Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 I bas paksa e la lit raja i Israel, janah i bas suku-suku Israel suku Dan langa ndat taneh. Dage suku Dan sangana ndarami taneh jadi daerahna.
2 Emaka ipilihi kalak Dan lima kalak dilaki si mbisa i bas ia nari. Kenca bage isuruhna berkat i kota Sorah ras Estaol alu perentah niari negeri e. Kenca ia seh i deleng-deleng Eperaim, ngadi ia i bas rumah Miha.
3 Sanga ia i je itandaina logat cakap anak perana suku Lewi e. Emaka isungkunna ia nina, "Erkai kam i jenda? Ise maba kam seh ku jenda?"
4 Nina njabapsa, "Lit arih kami ras Miha, maka igalarina gajingku gelah aku jadi imamna."
5 Nina kalak ndai man anak perana e, "Cubaken sungkun Dibata ntah lit ntah lang gunana perdalanen kami enda."
6 Nina imam e, "Ula aru atendu. TUHAN si ngarak-ngarak kam i bas perdalanenndu."
7 Emaka lawes si lima kalak e nadingken ingan ndai ku kota Lais. Iidahna uga sikapna kegeluhen kalak si i je seri ras kalak Sidon. Dame, rayatna mehuli, la rubat-rubat, kai atena e lit. Ndauh ia i bas bangsa Sidon nari, janah la lit hubungenna ras kalak si deban.
8 Kenca si lima kalak enda mulih ku Sorah ras Estaol, ngalo-ngalo kalak si sada suku ras ia janahna nungkun kai si ijumpaina.
9 "Mari nina kalak e. Ota siserang Lais. Nggo idah kami negeri emaka tuhu-tuhu mejile. Erkai kam i jenda? Ota! Lawes kita, gelah sibuat man banta negeri e!
10 Kenca nggo kam seh i jah, tentu itehndu maka rayat negeri e sitik pe la curiga. Negeri e sada negeri si mbelin. I je kai atendu e lit, janah nggo ibereken Dibata negeri e man bandu."
11 Emaka lit enem ratus kalak dilaki i bas suku Dan nari nadingken Sorah ras Estaol, nggo sikap erperang.
12 Berkat ia ibahanna perkemahenna i Kiryat Jearim i Juda. Eme sabapna maka ingan e igelari denga Perkemahen Dan.
13 Kenca bage lawes ia i jenari emaka seh ia i rumah Miha i deleng-deleng Eperaim.
14 Kenca e nina si lima kalak si nggo niar-niar i sekelewet Lais man rombongenna, "Ietehndu kang maka lit i jenda i bas rumah e gana-gana kayu si ilapisi alu pirak? Lit ka pe gana-gana si deban ras sada epod. Kai akapndu si arus sibahan?"
15 Emaka lawes kalak e ku rumah Miha, ingan anak perana suku Lewi e, janah ikatakenna mejuah-juah man bana.
16 Sanga e tentera Dan si enem ratus si nggo ersikap ku peperangen, paksana tedis i pintu gerbang.
17 Tapi mata-mata si lima kalak e erdalan terus ku bas rumah e, ibuatna gana-gana kayu si ilapisi alu pirak e, bage pe gana-gana si deban, ras epod, sedangken imam e tading i pintu gerbang ras tentera si enem ratus kalak e.
18 Asum si lima kalak e lawes ku rumah Miha janah muati barang-barang si badia e, nungkun imam e nina, "Erkai kena e?"
19 Nina kalak e erjabap, "Sinik saja kam, ula ngerana. Ikutken kami gelah kam jadi imam ras si ngajari kami. Apai akapndu ulin jadi imam man sada suku i bas bangsa Israel asangken jadi imam man keluarga sada jelma?"
20 E erbahan meriah kal akap imam e, emaka ibuatna barang-barang si badia e, kenca bage iikutkenna kalak ndai.
21 Kenca bage erkusur kalak e mulai ia erdalan ras anak-anakna, asuh-asuhenna, ras kerina sikerajangenna erdalan arah lebe.
22 Nggo ndauh kalak ndai erdalan maka ilebuh Miha teman-temanna sada kesain gelah erperang. Kenca itundukna kalak Dan e,
23 emaka erlebuh ia man bana. Erkusur kalak Dan, emaka isungkunna Miha nina, "Kai e? Man kai kerina rayat ena?"
24 Nina Miha njabapsa, "Ula pekulah-kulahndu la ietehndu! Ibabanndu imamku ras gana-gana si kubahan, jenari lawes kam! Kai nari i bas aku tading?"
25 Nina kalak Dan, "Madin kam ulanai ngerana adi la atendu reh rawa kalak enda, ula kam kari iserangna. Kenca bage mate kari kam ras kerina keluargandu."
26 Kenca bage iteruskenna perdalanenna. Perbahan idah Miha maka gegehen kalak Dan asangken ia, erkusur ia emaka mulih ia ku rumahna.
27 Kenca kalak Dan nggo maba imam ras barang-barang bahanen Miha, lawes ia, iserangna Lais, kota si dame ras rayatna mehuli si ringan i baluren Bet Rehop. Ibunuhna kerina rayat i bas ingan e, jenari icilukna kotana. Sada pe la lit nampatisa, erkiteken Lais ndauh i Sidon nari, janah la lit hubungen kalak enda ras rayat si deban. Kalak Dan mbangun kota e mulihi, emaka i je ia ringan.
28 (Hak 18:27)
29 Isambarina gelar Lais jadi Dan rikutken gelar nini-ninina anak-anak Jakup;
30 Ipajekken kalak Dan gana-gana e man sembahenna, emaka Jonatan, anak Gersom, kempu Musa erdahin jadi imam man suku Dan, janah sinursurna tetap jadi imam seh ngayak rayat Dan ibaba ku pembuangen.
31 Gana-gana Miha tetap tading i jah kidekah rumah Dibata lit denga i Silo.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA