Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Anjo wattua tena karaeng ri Israel. Suku Dan a’boya iji daera untu’ napa’jari daerana ke’nanga, lanri tenapa nanggappa butta ke’nanga sangkamma suku-suku maraenga ri bansa Israel.
2 Jari ammilemi ke’nanga limaya tau pore battu ri sikontu bija niaka lalang ri sukuna ke’nanga ia niaka ammantang ri Zora siagang Esytaol. Nampa nasare tugasa’ anjo tau limaya amparessai anjo pa’rasanganga. Jari a’lampami anjo limaya tau, na battumo ke’nanga ri daera pa’bulukanna daera Efraim. A’bangngimi ke’nanga anjoreng ri balla’na Mikha.
3 Ero’na ke’nanga antama ri anjo ballaka, nalangngereki ke’nanga anjo bura’ne tu Lewia a’bicara, na naasseng nabatei ke’nanga bate bicarana. Jari namangeimi ke’nanga nampa akkuta’nang ri ia angkana, "Angngapa nunia’ anrinni? Apa parallunu? Inai angngerangko battu mae?"
4 Appialimi anjo turungkaya angkana, "Niakka’ anrinni lanri Mikha. Ia angngangkakka’ a’jari imanna na nasarea’ gaji."
5 Nakanamo ke’nanga ri ia, "Punna kamma padeng, tulunsai ikambe nukkuta’nang mae ri Allata’ala, maka la’matu-matuji anne pa’lampanna ikambe yareka tena?"
6 Appialimi anjo imanga angkana, "Teako batai. Napangngellai Batara anne pa’lampannu."
7 Le’baki anjo a’lampami anjo tau limaya nampa mange ri Lais. Anjoreng naparhatikammi ke’nanga pandudu’na. Ma’nassami angkanaya cara katallassanna anjo panduduka ri Lais sangkammai bansa Sidon. Manna nakasa’lakkang ke’nanga, siagang bellai ri bansa Sidon, amangi siagang sannangi katallassanna ke’nanga, tena musunna, bajiki pattallassanna siagang tena kakuranganna ke’nanga manna sike’de’.
8 Ri wattunna ammotere’mo anjo tau limaya mae ri julu sukuna ri Zora siagang Esytaol, nisuromi ke’nanga assare laporang.
9 Nakanamo ke’nanga, "Umba kimange ambunduki Lais. Battu anjoremmi ikambe. Buttana bajiki, luaraki na coppong, yangasenna nia’ anjoreng. Teaki’ tuli ammantangngi anrinni tamanggaukang apa-apa. Karo-karo maki’ mange anjoreng na nialle anjo pa’rasanganga. Lanirapikangi anjo pandudu’na na tanaassenga kalenna nibunduki. Tappaki ikambe angkanaya le’ba’mi Napassareang Allata’ala anjo pa’rasanganga mae ri katte."
10 (18:9)
11 Lanri kammana anjo, a’lampami battu ri Zora siagang Esytaol 600 tau suku Dan. Sukku’ ganna’na sanjatana ke’nanga,
12 a’lampa kalau’ ri Kiryat-Yearim ri daera Yehuda nampa akkema anjoreng. Iaminjo saba’na natuli niareng anjo tampaka Pakkemaang Dan.
13 Battu anjorengi ke’nanga a’jappa tulusu’ mange ri daera pa’bulukang Efraim sanggena battu mange ri balla’na Mikha.
14 Anjo limaya mata-mata le’baka nikiring riolo angkanami mae ri agang-aganna, "Nuassengi angkanaya ri kalase’renna anne ballaka nia’ patung nilapisi’ pera’? Nia’ todong patung-patung maraeng siagang Efod. Pikkiri’ sai, apa musti nigaukang."
15 A’lampami ke’nanga mange ri balla’na Mikha, pammantanganna anjo turungka tu Lewia, na napakkuta’nangngang kaadaanna.
16 Anjo wattua niaki anjo 600 tantarana suku Dan, gannaka sanjatana, ammenteng ri dallekanna pakke’bu’ lompoa.
17 Tulusu’mi antama ri balla’ anjo limaya mata-mata, nampa naalle anjo patung nilapisika pera’ siagang patung-patung maraenganga, kammayatompa Efodka. Anjo turungka tu Lewia niaki ammenteng siagang anjo 600 tantara ri dallekanna pakke’bu’ lompoa.
18 Ri wattuna antama anjo tau limaya ri balla’na Mikha na naalle anjo Efod siagang patung-patung berhalaya, akkuta’nammi anjo turungka tu Lewia angkana, "Apa ngaseng anne nugaukang?"
19 Appialimi ke’nanga angkana, "A’merekko! Teako akkuta’nangngi. Amminawang mako ri kambe, nampa ikau a’jari imang mae ri kambe siagang nitannang tau toa. Kala a’jari imang mae ri se’rea bawang kaluarga, bajikangngangi a’jari imanga mae ri se’rea suku."
20 Sannangi nyawana anjo turungka tu Lewia allangngereki pattujunna ke’nanga. Jari, naallemi anjo efodka siagang patung-patung barhala maraenganga nampa amminawang ri ke’nanga.
21 Nampa a’lampa anjo rombonganga ampatulusuki lampana ke’nanga, na’jappa riolo ana’-anaka, olo’-olo’ niparakaia siagang barang-baranna ke’nanga, ri dallekang.
22 Ri wattuna bellamo ke’nanga, nakio’mi Mikha siampi’-ampi’ balla’na nampa assama-sama ke’nanga angngondangi anjo suku Dan. A’reppese’namo ke’nanga,
23 akkiok-kio’mi Mikha siagang sikamma anjo taunna mae ri ke’nanga. Assailemi anjo suku Dan nakkuta’nang ri Mikha angkana, "Apa kutadeng? Angngapa nubattu mae siagang tau jai kammaya anne?"
24 Appialimi Mikha angkana, "Nulariangi patung-patungku siagang imanna, sa’genna tenamo apa-apangku, nampa nukana ‘Apa kutadeng?’"
25 Nakanamo anjo suku Dan, "Bajikangngang tongkoki bawanu; gassingka a’jari larro ngasengi anne tu jaia mae ri kau nampa nabakkaiko. Gassingka ikau siagang kaluarganu mate ngasengko."
26 Le’baki akkana kamma anjo suku Dan, napatulusu’mi ke’nanga lampana. Naciniki Mikha angkanaya kassakangngangi anjo ke’nanga na kalenna, jari nagilimmi kalenna nampa ammotere’.
27 Ri le’ba’namo nalariang suku Dan anjo imanga siagang barang-barang ibada napareka Mikha, a’lampami ke’nanga mange ambunduki Lais, kota amanga siagang sannanga katallassanna. (Anjo kotaya niaki lalang se’re ka’bung siagang kota Bet-Rehob). Anjo tu Dan nabuno ngasemmi sikontu pandudu’na Lais nampa natunu anjo kotaya. Tena battu antulungi anjo taua ri Lais lanri tassa’la’na tampa’na ke’nanga siagang bellai battu ri Sidon. Le’baki anjo nabangummi tu Dan ammotere’ anjo kotaya nampa ammantang ke’nanga anjoreng.
28 (18:27)
29 Nasambeimi ke’nanga arenna anjo kotaya a’jari Dan, situru’ arenna boena ke’nanga, iamintu Dan, ana’na Yakub.
30 Anjo patung barhala naeranga ke’nanga, napaentengi anjoreng ri kotaya, nampa naangka’ Yonatan, ana’na Gersom, cucunna Musa, a’jari imang mae ri ke’nanga. Iaminne jari-jarina Gersom tuli a’jari imang ri suku Dan sa’genna narapi’ jammang nieranna nipela’ umma’ Israel mange ri pa’rasangang maraeng.
31 Anjo patung barhala bate pare’na Mikha tuli niaki ri Lais ri wattu nia’na KemaNa Batara ri Silo.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA