Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Musale walora wali heere foloukoke a yae Allah are heteungekoke nibi neme ro miyaere wali himalainyeboke yo yae me baeyeumi are nana ma yae kelewoumi, nebei nibi neme hele ban, u nulu na mokounge rambun keleumi wanen. Nebei aerene Musale walora wali heere foloukoke huluinye ro miyae Allahre eise molonainyelere mate yo na hului ban sele obo yoku na ralone yakamane baei imam walora Allahre ongkoufe felenayende walora naei wali himalonaibonde.
2 Na hului yae, benen ro miyae roko yae roko yae obo yoku yae ongkoufe efelei, rabuhine ban Allahre eise molowainye ro miyae na beko bako roko mbai faeinyeumikokera benen na beko bako mokowatene kena une beko ehubaikoi.
3 Nebeibe obo yoku na ralone yakamane baei ongkoufe feleyate yae mokowoumi ro miyae na u mekai beko u benera namman isaeyeyeumi.
4 Rabuhine ban sapi mukuu bele kambing bele naei ha yae ro miyae naei beko mokowatere faeinyeiboise na hului ban sele.
5 Nebei aerene Yesus Wali Ondofolo nda kani kelare meke hee, Ondofolo kaban Daud moloukoke wanen Yesus yae Allahre weunge, “Allah Ware obo yoku bele ani era bele ongkoufe felaeimekete nane merau hili era akau era iwayete Weyae kenare okoi, nebeibe hili era akau era wanen Raei uwa Weyae mokoungehakae kinyerebonde naeise kena koyae.
6 Ro miyae naei beko mokowate faeinyeiboi naeise obo yoku yae Ware ongkoufe feleikoyate nane merau hili era akau ere iwayete, Waei kena foise omokoi.
7 Nebeisa Reyae elale, ‘Allah ereisebo, Raei uwa Waei homofaene molaikoke huluinye Reyae Waei kenare koyae huluinye mokorele naeise mekale.’”
8 Na ranne moloukoke a hului Wali Ondofolo yae Allahre eleukoke, “Ro miyae naei beko mokowatere faeinyeiboi naeise Ware obo yoku ongkou wae feleikoyatere nane merau hili era akau era iwayetere Weyae kena okoi nane merau Waei kena foise omokoiboi.” (Naendae wanen hororebe Musale walora wali heere foloukokera nebei me u mokonate hele.)
9 Nebeisa Yesus eleukoke, “Ereisebo, Waei kena koyae hului mokorele naeise mewale.” Nebeinye, bena Allah yae Musale walora wali heere foloukoke horouboke, nebeisa wali nibi neme yae auboke.
10 Yesus Wali Ondofolo Allah kenare kowole huluinye Naei uwa kinyeuboke hereke. Nebei me u roko mbai mo mokouboke walora eyae Naei a elelere hila rabo halaenne ro miyaere Allah me baemmeyende, Naei kena foise mokomande yobe nekande.
11 Yahudi agama naei imam yoni-yoni na yane baei naei kalia mokoyate, roko yae roko yae obo yoku yae Allahre ongkoufe feleyainye, nebeibe beko mokowatere mbai sambai efaeinyeiboi sului.
12 Nebeibe Yesus Wali Ondofolo ro miyae naei beko mokowate aerene roko mbai, obo yoku ongkoufe felewate wanende, Naei uwa yae Allahre kinyeungebokera Allahle meube reufine ekenekele.
13 Nebei heera Yesus Wali Ondofolo na yokeijo yoni-yoni Allah mokommibonde naei oro kelee me keleene menayorulembonde yabe rakeimeyele.
14 Rabuhine ban roko mbainya uwa kinyeungeboke yae Allah yae huba ban haei ban Wali Ondofolo Naei a elelere hila rabo halaeinye ro miyaere Allahle u mekai wanen nekate yo yae me baemmiyende.
15 Nane merau nebei naei Allahle homofaene Allahlena Roh yae aere a isaeyeumeboke. Nda mekai yae eleukoke:
16 “Bena ya mendene Reyae nda a heteremikonde. Bena ya mendene Raeinya wali heere foloukokale ro miyae naei kena u einye haufemile nane merau naei u bene wa bene einye eremolongkonde.”
17 Nebeisa baraungeboke eleukoke, “Na beko na bune-bune mokowatere Raei u benera ensenundengkonde.”
18 Nebei beko yoni-yonire faeinyeubokamale benen nebei naeise obo yoku yae ongkoufe efelei.
19 Nebeinya aka naei baeke naei, Yahudi naei Allahre ei mom-mom imaene yowai heere naisake malo kaban wanen Yesusle uwa yeuboke. Naei ha rileuboke yae nebei malo wekeunge nane merau wali bele nibi nemere yeuboke. Yesusle walora aere waeumehike Allahle bokore yolo-yolo hele anuwaufe na hului be rabulemabonde emambonde.
20 (10:19)
21 Nane merau Allahle imae ei obe eise Yesus aei imam kaban mae me u eke mokole.
22 Nebei aerene men, nda u mekai ma yae Allah bele mbainye nekemale: na hele Allahle naeise kena kande yae, Wali Ondofolo Naei a elelere na hele hila rabo halaennele yae, kena u yolo-yolo bele nekemale yae. Nda nibi yae aei kena u yolo-yolo mokomande. Aei beko mokowande faeinyembondere nibi mbai mokombonde naeise Yesus Na ha yae rileuboke na hele elandene, nulu kemmebonde. Na hele nulu keumebokere kelemamile naeise bu konaimebonde.
23 Men, rabo elae halemande Wali Ondofolo Naei a elelere hila rabo halaeinye ro miyaere Allah yae wali himalainyeboke yo yae me baeumi, rabuhine ban Allah are nuleungeboke huluinye mokole.
24 Nane merau men, uwa nou hemambon, rahe nibi yae hi yae hire moi hurennele kena buhae u buhae yae hemamile nane merau u mekai foi yoni-yoni yae mokomale.
25 Aei u nolo u kainya hiwa yo yae ki baeiboke Allahre ei mom-mom imaera moise kainyehike nekayate u mekai wanen okoijae, nebeibe eyae na hibi-hibi homo mbai a mbainye oromande, rabuhine ban eyae aeisaei Tuhan mende ya nobeungekokene.
26 Eyae isaeyaendeboke Wali Ondofolo aei beko mokowandere faeinyemmebondere nibi mbai mokombonde naeise hereke, nane merau Allah yae Naei a elelere hila rabo halaeinye ro miyae wali himalainyeboke yo yae me baemmele. Nebeibe mehauwae na hibi-hibi u mekai beko mokomalena, nebei beko mokomale faeinyeiboi naei hili era akau era hi u.
27 Nebei wali ma nekandena, buhae yae hokommele rakemale Allah me nommeyondera Naei yokeijo bele italo naumene hukelenaimekonde.
28 Ro miyae mbai Musale walora wali heere foloukokere asasi koikoyelena, ro miyae bee name yae ijoko hiloiboyainyene kena buhae ban mae hoiboyate.
29 Allahle Kelure oro yae hayaeikoke ro miyae beko emekai bele mokowate. Yesus Na ha rileubokene Allah yae nebei ro miyaere Naei u mekai wanen nekate yo yae me baeumiboke Naei a heteungekoke huluinye, nebeibe nebei ro miyae Yesusle hare rabuhi ban mae me baete. Nane merau nebei ro miyae yae Allahle Roh nare kena buhae aere ban mae hewoumi Kiyaele me u foi naeise a beko huwoumi. Nebei u mekai ma ro miyaere Allah ehee bukulu na beko hele yun ran kaembaei ranne emmihayende.
30 Eyae aeisaei Allah nda are eleukoke Kiyae: “Reyae ro miyae na me u huluinye ehee bukulu eremibensonde Kiyae, mokorebonde hele.” Nane merau Neyae eleukoke: “Tuhan Naei holona ro miyae naei walire hului emmikolonde.”
31 U nene hele wali bele Allah yae ehee bukulu hainyemilere enainyehubande.
32 U bene nekayengko, na bere mai nolone hehe naeukoke wanen mayae Wali Ondofololena a foi faeu foise boraukoke. Nebei heene mayae beko hubawaunge hororebe Wali Ondofolo elele a huluinye na hibi nekewaube.
33 Roko hi ro miyae hosoro naei bene mai naeise a beko huwaimi nane merau weitasi kowayembe. Roko hiwa ro miyae hiwa mai beko hubawaunge wanen mbai hubawainye yore hakowaumi nangkele orowaube.
34 Kawane ekaisebate yo yae kena beko hubainye ma mbai mayae hubawaunge. Nane merau mai rambun yoni-yoni yo hiwa yarowaterebe mai kena rei mai yae nekewaube, rabuhine ban mayae maisaei Wali Ondofolole einye foi bele huba ban haei ban hononende rambun bele mai naeibe honayembene.
35 Nebei aerene mayae na hibi-hibi rabo elae halemembe Allah nuleungeboke a huluinye mokole, rabuhine ban nebei wali ma yae mai roibu kaban yarongkombe.
36 Allah kena kole hului mokongkombera Naei are heteungekoke foi yoni-yoni enjarombe naeise, mai kenane herawemembe Wali Ondofolo wembe a huluinye mokomembe.
37 Rabuhine ban Allahle homofaene nda wanen molaikoke: “Allah yae eleukoke, ‘Mendere rakaunge Kiyae na heki ban mende. Naei mende ya moise yae oyoboi.
38 Nebeibe wali himalainyeboke yo yae Reyae me baele ro miyae Raei a elalere hila rabo halenate nekenate. Nebei ro miyae moi kennehindena, nebei kiyae Raei kena foise omokoiboi.’”
39 Nebeibe eyae moise yae kemansinde Allahle bele emawahende yo ban. Nebeibe eyae Wali Ondofolo Naei a elelere hila rabo halaennele ro miyae, wali hena bona u mekai hubannele yo.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA