Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Hukum Taurat cume ngebẽng gambaran saq saru-saru mengenai hal-hal saq solah saq gen dateng, dait ndẽqne gambaran saq setetune lẽman hal-hal nike. Keranaq nike, hukum nike ndẽq mungkin nyempurneang ie pade saq parek tipaq Allah siq kurban saq pade, saq sebilang taun tetep teaturang.

² Sẽngaq lamun mule bau, pasti dengan-dengan ndẽqne malik ngaturang kurban, lantaran ie pade saq beribadah nike ndẽq sadar malik lẽq dose sesampun sekali tesuciang jari selaẽq-laẽqne.

³ Laguq nyatene kurban-kurban saq teaturang sebilang taun nike malahan miaq dengan jari inget lẽq dose-dose ie pade,

⁴ sẽngaq daraq sampi dait daraq bẽmbẽq mame mule ndẽqne bau ngapus dose.

⁵ Keranaq nike sewaktu Almasih tame ojok dunie, Ie matur lẽq Allah, "Deside nẽnten suke kurban dait persembahan; sebalikne Deside sampun nyedieang rage umaq Tiang.

⁶ Deside nẽnten nerimaq kurban saq tetunuq atao kurban jari pengapus dose.

⁷ Beterus Tiang matur, 'Niki Tiang, ya Allah! Tiang parek jari ngelaksaneang pekayunan Deside, maraq saq tetulis lẽq dalem Kitab Suci mengenai Tiang!'"

⁸ Lẽq penembẽqne Almasih matur, "Deside nẽnten suke kurban dait persembahan; Deside nẽnten nerimaq kurban binatang saq tetunuq jari persembahan dait lẽq kurban jari pengampunan dose." Timaq selapuq kurban nike teaturang menurut Hukum Taurat.

⁹ Sesampun nike Almasih matur, "Niki Tiang, ya Allah! Tiang parek jari ngelaksaneang pekayunan Deside." Siq care nike Allah ngapus selapuq kurban saq laẽq nike, dait gentiqne siq kurban saq kedue, nike Almasih.

¹⁰ Dait lantaran pekayunan Allah nike, ite sampun tesuciang langan persembahan rage Almasih, sekali jari selaẽq-laẽqne.

¹¹ Sebilang imam ngelaksaneang tugasne jari imam sebilang jelo, dait beulang-ulang ie ngaturang kurban-kurban saq pade. Laguq kurban-kurban nike tetu-tetu ndẽq bau ngapus dose.

¹² Sebalikne, Almasih cume ngaturang sopoq kurban jari pengampunan dose, dait kurban nike berlaku selaẽq-laẽqne. Sesampun ngaturang kurban nike, Almasih melinggih lẽq sedi kanan Allah, dait mrẽntah bareng kance Allah.

¹³ Dait mangkin Almasih ngantos jangke Allah miaq musuh-musuh-Ne takluk lẽq Ie.

¹⁴ Jari siq sopoq kurban, Almasih nyempurneang dengan-dengan saq sampun tepersiq lẽman dose.

¹⁵ Mengenai hal nike Roh Allah ẽndah besaksi tipaq ite,

¹⁶ "'Niki perjanjian saq gen Tiang piaq kance ie pade, lẽq jelo-jelo saq gen dateng.' Ie bemanik ẽndah, 'Gen Tiang toloq hukum-hukum Tiang lẽq dalem atẽ ie pade, dait gen Tiang tulis hal nike lẽq dalem pikiran ie pade.'"

¹⁷ "Tiang gen lupaqang dose-dose dait kejahatan-kejahatan ie pade."

¹⁸ Jari, dose-dose dait kejahatan-kejahatan nike sampun teampunin, make ndẽqne perlu malik teaturang kurban lantaran dose.

¹⁹ Jari, semeton-semeton senamian, siq ninggalne Deside Isa nike, mangkin ite bani tame ojok dalem Ruang Mahesuci.

²⁰ Deside Isa sampun bukaqang ite sopoq langan saq baru, dait saq jauq ite tipaq kehidupan langan kelambu, nike rage Deside Isa mẽsaq.

²¹ Dait mangkin ite bedowẽ sopoq imam saq agung saq betanggung jawab lẽq Gedẽng Allah.

²² Keranaq nike silaq ite ngadep Allah siq angen saq tulus dait iman saq teguq; siq atẽ saq sampun tesuciang lẽman perasaan salaq, dait siq awak saq sampun tepersiq kadu aiq saq murni.

²³ Ite harus tetu-tetu percaye lẽq pengharepan saq sampun ite akuq, sẽngaq Allah nike setie dait Ie gen nepatin janji-Ne.

²⁴ Dait silaq ite saling perhatiang, adẽq ite saling ngebẽng semanget lẽq dalem kasih dait lẽq dalem pegawẽan saq solah.

²⁵ Ndaq ite jaoqang diriq lẽman acare-acare ibadahte, maraq saq tebiaseang siq pire dengan, laguq silaq ite saling nasẽhat, dait sayan pacu ngelaksaneang lantaran jelo Tuhan sayan rapet.

²⁶ Sẽngaq lamun penenaoq mengenai kebenaran lẽman Allah sampun tesampẽang tipaq ite, laguq ite masih doang sediah gawẽq dose, make ndẽqne araq malik kurban jari ngapus dosente.

²⁷ Laguq sopoq-sopoqne saq araq umaq ite, penghakiman saq nakutang dait api murke-Ne saq gen nunuq jangke bis dengan-dengan durhake!

²⁸ Dengan saq ndẽq taat lẽq hukum saq teicanin siq Musa tehukum matẽ ndẽq araq ampun, lamun araq saksi due atao telu dengan, saq buktiang bahwe ie salaq.

²⁹ Berembẽ beratne hukuman saq gen teterimaq siq dengan saq ngicaq-icaq Bije saq asalne lẽman Allah. Dengan nike nganggep hine daraq perjanjian Allah, nike ninggalne Almasih saq persiq ie lẽman dose. Ie menghine Roh saq ngicanin rahmat.

³⁰ Ite nenaoq sai Ie saq bemanik, "Tiang gen bales! Tiang gen ngukum!" dait saq bemanik, "Tuhan gen hakimin umat-Ne."

³¹ Berembẽ kenjeringne lamun geriq ojok gading Allah Saq Idup!

³² Pade inget berembẽ keadaan semeton senamian lẽq waktu saq julu. Sesampun side pade nerimaq cahaye Allah, side pade luwẽq menderite; laguq side pade tetep tahen lẽq dalem perjuangan saq berat.

³³ Araq waktune side pade tehine dait teperlakuang secare ndẽq bagus lẽq julun dengan luwẽq. Araq waktune ẽndah side pade milu ẽndah menderite kance ie pade saq teperlakuang maraq nike,

³⁴ dait side pade milu ngeraseang kesedihan dengan saq tebui. Dait sewaktu selapuq dowẽn side pade terampas, side pade seneng nerimaq hal nike, sẽngaq side pade nenaoq bahwe side pade masih bedowẽ hal saq solahan, saq gen bau tahen selaẽq-laẽqne.

³⁵ Keranaq nike, ndaq putus ase, sẽngaq lamun side pade tetep percaye, make araq upaq saq belẽq lẽq hal nike.

³⁶ Side pade perlu ketekunan, adẽq side pade bau ngelaksaneang pekayunan Allah dait siq care nike bau nerimaq napi saq tejanjiqang siq Allah.

³⁷ Sẽngaq lẽq dalem Kitab Suci tetulis, "Cume karing seberaq doang, make Ie saq gen rauh nike, gen gelis rauh; Ie nẽnten gen tunde-tunde kerauhan-Ne.

³⁸ Dait dengan-dengan Tiang saq solẽh gen idup siq iman; laguq lamun araq lẽq antare ie pade saq mundur, make Tiang ndẽq suke lẽq ie."

³⁹ Ite niki ndẽqne umat saq ngundurang diriq dait binase. Sebalikne, ite niki umat saq percaye lẽq Allah dait saq mauq idup.

Ibrani

Video Ibrani 10

Ikuti Kami:

KONTAK | PARTISIPASI | DONASI