Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ 'O besesongoka gee 'o Musa wositota-totara, ge'ena ka ma guruminosi 'okia sonaa yaowa-owa gee dua 'iboa, so ge'ena 'iodumu ko ma gou-gounguawasi. 'O besesongo ge'ena koya'akunuwa yakisitotomo 'o nyawa gee yoboa wisuba ma Jo'oungu ma Dutuka ma ngekomo yo'asa 'o su-suba, ngaro 'o taunu 'isinoi-noimi yosisuba 'o sagala su-suba kaimatero ma.

² Nako kogee 'o su-suba ge'ena 'idadi yakisitebini, ge'ena ma raiokau 'o sagala su-suba ge'ena koyosisubawau. Sababu nako 'o nyawa gee wisuba-suba ma Jo'oungu ma Dutu la manga so-sowono yakisitebinokau, 'ona 'asa koyamaowau yosowono.

³ Duga ma nyo-nyata, 'o su-suba gee yosisuba-suba 'o taunu 'isinoimi, ge'enau 'isingano-nganono 'o nyawaka ma ngale manga so-sowono,

⁴ sababu ma goungu 'o sapi ma nauru ma 'aunu de 'o kabingi ma nauru ma 'aunu koidadiwa 'o so-sowono ya'ikiri.

⁵ Ma sababu ge'enau so ma 'orasi ma Kristus wo'uti 'o duniaku, 'una wongose ma Jo'oungu ma Dutuka, "Ngona konoduakuwa 'o su-suba 'o haewani de 'o su-suba 'iregu-regu, ma ngona nadua-duangou to ngoi 'ai roese.

⁶ Ngona konoduakuwa 'o su-suba 'o haewani gee yatuu-tuuku bolo 'o su-suba ma ngale 'o so-sowono 'isi'iki-'ikiri.

⁷ Ge'enaka de ngoi tongose, 'Jo'oungu ma Dutu, nedau ngoi! Ngoi toboa ma ngale tadiai 'ani mau 'isoka gee 'isilefoku 'o Buku 'Itebi-tebinoka gee 'ipe-peleleno ma ngale ngoi.'"

⁸ Ma si-siraka ma Kristus wongose, "Ngona konoduakuwa 'o su-suba 'o haewani de 'o su-suba 'iregu-regu, ngona konoduakuwa 'o su-suba 'o haewani yatuu-tuuku, de 'o su-suba gee 'o so-sowono 'isi'iki-'ikiri." Ma Kristus koge'ena wongose, ngaro 'o sagala su-suba ge'ena yosisuba moteke 'o besesongo gee 'o Musa wositota-totara.

⁹ Ge'ena 'iduanga de ma Kristus wongose, "Jo'oungu ma Dutu, nedau ngoi! Ngoi toboa ma ngale tadiai 'ani mau." So ma Jo'oungu ma Dutu waisanga 'o su-suba gee ma sira, de wositagali de ma Kristus 'awi su-suba.

¹⁰ Ma Yesus Kristus wadiaiokau 'okia naga gee ma Jo'oungu ma Dutu wi mau ma ngekomo wosisuba 'awi roese. De womasisarakani ge'ena ka ma moi ma ngale kaisi'ado-'adonikau, ge'enau ngone poodumu 'inasitebini 'o so-sowonoka.

¹¹ 'Iso de 'o Yahudiokau manga 'imam, to 'ona manga manarama ya'ao 'o wange 'isinoi-noimi, de yogi-gilio yosisuba 'o su-suba gee kaimatero. Ma 'o su-suba ge'ena ka ma eta ma koidadiwa 'o sowono ya'ikiri.

¹² 'Ena ma Kristus 'una wokula 'o su-suba ka 'o ngai moi ma ngale 'o so-sowono ma du-duusu kaisi'ado-'adonikau. Ge'enaka de 'una wopareta 'o ngii 'isure-sureka de ma Jo'oungu ma Dutu.

¹³ De ma 'orasi ne'ena ma Kristus wotamaa sigado ma Jo'oungu ma Dutu wadiai gee ma Kristusika wisa-saturuu yo'isene 'unaka.

¹⁴ Sababu ma Kristus ka ma moi wokula 'awi su-suba ge'ena ma ngale watuusokau kaisi'ado-'adonika 'o nyawa-nyawa gee wakiirikokau la yadiai ka ma Jo'oungu ma Dutu 'awi mau.

¹⁵ Ma ngale ge'ena dau, 'o Ngomasa 'Itebi-tebini mita 'inasitotara to 'ena ma sakisii. 'Ingose,

¹⁶ "Ma Jou wongose: Nedau 'o jaji gee dua todiai 'onaka, gee ma 'orasi dua 'asa ya'adono. Ngoi 'asa tanoa 'ai sagala besesongo to 'ona manga singinaka de tosilefo manga di-dibangioka."

¹⁷ Ma Jo'oungu ma Dutu mita wongose, "Ngoi 'asa kotosi-singinawa to 'ona manga so-sowono de manga singina ma dorou."

¹⁸ So 'o so-sowono de 'o singina ma dorou ma Jo'oungu ma Dutu kowosi-singinawau, so koiparaluuwau yosisuba 'o su-suba ma ngale 'o so-sowono ma ga-gaiki.

¹⁹ 'Esa moi riaka dodoto, sababu 'o Yesusou wosongene so ma 'orasi ne'ena ngone pomoroini powosama 'o Ngii 'Itebini 'Ifo-foloika.

²⁰ 'O Yesus wapelengakau to ngone nanga ngekomo ma sungi, ge'ena la 'o ngekomo gee 'inakula 'o 'ahu. La ma ngekomo 'o Yesus womasisarakani, ngone 'idadi pawosanga 'o Ngii 'Itebini 'Ifo-foloi ma da-datoko.

²¹ De ma 'orasi ne'ena de ma 'enau to ngone nanga 'Imam ma Amoko gee wosibalusu ma Jou 'awi Woa.

²² Sababu ge'ena nou, ngone pomasisori ma Jo'oungu ma Dutuka de nanga singina 'itebi-tebini de nanga ngo-ngaku 'ikua-kuata. Sababu 'inasitebinokau nanga singinaka gee pamaoku de nanga salaka, de nanga roese gee 'isitebinokau de 'o 'akere 'idodo-dodono.

²³ Salingou ngone pomasiga-gao nanga singina nganonika, sababu ma Jo'oungu ma Dutu 'awi jaji ge'ena 'asa wagoungu.

²⁴ De ngone salingou pomakalega moi de moi, la ngone 'idadi pomakababata ma ngale pomakadora moi de moi de padiai 'okia sonaa yaowa-owa.

²⁵ Ngone salingou kaitaurika pomalomu-lomu powisuba ma Jou, 'uwa kopoboa-boawa 'isoka 'o nyawa 'iregu-regu. Ngone salingou 'ifoloiosi poduaka pomasikakuata moi de moi, sababu ngone panako koito'ingowau de ma Jou woboau.

²⁶ Sababu nako 'o habari 'iti-tiai ma Jo'oungu ma Dutuno 'isitotarokau ngoneno, ma nako ka ngoneu nanga singina kopomaogoruwa podiai 'o sowono, ge'ena koi'iwau 'o su-suba ma ngale nanga sowono 'isi'aiki.

²⁷ So ma ngale ge'ena, naga ka 'o ngai moioka duga ma ngale ngone, ge'ena la dua potaari ma Jo'oungu ma Dutuka ma ngale wonalega ma diai 'ena posironga 'inamodongoka, de 'awi do'otasa ma sauku gee 'asa yakibooto yaki'uku 'o nyawa-nyawa gee yoma-malawani 'unaka.

²⁸ 'O nyawa gee koyosingou-ngounuwa 'o besesongo gee 'o Musa wokula-kulano, ge'ena yakihukumu yakiso-songene ka ma eta ma koyakisinginawa, nako ma sakisii yamididi bolo yaruange, ge'ena ma nyo-nyata 'ona ge'ena yosowono.

²⁹ Ma hukumani 'ifoloiosi 'itubuso salingou yakisidaene 'o nyawa gee wisido-dodoko ma Jo'oungu ma Dutu wi Ngowaka. 'O nyawa go'ona yamaoku koipakewa ma Jo'oungu ma Dutu 'awi jaji ma ngale 'o 'aunu, ge'ena la ma Kristus wosongene ma ngale watebini 'o sowono. De 'ona yositi-tingoono 'o Ngomasa gee 'inakula-kula 'o barakati.

³⁰ Ngone powinako 'una gee wongose konee, "Ngoi 'asa tobalasi. Ngoi 'asa takihukumu." De mita wongose, "Ma Jou 'asa wahakimi 'awi kawasa."

³¹ Posironga 'inamodongoka nako ma Jo'oungu ma Dutu wowango-wango wonahukumu!

³² Niongano-nganono ma 'orasi 'ipasa-pasa gee ngini 'asa kaikurue niongaku ma Kristusika, nia gudai niosusa de niosangisara, ma ngini tatapu niomariwo niosigou-gounguku.

³³ Do'oaka ngini nisimae-maeke de nisikisaa 'o kawasa ma bionoka. Do'oaka ngini mita niosangisara de 'o nyawa gee yakidiai koge'ena,

³⁴ de 'o nyawa gee yobui-buika manga singina ma susa ngini mita niamao. De gedagee nia kia sonaa 'iodumu ya'ora, ngini niosimoteke de nia singina 'isa-sanangi, sababu ngini nianakokau to ngini naga de ma 'enasi 'ifoloi yaowa, gee dua koitorouwau kaisi'ado-'adonika.

³⁵ Ge'enau so 'uwa nia singina 'i'ogu, sababu nako ngini tatapu niongaku, ge'ena to 'ena ma parasengi ma amoko!

³⁶ Ngini salingou niosabari la ngini 'idadi niadiai ma Jo'oungu ma Dutu 'awi mau de ngini 'asa niamake 'okia naga gee ma Jo'oungu ma Dutu wosijajiokau.

³⁷ Sababu naga 'o Buku 'Itebi-tebinoka 'isilefoku konee, "Ka 'o 'orasi moiou, de 'una gee woboaka rekeni, 'asa woboa; 'una 'asa kowatu-tuluruwa 'awi bo-boa.

³⁸ De 'ai kawasa gee yomarimoiokau de de ngoi 'asa yo'ahu sababu yongaku. Ma nako naga 'onaka munuka yomasipidili, ge'ena ngoi 'asa kotosanangiwa de de 'ona."

³⁹ Ngone ne'ena ge'ena ma Jo'oungu ma Dutu 'awi kawasa, ngone kopomasipidi-pidiluwa 'unaka so koposikaikawa 'o dorouka. Ma ngone ne'ena pongaku-ngaku ma Jo'oungu ma Dutuka de 'inasilahakau.

Ibrani

Video Ibrani 10

Ikuti Kami:

KONTAK | PARTISIPASI | DONASI