Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Tonggo ni si Habakuk, nabi ai,
2 “Ale Jahowa, domma hubogei barita-Mu, gabe gok biar do ahu halani horja-Mu ai. Pabayu Ham ma ai bani partongahan ni tahun, bani partongahan ni tahun ma tongon pabotohkon Ham ai; ingat Ham ma maridop ni uhur, age ibagas ringis.
3 Roh do Naibata hun Teman, anjaha Na Mapansing sahalian ai hun Dolog Paran (Sela). Irungkub hamuliaon-Ni do langit, anjaha gok tanoh on puji-pujian-Ni.
4 Parsinalsal-Ni songon sinalsal ni mata ni ari do, sondang luar hun lambung-Ni; ai do ibahen panrungkub ni hasangapon-Ni.
5 Mardalan do sampar i lobei-Ni, anjaha irik do i pudi-Ni mangihut bunrung.
6 Jongjong ma Ia anjaha ibahen ma dugur tanoh on; mangkawah ma Ia inggot, gabe ibahen ma mangkalumpat bangsa halani hirjatni; masarsar ma dolog-dolog na jonam hinan anjaha marongrong buntu-buntu sisadokah-dokahni. Dalan humbani nabasaia Ia do simadasi.
7 Huidah do lampolampo ni Kusan hona tipa, anjaha dugur-dugur tirei ni lampolampo ni tanoh Midian.
8 Ai dompak bah banggal, dompak bah banggal do Ham manringis, ale Jahowa, barang dompak laut do Ham manggila, ase ipahundul Ham diri-Mu bani huda-Mu, bani gareta hamonangan-Mu?
9 Domma pasang sior-Mu anjaha domma gok lingkit Bamu. Sela. Ibolah Ham do tanoh on, gabe marbanggal ma bah.
10 Ididah dolog-dolog Ham, gabe hitir-hitir ma; bah banggal pe manraja ma; ipabogeihon luhung ni lautan ma sorani anjaha iangkat ma tanganni hu atas.
11 Soh do mata ni ari ampa bulan bani iananni, halani sondang ni lingkit-Mu na tolkas ai, halani mirlak ni lombing-Mu na marlinang-linang ai.
12 Ilangkahi Ham do tanoh on ibagas ringis-Mu, anjaha idogei-dogei Ham do bangsa-bangsa ibagas gila-Mu.
13 Bingkat do Ham laho mangurupi bangsa-Mu, laho mangurupi na mininakan-Mu. Irosaki Ham do tayub humbani rumah ni parjahat, anjaha iparseda Ham do onjolanni das bani batu onjolan partoruh. Sela.
14 Itolpus Ham do marhitei panah-Mu ulu ni pambobaini, na roh songon halisungsung laho mangerap ahu, na marolob-olob songon halak na laho mangankon na masombuh bani na ponop.
15 Ibontas Ham do laut ai marhitei huda-Mu, margilumbang ma laut na bolag.
16 Dob hubogei ai, gabe hitir ma angkulangku, bibirhu pe hitir do halani sora ai; masuk do na masik hubagas holiholingku, anjaha rebad-rebad panlangkahku. Sip ma ahu paima-imahon ari hasunsahan, na sihol roh bani bangsa na manosak hanami.
17 Age pe seng marbunga ijai hayu ara, anjaha seng marbuah hayu anggur, lambang ia hayu jetun anjaha seng mambere gogoh age juma, rasei biribiri humbani iananni, anjaha seng dong be lombu ibagas harang,
18 age sonai, marolob-olob do ahu ibagas Jahowa, anjaha malas do uhurhu ibagas Naibata ni haluahonku.
19 Naibata Jahowa do hagogohon bangku, ibahen do naheihu usih songon nahei ni ursa; Ia do manogu ahu manlangkah bani ianan na gijang.” (Bani sibobahon koor, marhasoman parugas).
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA