Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Iaminne pappala’ doanna Habakuk:
2 O Batara, kulangngereki passala’ panggaukanTa, na napirassi pa’maikku eroka mappakalompo. Poro Kipaollei anjo panggaukang malompoTa na Kipa’nyata ri anne jammanna ikambe. Poro Kikamaseangi ikambe manna pole nabambang nyawaTa.
3 IKatte Allata’ala Kaminang Matangkasa’ battu ri Téman, iKatte battu ri pa’monconganna Paran. Langika nikalimbuki ri kalompoanTa; buttaya rassi siagang pammuji mae ri Katte.
4 BattuKi’ lalang caya malompoTa, battu ri limanTa assulu’ singara’ lompoa, anjoremmi Kicokko koasaTa.
5 Kisuroi garringa a’jappa ri dallekanTa nakamateanga amminawang ri bokoTa.
6 Punna ammantangKi’, amme’bereki buttaya; punna anjanjangKi’, gegereki bansaya napakamma malla’. Moncong-moncong salloa reppe’-reppe’ kabusuki; bulu’-bulu’ salloa a’jari lappara’ todong, anjoremmi anjo ri bulu’-buluka Kioloa a’jappa baku’ riolo dudu.
7 Kuciniki ra’ya’ Kusyan nibattui ri malla’, siagang tu Midian annekkere’.
8 O Batara, maka lanri tamparang kutadeng na nai’ larroTa? Maka binanga-binangaya ampakanassuKi’? Kibaei rammanga a’jari jarang siagang kareta bundu’, ri wattu Kisarena pammetang ummatTa.
9 Kipasadiai anrong panaTa, sadiami panaTa untu’ nilappassang. Nampa Kipue buttaya a’jari binanga-binanga.
10 Punna nacinikKi’, ta’goccangi moncong-monconga naturung bosia battu ri langi’ rapang nitumpa. Ammarrungi sa’ranna je’neka irawa ri buttaya, ta’gulung-gulung bombanga rapang a’jallo’.
11 Cayana panaTa ta’buccu’ sarring, pokeTa accilla’-cilla’ nicini’, nammarimo alloa siagang bulanga ri tampa’na.
12 Lalang larroTa naKijappai sikontu buttaya; bambang nyawaTa angngonjo’-onjokangi bansa-bansaya.
13 A’dakkaKi’ maju untu’ allappassangi ummatTa siagang untu’ ampasalamaki karaeng nipileTa. Kitunrung sa’genna tu’guru’ pamimpinna tau dorakaya, Kibarrasa’ sa’genna la’busu’ sikontu tau amminawanga ri ia.
14 Pana-panaTa natarrusuki pamimpinna pasukang balia ri wattu battuna tantarana kamma anging lompo kassa’na, sollanna nipatassimbung-simbung ikambe. Sannang nyawana ke’nanga ammakkala’ kamma tau a’mere’-merekia anjallakkangi tau kakuranganga.
15 Kionjo’-onjokangi tamparang lompoa siagang jaranTa na’jari kebo’mo a’busa tamparanga.
16 Kulangngere’na anjo kammaya, annekkere’mi atingku siagang amme’bere’mi muncengku. A’jari lammama’ tena kagassingangku, kemae-kemae jappaku tatto’roi bangkengku. Sannanga’ lattayang kabattuanna hukkunganNa Allata’ala mae ri tau battua a’bakka.
17 Manna pole tena rapponna poko’ araya na poko’ anggoroka tena anggoro’na, manna pole tena wassele’na poko’ zaitunga, nappakala’ba’ pa’mai’ wassele’ gandunga ri kokoa, manna pole namate kabusu’ gimbalaka natena bonena bara olo’-oloka,
18 tuli larannuna pa’maikku, nasaba’ iKatte Karaeng Allata’ala mappasalamakku.
19 Kisarea’ kagassingang rapang bangkeng jonga Kikassaki bangkengku. Kirurunganga’ sollangku amang ri wattu a’jappaku ri pa’monconganga.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA