Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Bani na sahali laho ma si Simson hu huta Gasa, ididah ma ijai sada boru jalang, lanjar iparayak ma.
2 Dong ma na patugahkon hubani halak parhuta Gasa: Roh do si Simson hubagas huta on, jadi iinggoti anjaha ionggopi sidea ma ia i lambung horbangan ni huta ai layur sabornginni ai, tapi sip do sidea sabornginni ai, ai ninuhur ni sidea, “Patar marayak siang ari ma bunuh hita ia.”
3 Tapi modom do si Simson ronsi tongah borngin: Tongah borngin honsi puho ma ia, ijolom ma haduasi labah ni horbangan ni huta ai, pakon tiangni na dua ai, lanjar idokdok ma rap pakon pating-patingni; itampeihon ma ai hu abarani anjaha iusung ma ai hu pakpak ni dolog na i lobei ni Hebron.
4 Dob ai rosuh ma uhurni mangidah sada naboru i habungan Sorek, goranni si Delila.
5 Jadi roh ma raja-raja ni halak Palistim hubani anjaha nini ma, “Sai elek-elek anjaha tulimati ma ia, atap halani aha do hagogohonni na banggal ai, anjaha marhitei aha do tartaluhon hanami ia ampa manangkutsi laho patundukkonsi; ganup pe hanami mamberehon bam saribu saratus duit pirak.
6 Jadi nini si Delila ma dompak si Simson, ʻPatugah ma bangku, halani aha do hagogohonmu na banggal in, anjaha marhitei aha do ham sangkuton laho patundukkon ham?ʼ
7 Nini si Simson ma mambalosi, ʻAnggo isangkut ahu bani pitu tali panah na baru, na so horah ope, gabe galek ma ahu, gabe songon jolma na legan.ʼ”
8 Dob ai iboan raja-raja ni Palistim ma hubani pitu tali panah na baru na so horah ope, jadi isangkut naboru ai ma ia bani tali ai.
9 Tapi adong do halak na monggop isuruh ibagas kamar, dob ai idilohon naboru ai ma, “Halak Palistim mandorab ham, Simson!” Tapi irotapkon ma tali panah ai songon tali rami na rotap binahen ni apuy. Jadi seng tarbotoh rusia ni hagogohonni ai.
10 Dob ai nini si Delila ma dompak si Simson, “Tonggor ma, ioto-otoi ham do hape ahu anjaha iladungi ham, on pe patugah ham ma bangku, barang marhitei aha do ham boi sangkuton.
11 Nini ma mambalosisi, ʻAnggo isangkut ahu bani tali na baru, na so ongga pinakei ope atap bani horja aha pe, gabe galek ma ahu, gabe songon halak na legan.ʼ”
12 Dob ai ibuat si Delila ma tali na baru, isangkut ma ia bani tali ai, anjaha idilohon ma, “Halak Palistim mandorab ham, Simson!” Anjaha halak na monggop ai ibagas kamar do. Tapi irotapkon ma tali ai hun tanganni songon bonang tumang.
13 Dob ai nini si Delila ma dompak si Simson, “Ronsi nuan ioto-otoi ham do ahu anjaha iladungi ham; patugah ma bangku naha do manangkut ham. Nini ma hu bani, ʻAnggo idandan ho na pitu pusuk buhit ni ulungku rap pakon tali pasa, dob ai ipakuhon ai hu bani dingding, gabe galek ma ahu, gabe songon halak na legan.ʼ”
14 Jadi sanggah na modom ia, ibuat si Delila ma na pitu pusuk buhit ai, anjaha idandan ma ai marhitei tali pasa ai, dob ai ipakuhon ma hu dingding. Dob ai idilohon ma, “Halak Palistim mandorab ham, Simson!” Tapi puho ma ia humbani na modom ai, irotapkon ma paku pakon tali pasa ai.
15 Nini naboru ai ma hu bani, “Mase ma ihatahon ham, ʻHolong do uhurhu bam, hape seng hu bangku uhurmu?ʼ Domma tolu hali ahu ioto-otoi ham, anjaha lalap seng ipatugah ham hu bangku, ija do tibal ni gogohmu na banggal in.”
16 Tapi dob sai ielek-elek naboru ai ia siap arian, anjaha isosak-sosak, gabe mandolei ma ia anjaha sihol matei.
17 Dob ai ipatugah ma hubani ganup ponopan ni uhurni, nini ma hu bani, “Seng ongga dais pisou parsuhur hubani ulungku, ai halak nasir do ahu bani Naibata humbani parnaibataan nari. Porini isuhur ahu, surut ma gogohku humbangku, gabe galek ma ahu, gabe songon jolma na legan.”
18 Jadi dob ididah si Delila, na dob pinatugah bani ganupan ponopan ni uhurni ai, isuruh ma na mandilo raja-raja ni halak Palistim, nini ma dompak sidea, “Roh ma nasiam sahali on, ai domma ipatugah bangku ganup ponopan ni uhurni.” Dob ai tangkog ma raja-raja ni halak Palistim ai bani, lanjar iboan ma duit ai.
19 Jadi dob sinok mata ni si Simson i abingan ni si Delila, idilo ma sada dalahi, ase isuhur na pitu pusuk buhit ni uluni ai. Dob ai mulai ma galek ia, anjaha surut ma gogohni hun bani.
20 Nini si Delila ma mandilohon, “Halak Palistim mandorab ham, Simson!” Jadi tarpuho ma ia humbani na modom ai, anjaha nini ma, “Luar ma ahu songon na somal, marrunta ma ahu. Seng ibotoh na dob itadingkon Jahowa do ia hape.”
21 Dob ai itangkap halak Palistim ma ia, anjaha ipulsitkon ma matani, dob ai iboan ma ia hu Gasa, anjaha irantei bani dua rantei tombaga; ibahen ma ia manduda ibagas tutupan.
22 Tapi mangulaki tubuh ma jambulan ni uluni, dob na isuhur ai.
23 Dob ai martumpu ma ganup raja-raja ni halak Palistim, sihol manggalangkon sada galangan na banggal hubani Dagon, naibata ni sidea ai, anjaha marmalas ni uhur, ai nini sidea do, “Domma iondoskon naibatanta hubagas tanganta si Simson munsuhta in.”
24 Jadi dob ididah halak simbuei ai ia, ipapuji-puji sidea ma naibata ni sidea, nini sidea ma, “Domma iondoskon naibatanta hubagas tanganta munsuhta, na parseda tanohta, anjaha na mambunuh buei hasomanta.”
25 Jadi sanggah na marmalas ni uhur ai sidea, nini sidea ma, “Dilo ma si Simson, ase mariah hita ibahen.” Jadi idilo sidea ma si Simson hun rumah tutupan, gabe manortori ma ia i lobei ni sidea; dob ai ipajongjong ma ia i holangkolang ni tiang partunggul ai.
26 Nini si Simson ma hubani dakdanak na manogu-nogu tanganni, “Lopas ma ahu ase hujamah tiang partunggul ai, onjolan ni rumah ai, ase mangunsandei ahu hujai.”
27 Tapi gok do dalahi ampa naboru i rumah ai; ijai do homa ganup raja-raja ni halak Palistim, anjaha i atas tayub ni rumah ai adong do hira-hira tolu ribu halak dalahi pakon naboru, na manonggor si Simson na manortori ai.
28 Dob ai dilo-dilo ma si Simson hubani Jahowa, nini ma, “Ham Tuhan Jahowa, ingat Ham ma ahu, pargogohi Ham ma ahu pala sahali nari, Ham Naibata, ase hubalaskon pala sada humbani matangkon hubani halak Palistim.”
29 Dob ai idahop si Simson ma na dua tiang partunggul partongah-tongah ai, onjolan ni rumah ai, lanjar iaitkon, sada bani siamunni, anjaha na sada nari bani sambilouni.
30 Nini si Simson ma, “Age matei ahu rap pakon halak Palistim on.” Jadi unduk ma ia sagogoh-gogohni, gabe marumbak ma rumah ai, anjaha itipa ma raja-raja ampa haganup na ibagas ai, gabe bueinan ma na binunuhni bani parmateini ai, ase na binunuhni sanggah bani goluhni.
31 Dob ai tuad ma saninani pakon ganup ginompar ni bapani, ibuat sidea ma ia, iboban ma tangkog anjaha itanom ma i holangkolang ni Zora pakon Estaol ibagas tanoman ni si Manoah bapani ai. Adong do dua puluh tahun ia manguhumi halak Israel.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA