Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 E settong are Simson meyos ka kottha Gaza. E jadhiya apanggi ban sondel, pas asaren ban sondel jareya.
2 Pandhudhu’ Gaza ngedhing ja’ Simson badha e jadhiya, daddi kennengngan jareya ekeppong ban samalem benteng reng-oreng Gaza anante’ Simson e labang sakethengnga kottha. Tape e malem jareya pera’ ajaga malolo sabab ca’na pekkerra, "Mon la moncar are bai pate’e."
3 Tape Simson asaren e jadhiya ta’ sampe’ moncar are. Tengnga malem abungo, pas meyos ka labang saketheng. Labang saketheng jareya edabu’ sakaleyan ban ga-canggana sarta lang-palangnga, pas epekol ka konco’na gumo’ e bara’na Hebron.
4 Saellana jareya Simson pas lebur ka babine’ dhari Cora Sorek, nyamana Delila.
5 Badha pangraja Filistin kalema manggi’i babine’ jareya, pas adhabu, "Kodda’ Simson jareya cacae, baramma carana se etemmowa apa roseyana kakowadanna, ban baramma carana mon maelanga kakowadan jareya. Dhaggi’ sengko’ padha maso’a, Simson jareya etaleyana me’ olle ekenneng pakala. Dhaggi’ ba’na eopa’ana; sengko’ se kalema reya aberri’a pesse ka ba’na; dhari rang-sorangnga saebu saratos pesse salaka."
6 Daddi Delila ngoca’ ka Simson, "Simson, ba’na me’ ce’ kowadda, apa sababba? Baramma carana oreng mon terro naleyana ba’na sopaja ba’na ta’ bisa’a aguli pole? Mara, ra, sengko’ balai!"
7 Saodda Simson, "Mon sengko’ etale’e ban talena gandhiba se anyar se gi’ ta’ pate kerreng pettong meggi’, sengko’ pas ta’ andhi’ kakowadan akantha reng-oreng laenna."
8 Ja-pangraja Filistin jareya laju mondhut talena gandhiba se gi’ ta’ pate kerreng pettong lambar bannya’na, eparengngagi ka Delila. Delila nale’e Simson ban tale jareya, reng-oreng Filistin anante’ e kamar laenna sabatara Delila nale’e Simson bi’ tale jareya, pas aera’, "Simson! Badha reng-oreng Filistin!" Simson jaga, talena gandhibana rowa epapegga’. Le-tale jareya pegga’ akantha bennang se ekello’ apoy. Roseyana kakowadanna Simson gi’ ta’ bucor.
9 (16:8)
10 Ca’na Delila ka Simson, "Ba’na lecegan, sengko’ eco-koco. Mara, ra, sengko’ balai, baramma carana mon naleyana ba’na."
11 Dhabuna Simson, "Mon sengko’ etale’e bi’ tale se anyar se gi’ ta’ tao eangguy, sengko’ tanto pas ta’ andhi’ kakowadan akantha oreng biyasa."
12 Sabatara reng-oreng Filistin anante’ e kamar laen, Delila ngala’ tale se anyar pan-barampan lembar, Simson etale’e. Samarena Delila pas aera’, "Simson! Badha reng-oreng Filistin!" Tape tale jareya bi’ Simson epapegga’ akantha oreng se mapegga’ bennang.
13 Delila pas ngoca’ ka Simson, "Sengko’ eco-koco pole bi’ ba’na. Mara, ra, sengko’ balai, baramma carana mon naleyana ba’na." Saodda Simson, "Mon tang obu’ pettong gintel eanggi’ ka bennang e pakakas tennon, pas etaleyagi ka kajuna pakakas tennon jareya, sengko’ tanto ta’ andhi’ kakowadan akantha oreng biyasa."
14 Bi’ Delila Simson epatedhung, obu’na pettong gintel eanggi’ ka bennang e pakakas tennon, pas etaleyagi ka kajuna pakakas tennon jareya. Samarena pas aera’, "Simson! Oreng Filistin dhateng!" Simson jaga pas naja’ rambudda sampe’ locot dhari pakakas tennon jareya.
15 Ca’na Delila ka Simson, "Ba’na ngoca’ taresna ka sengko’, mangkana atena ba’na jau dhari sengko’! La tello kale ba’na co-ngoco sengko’, sampe’ sateya ba’na ta’ endha’ malae sengko’ arapa ba’na me’ ce’ kowadda."
16 Delila ros-terrosan nge’-ngare’nge’ maksa atanya, sampe’ Simson busen ngedhingngagi.
17 Dhi-budhina Simson nyareta’agi roseyana. "Tang obu’ ta’ tao eketthok," dhabuna Simson. "Sengko’ la eatorragi malolo ka Allah. Molae lahir sengko’ la daddi oreng nazir. Mon tang obu’ eketthok, tang kakowadan elang; sengko’ tanto ta’ andhi’ kakowadan akantha oreng biyasa."
18 Delila arassa ja’ Simson abala sabendherra parkara roseyana. Daddi pas ngerem kabar kantha reya ka ja-pangraja Filistin, "Ngereng meyos ka ka’dhinto sakaleyan aggi’. Simson ampon mokka’ roseyana." Pangraja se kalema jareya rabu abakta pesse se eparengngagiya ka Delila.
19 Saellana jareya Delila los-ngellos Simson sampe’ ngeddha e reba’anna, saellana jareya Delila laju ngolok oreng, esoro ngetthok rambudda Simson pettong gintel. Delila pas nyeksa Simson sabab Simson la kaelangan kakowadanna.
20 Delila pas aera’, "Simson! Reng-oreng Filistin dhateng!" Simson abungo nyangka bisa’a lolos akantha ban-sabbanna. Salerana ta’ ngagali ja’ la edinggallagi PANGERAN.
21 Bi’ reng-oreng Filistin epega’, pas econgke’ socana. Saellana jareya pas egiba ka Gaza, etale’e bi’ rantay dimbaga dhadhuwa’; Simson epenjara. E jadhiya epalako, epagiling gandum.
22 Tape saabidda badha e penjara jareya rambudda tombu pole.
23 E settong are ja-pangrajana Filistin akompol apesta’a, ngatorragiya kurban ja’-raja’an ka Dagon, dibana. Reng-oreng jareya anyanye kantha reya, "Sengko’ ban ba’na mennang ka moso se anyama Simson polana etolonge Dagon!"
24 Sambi neng-sennengngan reng-oreng jareya ngoca’, "Simson jareya giba dha’ enna’, gabay con-locon me’ olle magella’ oreng!" Simson pas ekone’e dhari penjara, egabay con-locon, epamanjeng e antarana lar-pelar se raja. E bakto nangale’e Simson, reng-oreng Filistin padha anyanye ahormadi Dagon, "Bi’ diba Dagon tang bangsa la epamennang ka moso se la arosak tang nagara ban mate’e tang bangsa sabannya’na!"
25 (16:24)
26 Dhabuna Simson ka na’-kana’ lake’ se nonton salerana, "Ocol tang tanang, sengko’ terro neggu’ana ka pelarra geddhong reya, sengko’ terro nyandhara."
27 Geddhong jareya possa’ ban oreng. Pangrajana Filistin se kalema badha e jadhiya keya. E loteng badha ra-kera tello ebu oreng. Kabbi padha nenggu ban ya-nyeya Simson.
28 Simson adu’a, dhabuna, "Adhu, Guste ALLAH Se Mahatenggi, kaemodi abdidalem, Guste. Pabaliyagi kakowadan abdidalem samangken saos, Guste, sopaja abdidalem kengenga males ka reng-oreng Filistin se nyongke’ tengal abdidalem."
29 Simson neggu’i pelar se dhadhuwa’ se badha e tengnga, se ngokowe geddhong jareya. Astana se salaja etapeddagi ka pelar se settong ban asta salajanna ka pelar settonganna,
30 Simson laju aera’, "Dina sengko’ me’ olle mate ban reng-oreng Filistin!" Pelar jareya esothok salar-kellarra sampe’ gujur ngenneng ka pangraja se kalema gella’ ban reng-oreng laenna se badha e jadhiya. Simson seda, tape e bakto sedana jareya Simson la mate’e oreng abannya’an dhari se epate’e e bakto gi’ odhi’na.
31 La-balana ban saessena compo’na padha dhateng ngala’a jinazana. Jinazana jareya egiba mole, esareyagi e koburanna Mano’ah, eppa’na. Koburan jareya badha e antarana Zora ban Esyta’ol. Simson mimpin oreng Isra’il dhu polo taon abidda.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA