Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Jadi namala raulita, pura-pura ira pangane nombatiku kita bo nompakaroso rarata ante posabira. Sabana haitu, kita muni kana mombatedaka pura-pura anu nompopekai rarata bo dosa anu nekantaka nte kita. Kita kana maroo rarata mangoseaka dala nipakatantu nu Alatala ka kita, nasimbayu mpo topangova ri posilumba.

² Kita kana mangova mompetoto i Yesus, sabana Iamo nanggeni kita nomparasaya bo Iamo nompopompakule kita bate-batena momparasaya sampe ri kaupuna. I Yesus nombatidamaka kasusa bo kapari tempo nipaku ri *kayu salib. Ri mata ntodea, namate ri kayu salib nepakaeya. Tapi ledo nipekirikaNa eyaNa, sabana nitoraNa kadamba nipakasadia ka Ia. Bo sii-sii Ia nonturo ri gadera magau ri panggana nu Alatala.

³ Pekirikamo kasusa nirasai i Yesus. Ia nieva ntona nadosa anu mpuu-mpuu navuu matara nte Ia. Pekirikamo Ia ala ledo masau raramiu bo ledo maupu raramiu momparasaya.

⁴ Sampesuvu-sampesuvu, dopa ria komiu nipatesi riara pompasimbukumiu nangeva dosa.

⁵ Nee rakalingasimiu tesa lako ri Buku Gasa anu nompangajari kita, nasimbayu mpo totua nompangajari ngana-ngana, ivei: "Anaku, nee rasapuaka pepatuduki nTupu. Nee maupu raramu ane raonteakaNa iko.

⁶ Sabana Tupu nompatuduki bo nombahuku pura-pura tona nipotoveNa. Ia noparajea pura-pura tona nipangakuNa ana-anaNa."

⁷ Jadi sampesuvu-sampesuvu, komiu kana mombatidamaka riara kasusa bo kapari nirasaimiu. Tarimamo haitu mpo pepatuduki lako nte Tuamamiu Alatala, sabana komiu nirekeNa ana-anaNa mboto. Berimba? Naria ngana ledo niboba bo nipatuduki ntuamana? Natantumo ledo ria!

⁸ Alatala nompatuduki bo nomparajea pura-pura tona nirekeNa ana-anaNa. Jadi ane komiu ledo nipatudukiNa, batuana komiu ledo ana-anaNa mpuu, komiu aga ana-ana vone.

⁹ Kapolana, tuamata ri dunia nombaboba bo nompatuduki kita bo kita nombabila ira bo nekou nte ira. Ane ivesia, natantumo kana meliupa pekouta nte Alatala, Tuamata ri suruga ala kita matuvu mabelo.

¹⁰ Tuamata ri dunia hitu nombaboba bo nompatuduki kita sampalai, nangoseaka anu nirekera nabelo. Tapi Alatala nompatuduki kita ala manggeni belo ka kita. PatujuNa ala kita majadi magasa nasimbayu mpo Ia.

¹¹ Tantu tempo kita niboba bo nipatuduki, kita ledo nadamba tapi aga nasusa. Tapi ane rapariarata pepatuduki haitu, kaupuna kana maria aselena riara nggatuvuta, haitumo kita matuvu mangoseaka dota nu Alatala bo matinonto rarata.

¹² Sabana haitu, sampesuvu-sampesuvu, pakaroso palemiu namaga bo pakaroso taputumiu noridi.

¹³ Osemo dala nalumbu ala kadamiu nakejo ledo matepakodu, tapi maroso mpanjili.

¹⁴ Komiu kana mompasimbuku matuvu mosinggabelo ante pura-pura tona. Bo pasimbuku muni matuvu magasa, sabana tona ledo nagasa katuvuna ledo ntoto mamala manggita i Pue.

¹⁵ Jagaimo! Nee sampe maria komiu moura momparasaya bo mompoara kabelo rara nu Alatala. Nee sampe maria tona majadi mpo tuda-tuda nelangu ri tatangamiu, anu nompakasusa todea ante racuna, sampe nadea tona nikeni riara dosa.

¹⁶ Nee sampe maria tona mosipogau nte tona ledo bereina mboto. Bo nee sampe maria tona moinggu mpo i Esau, apa ia aga nompekirika kasana karona ri dunia hitu bo ledo nipekirikana dota nu Alatala. Kalumbuana nisulakana sanjuraya kandea.

¹⁷ Nisanimiu mbotomo, naupu sia, tempo ia nerapi belo haitu lako nte tuamana, ia nipoara ntuamana naupa niperapina nte tangi. Domo nikavana dala mombabaliki sala nipoviana.

¹⁸ Sampesuvu-sampesuvu, komiu ledo nirasaita anu nirasai *ntoIsrael nggaulu tempo nitarimara Pojanji nu Alatala nokolu. Ira nakava nantingayo bulu anu namala ratui, haitumo Bulu Sinai nikavaya nu apu. Nikitara landa mpirika bo kulimu, bo nirasaira poiri narimboso.

¹⁹ Niepera moni *tabue namangga mpuu bo niepera suara notesa. Nangepe suara haitu, naeka mpuumo ira sampe niperapira ante mpuu-mpuu ala suara haitu domo motesa ka ira.

²⁰ Apa ledo nipakulera nangepe parenta nitesa nu suara haitu, ivei: "Ane maria komiu atau binatamiu makava mombatui bulu hitu, ia kana rarempe ante vatu sampe mamate."

²¹ Anu nikitara hamai mpuu-mpuu nompakaviora rarara sampe i Musa nanguli, "Yaku mpuu-mpuu naeka bo nolete."

²² Tapi ledo ivesia komiu. Komiu nantarima pojanji nu Alatala nabaru, komiu nantingayo Bulu Sion, ngata nu Alatala anu matuvu sampe ri kasae-saena, haitumo ngata Yerusalem ri suruga. Komiu nantingayo nenjobu-njobu *malaeka anu nasiromu madamba-damba.

²³ Bo komiu nantingayo todea topomparasaya Alatala. Ira nireke ana-ana lumbua nu Alatala bo sanga-sangara nitulisi riara buku nu Alatala ri suruga. Komiu nantingayo Alatala, Topotangara pura-pura manusia. Bo komiu nantingayo nyawa-nyawa ntona nanoa anu namatemo, anu najadi nagasa.

²⁴ Bo komiu muni nantingayo i Yesus, Topetariolo anu nompasiayu pojanji nabaru haitu. Bo komiu nantingayo raa nipatiti i Yesus anu nabelopa pade raa i Habel.

²⁵ Jadi sampesuvu-sampesuvu, pakabelo-belo, nee sampe komiu ledo madota mangepe tesa niuli nu Alatala ka komiu. Apa isema-sema ledo nadota mangepe pepatora nu Alatala anu nipapola Nabi Musa ri dunia bara ipia, ira ledo rakabasaka lako ri pehuku nu Alatala. Nemopa kita anu nangepe Ia notesa lako ri suruga! Ane kita ledo madota mangepe Ia, natantumo kita muni ledo rakabasaka lako ri pehukuNa.

²⁶ Tempo nggaulu ri Bulu Sinai suara nu Alatala namangga sampe nombagoya tana. Tapi sii-sii Ia nojanji ivei: "Sangganipa bara maipia kana Kugoya tana, bo ledo aga tana tapi langi muni."

²⁷ TesaNa "sangganipa" haitu, batuana, pura-pura anu nipajadiNa kana ragoyaNa bo rapakalipoNa ala aga anu ledo nogoya maboli.

²⁸ Jadi haitu sampe kita masipato manguli tarima kasi nte Alatala, sabana Ia nombadekei loga ka kita majadi todea riara PoparentaNa bo PoparentaNa haitu ledo ntoto mogoya. Bo kita kana metupu nte Alatala ante cara nipodambaNa. Kita kana mekou nte Ia bo maeka movia anu ledo nipokonoNa.

²⁹ Apa Alatala anu nisombata, mombahuku tona nompoara kabeloNa, nasimbayu mpo apu mepalabu.

Ibrani

Video Ibrani 12

Ikuti Kami:

KONTAK | PARTISIPASI | DONASI