¹¹ Sangun waktu ram diajar, hukuman udi mak nyenangko hati ram, melainko angkah nyedihko gaoh. Kidang kak raduni jak seno, bagi ram sai radu diajar, hukuman udi nyebabko ram hurik nutuk kehaga-Ni Allah, rik ngehasilko rasa sejahtera jama ram.

¹² Ulihni seno, kuatkodo culukmu sai lemoh rik tuotmu sai gegoran ano!

¹³ Lapahdo selalu di renglaya sai rata, in cukutmu sai timpang udi mak silat, kidang malah munyai.

¹⁴ Berusahado untuk hurik rukun jama sunyin jelma. Berusahado juga untuk hurik suci, khusus untuk Tuhan. Mani mak sai jelma pun dapok ngeliak Tuhan kik ia mak hurik injuk reno.

¹⁵ Jagado dang sampai wat sai jelma pun sai luah jak lingkungan kebetikan hati-Ni Allah, in dang wat sai jadi injuk tanoman beracun di tengah-tengah keti sehingga nimbulko kepayahan rik nyadangko lamon jelma jama racuni.

¹⁶ Jagado in dang wat sai hurik hajor atau mak ngehargai hal-hal rohani, injuk sai dilakuko ulih Esau. Ia ngejual hakni sebagai anak tuha, angkah untuk sepiring kanikan.

¹⁷ Keti pandai bahwa kak raduni Esau mirak mansa berkat udi jak bakni, kidang ia ditulak. Mani sekalipun ia miwang nyepok jalan untuk nguyunko kesalahanni, kesempatan untuk seno mak ngedok lagi.

¹⁸ Puari-puari mak ratong ngehadapi sai hal injuk sai dihadapi ulih bangsa Israel tumbai. Tian ngehadapi sai hal sai dapok diraba, yakdo Gunung Sinai jama apuini sai menyala-nyala; tian ngehadapi kekelaman, rik angin ribut;

¹⁹ tian ngehadapi bunyi trumpet, rik bunyi suara sai hibat. Waktu jelma-jelma Israel ngedengi suara udi, tian ngilu nihan in suara udi mak cawa lagi jama tian.

²⁰ Mani tian mak tahan ngedengi perintah sai disampaiko ulih suara udi. Mani suara udi cawa, "Sunyin sai nilut gunung inji, mak peduli api ano binatang atau sapa pun juga, harus ditayar jama batu sampai mati."

²¹ Api sai diliak ulihni jelma-jelma Israel udi reno hibat sampai Musa cawa, "Nyak merabai rik gegoran!"

²² Sebalikni, keti radu ratong mik Bukit Sion rik kota-Ni Allah sai hurik, yakdo Yerusalem sai di surga jama beribu-ribu malaikatni.

²³ Keti nutuk suatu pertemuan sai meriah -- pertemuan anak-anak tuha-Ni Allah, sai gelar-gelarni terdaptar di delom surga. Keti ratong ngehadap Allah, Hakim sunyin manusia. Keti ngehadapi ruh-ruh jelma-jelma betik, sai radu dijadiko sempurna.

²⁴ Keti ratong ngehadap Isa, Sai Ngantak perjanjian sai ampai udi; keti ngehadapi rah recakan sai ngejamin hal-hal sai jaoh lebih betik jak sai dijamin ulih rahni Habel.

²⁵ Ulihni seno, hati-hatido dang sampai keti mak haga ngedengiko Ia sai cawa udi. Tian sai mak haga ngedengiko Ia sai ratong mik bumi rik nyampaiko kabar jak Allah, mak dapok lijung. Apilagi ram inji sai ngedengiko Ia sai cawa jak surga! Kik ram mak haga ngedengiko Ia, dipa mungkin ram dapok luput!

²⁶ Waktu seno suara-Ni ngegemparko bumi. Kidang tano Ia bejanji, "Sekali lagi, Nyak haga ngegemparko lain bumi gaoh kidang langit juga."

²⁷ Cawa "sekali lagi" nunjukko bahwa seluruh dunia sai radu diciptako haga diguncangko rik disingkerko, in sai tetinggal angkah sai mak dapok beguncang.

²⁸ Ulihni seno, hagani ram ngucapko terima kasih jama Allah, mani ram nerima jak Ia suatu kerajaan sai mak dapok beguncang. Hagani ram beterima kasih rik hormat beibadah jama Allah rik rabai, nutuk cara sai dimirakko ulih-Ni tenggalan.

²⁹ Mani Allah ram injuk apui sai ngemutungko.

Ibrani

Video Ibrani 12

Ikuti Kami:

KONTAK | PARTISIPASI | DONASI