Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ee, tomala'bihku'! Wa'ding dikua kumua, sininna joo tomatappa' tonna anu' susi saleu' mbombonniki'. Na ia joo kasa'bianna mpamawatang penawanta'. Iamo joo melo ke tapatorro ngasanni to apa mabanda', la'bi-la'bi dosa to tuli ssedeki'. Ia ke tapatorro ngasanmi, wa'dingmiki' mpugaukki to pakkaeloran-Na Puang Allataala ratu lako cappa'na.

² La tapugaukmi tapatuju lakoi Puang Isa to penawanta', to mpadenni to kamatapparanta', napupenjajiki' masaranian. Gaja mesirisan joo kamatean jao kaju sitamben. Apa moi nasusi joo te'da nasipattekanni, sanga ia manda naingaran to kamasannangan la naperasai undinna. Na ia tee too cumadokkomi jio kananna cadokkoan mala'bih-Na Puang Allataala namangparenta sola.

³ Pikkiri'i maka matumba pa'dikki-Na Puang Isa nnoloi tomadosa to gaja parrang nnewai anna danggi' mika'tu rannu ba'tu cia'mo matappa'.

⁴ Te'dapa kamu' mate nnewa dosa.

⁵ Na danggi' mitangnningaranni to kadan-Na Puang Allataala to mpangkadai kamu' susi ambe' lako anakkana, "Ee, anak-Ku'! Tarima meloi ke napabalahhiko Puang situru' dosamu, na danggi' muka'tu rannu ke napangngingaranko.

⁶ Sanga napabalahhi Puang to tonapakamoja', napekajui to tonareken anakka-Na."

⁷ Sabbara' kamu' ke napabalahhi kamu' Puang Allataala, sanga napasusi kamu' anakka-Na. Na te'da naden anak tangnapabalahhi ambe'na.

⁸ Ianna te'da midipabalahhi susi to anak laen-Na, battuananna tangngia kamu' anak tongan, apa anak dialara.

⁹ Takasiri' to ambe'ta' lan lino to mpabalahhiki'. Ia pole' oraka ke Ambe'ta' jao suruga antatanglanturu'i, tawa'ding ntarima katuoan melo te'da cappa'na.

¹⁰ Ia to ambe'ta' lan lino cingga'tu'ra nanii mpabalahhiki', situru' to apa nasanga melo. Apa la tapumelona kita' to pangpabalah-Na Puang Allataala, dikua antawa'ding messipa' melo takaba'ci too kagajatan susi to nakaba'ci Puang Allataala.

¹¹ Ia ke dipabalahhiki', te'da tapumasannangngi joo pangcalla na mepa'dikan penawa. Apa undinna joo, ia to kita' mangkamo dipabalahhi, nturu'miki' pakkaeloran-Na Puang Allataala, na mperasaimiki' kamasannangan.

¹² Iamo joo danggi' mimakuttu. Pemawatangngii to kamatapparanmi.

¹³ Maruruh kamu' nturu' Puang, anna te'da naden tau cia'mo matappa', apa mawatangngi matappa'.

¹⁴ Mipengkulle-kullei sikalino ngasan tau. Mipengkulle-kullei tooi mpupengkaunan kalemi lako Puang Allataala, sanga ia ke te'da nasusi joo to sipa'mi, te'da mikullei ngkita Puang.

¹⁵ Ingaranni danggi' naden moi mesa' tau cia'mo ntarimai to barakka'-Na Puang Allataala. Ingaranni danggi' naden tau susi to waka' mapai' mpaden kamaba'cian lako padanna rupa tau anna situmang-tumang.

¹⁶ Ingaranni danggi' naden tau manggauk sala ba'tu te'da naangga'i to barakka'-Na Puang Allataala susi to napugauk Esau. Ia joo barakka' lako mesa' anak pamungah nabaluk lako adinna sangpiring nande.

¹⁷ Miissen kumua, undinna tonna madoangmo Esau ntarimai joo barakka' jio mai ambe'na, te'da nadiben. Moi na gaja ssassanni joo panggaukanna, apa te'damo lalan dinii benni joo barakka', moi namangwai mata mpeta'dai.

¹⁸ Te'da miratu lako garonto' buntu to mikulle ngkaka'i susi bangsa Israel tonna anu'. Ia joo to-Israel ratu lako garonto' Buntu Sinai to nanii api dukku manglaka-laka. Jio tooi to kamalillinan, kamalotonganna langi' na angin bara'.

¹⁹ Nasa'ding to oni tarompe', na oni gamara lumbun. Ia tonna sa'dingngi to-Israel joo gamara, napeta'da lalo danggi'mo nadipasa'dingngi pole' o.

²⁰ Sanga te'da naattai ssa'dingngi to parenta napau joo gamara kumua, "Sininna to apa ngkaka'i tee buntu, la olok-olok ba'tu apa bangmo, la dirura batu samatena."

²¹ Liwa' meka'baran bulu joo apa nakita to-Israel, iamo joo nakua Nabi Musa, "Malaja'na' na kumbe'beh!"

²² Ee, tomala'bihku', te'da miratu lako buntu susi joo. Sibalikanna ratumo kamu' lako Buntu Sion na kota-Na Puang Allataala to tuo, iamo to kota Yerusalem jao suruga to nanii massa'bu-sa'bu malaeka'-Na.

²³ Nturu'mo kamu' mesa' pangrempunan maroah, pangrempunanna sininna anak pamungah-Na Puang Allataala, to diuki'mo sanganna lan suruga. Ratumo kamu' mangngolo lako Puang Allataala, Tomangra'tahna sininna tolino. Nnoloimo kamu' tomatappa' to matemo, to mangkamo dipupenjaji tomelo.

²⁴ Ratumo kamu' mangngolo lako Puang Isa, tompasijajianni joo basse baru. Nnoloimo kamu' rara-Na Puang Isa to mangka dipi'pikan kamu' ammididampangan. La'bi melo ia joo rara na ia to rarana Habel to mpeta'dai anna dipabalahhi to kakanna.

²⁵ Danggi' mitangmpesa'dingngii joo tomangkada jao mai suruga, sanga ia to to-Israel tonna anu' to cia' mpesa'dingngii to kada pole jao mai Buntu Sinai, te'da nakullei la'pah jio mai pangsessa-Na Puang Allataala. Apa pole'raka tee kita' to ssa'dingngi joo tomangkada jao mai suruga ke cia'ki' mpesa'dingngii.

²⁶ Ia joo wattu mangpaninoi to gamaran-Na. Apa ia tee too napau kumua, "Pissenpa la kupanino, tangngia lino manda apa moi langi'."

²⁷ Ia joo kada "pissenpa" mpamanassai kumua ia ngasan to apa mangka dipaden la diroge nadita'dei, anna ia mandamo torro to tangtirogena.

²⁸ Iamo joo la mangkurru sumanga'ki' lako Puang Allataala, sanga tatarimamo jio mai kale-Na to mesa' kaparentan tangtiroge. Takalaja' takasiri'i antamassompa lako Puang Allataala situru' pakkaeloran-Na,

²⁹ sanga ia to Puang Allataala tasompa susi api mantunu pu'puh.

Ibrani

Video Ibrani 12

Ikuti Kami:

KONTAK | PARTISIPASI | DONASI