Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 E jaman jareya e Isra’il tadha’ ratona. Suku Dan gi’ nyare dhaera epadaddiya baba kakobasa’anna, sabab suku jareya gi’ ta’ olle bagiyan tana e antarana ku-suku Isra’il laenna.
2 Daddi suku jareya laju mele oreng se soga’ kalema dhari sakabbinna kaom e dhalem sukuna se neng e Zora ban Esyta’ol. Oreng se kalema jareya eparenta’agi nalektegi nagara jareya. Oreng se kalema jareya mangkat, sarta laju napa’ e dhaera pagunongan e baba kakobasa’anna Efraim. E jadhiya reng-oreng buru ngenep e bengkona Mikha.
3 E bakto maso’a ka bengko jareya reng-oreng buru ngedhing oreng ngodha Lewi rowa acaca, dhari pacacana etemmo ja’ jareya oreng Lewi. Daddi bi’ oreng se kalema jareya esanderri, pas etanyae kantha reya, "Sampeyan me’ badha e ka’iya? Badha ponapa? Pasera se abakta sampeyan?"
4 Oreng ngodha jareya nyaot, "Kaula bi’ Mikha epadaddi imam, sareng eparenge gaji."
5 Ca’na reng-oreng gella’, "Manabi sapaneka, tore kaula nyo’ona tolong tanya’agi ka Allah ponapa parjalanan kaula sakanca paneka bakal ahasela ponapa bunten."
6 Saodda imam jareya, "Ampon, ja’ kobater. PANGERAN aberkadi parjalananna sampeyan paneka."
7 Saellana jareya se kalema laju mangkat entar ka Lais. E jadhiya padha ngabassagi pandhudhu’na. Nyata ja’ reng-oreng Lais jareya odhi’na padha ban oreng Sidon. Maske jau bara’ jau temor, ban jau dhari bangsa Sidon, odhi’na aman ban taremtem; ta’ andhi’ moso, ma’mor sarta ta’ korang pa-apa.
8 E bakto reng-oreng jareya abali ka reng-oreng sasukuna e Zora ban e Esyta’ol, laju esoro abala hasella se nalektegi nagara jareya.
9 Ca’na reng-oreng jareya, "Tore ja’ nyerrangnga Lais. Kaula sakanca ampon padha entar ka ka’issa’, ampon nangale’e kabadha’anna. Tanana sae, lebar sareng ma’mor, ponapa’a bai badha. Ja’ neng e ka’iya malolo, neng-enneng malolo tadha’ ollena. Tore duli mangkat arebbu’ nagara ka’issa’. Tanto sampeyan pas oneng ja’ pandhudhu’na ta’ nyangka sakale ja’ eserranga oreng. Kaula yakin Allah marengngagi nagara ka’issa’ ka sampeyan."
10 (18:9)
11 Daddi suku Dan laju mangkat dhari Zora ban Esyta’ol, bannya’na nem atos oreng. Sanjatana genna’.
12 Reng-oreng jareya mangkat ka bagiyan bara’na Kiryat-Yearim e baba kakobasa’anna Yehuda sarta pas akemah e jadhiya. Jareya sababba arapa kennengngan jareya me’ enyamae Parkemahanna Dan.
13 Dhari jadhiya pas ajalan terros ka dhaera pagunongan Efraim sampe’ ka bengkona Mikha.
14 Ta-mata se kalema se entar nalektegi nagara jareya ngoca’ ka ca-kancana, "Sampeyan ba’ onenga ja’ e sala settonga compo’ paneka badha arca se akole’ salaka? Badha jugan ca-arca laenna sareng efod. Mon ca’na sampeyan samangken kadi ponapa saena?"
15 Reng-oreng jareya laju entar ka bengkona Mikha, kennengnganna oreng Lewi se gi’ ngodha jarowa, sarta padha atanya baramma kabadha’anna oreng Lewi jareya.
16 E bakto jareya tantarana suku Dan se nem atos oreng rowa, se padha genna’ sanjatana, teppa’na manjeng e adha’na labang saketheng.
17 Ta-mata se kalema rowa terros maso’ ka dhalem bengko jareya, laju ngala’ arca kaju se akole’ salaka rowa ban ca-arca laenna, bariya keya efod. Oreng Lewi se ngodha rowa teppa’na manjeng ban tantara se nem atos oreng rowa e labang saketheng.
18 E bakto oreng se kalema jareya maso’ ka bengkona Mikha sarta ngala’ efod ban ca-arca brahala gella’, imam Lewi jareya atanya, "Ponapa se elakone sampeyan e ka’iya?"
19 Saodda reng-oreng jareya, "Ampon neng-enneng! Ja’ nya’-tanya’an! Tore noro’ kaula bai, dhaggi’ sampeyan pas daddi imam ban panasehadda suku kaula. Etembang pera’ daddi imamma settong kalowarga, lebbi becce’ daddi imamma settong suku!"
20 Oreng Lewi se gi’ ngodha jareya pera’ ngedhing oca’na reng-oreng jareya. Daddi laju ngala’ efod ban ca-arca brahalana, pas noro’ reng-oreng jareya.
21 Saellana jareya rombongan jareya nerrossagi parjalananna, e dha’-adha’ kadibi’ na’-kana’, laju ebinna ban rang-barangnga.
22 Saellana reng-oreng jareya jau se ajalan, Mikha makompol ga-tatanggana, laju areng-bareng nyerser reng-oreng suku Dan jareya. Saellana semma’ se eserser,
23 Mikha ban reng-orengnga ra’-era’an ka reng-oreng jareya. Reng-oreng suku Dan jareya atole laju atanya, "Badha apa? Me’ ngeba oreng sabannya’na?"
24 Oca’na Mikha, "Ba’na me’ atanya ‘badha apa?’ Ba’na ngeba buru tang ca-arca ban tang imam, sampe’ sengko’ ta’ andhi’ pa-apa pole."
25 Oca’na reng-oreng Dan, "Ella ja’ nya’-bannya’ caca pole; dhaggi’ reng-oreng reya dungkap peggel, ba’na pas eamok. Dhaggi’ ba’na ban saana’ binena padha mate."
26 Samarena ngoca’ kantha jareya suku Dan jareya nerrossagi parjalananna. Mikha nangale’e ja’ kakowadanna suku Dan jareya ta’ sabandhing ban kakowadanna orengnga dibi’, daddi laju abali mole.
27 Saellana ngeba buru imamma ban rang-barang gabayanna Mikha se eangguy e dhalem kabakteyan, suku Dan jareya laju entar nyerrang Lais, kottha se orengnga odhi’ aman ban taremtem. (Kottha jareya apolong e settong cora ban kottha Bet-Rehob.) Bi’ reng-oreng Dan oreng Lais jareya epate’e ban kotthana eobbar. Tadha’ oreng se nolonge oreng Lais jareya sabab kennengnganna meji ban jau dhari Sidon. Saellana jareya bi’ oreng Dan kottha jareya laju epaddek pole sarta pas ekennengnge.
28 (18:27)
29 Nyamana kottha jareya eoba daddi Dan, menorot nyamana bangatowana, iya areya Dan, pottrana Yakub.
30 Arca brahala se egiba buru jareya esaba’ e kottha esemba’a, dineng Yonatan, ana’na Gersom, kompoyya Mosa, epele epadaddi imamma. Toronanna Gersom jareya paggun daddi imamma suku Dan sampe’ jamanna ommat Isra’il ebuwang ka nagara laen.
31 Arca brahala gabayanna Mikha jarowa paggun badha e Lais saabidda Kemah Socce badha e Silo.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA