Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Enda me pertoton Nabi Habakuk:
2 O TUHAN, nggo kubegi kai si nggo IbahanNdu, emaka mbiar kal aku. Genduari lakoken dingen cidahken lah i bas tahun-tahun kegeluhen kami, perbahanen si mbelin bagi si nggo IlakokenNdu mbarenda. Aminna nembeh pe AteNdu, mekuahlah min AteNdu kempak kami.
3 Dibata reh mulihi i Edom nari, Dibata si Badia reh i bas uruk-uruk i Paran nari. KiniulinNa nutupi langit kerina, doni dem alu pujin man BaNa.
4 TerangNa bali ras kilap mesilo terang erkinar-kinar i bas TanNa nari, i bas terang KuasaNa terbuni.
5 Arah LebeNa erdalan penakit laya-laya, arah PudiNa ngarak-ngarak kematen.
6 Adi ngadi Ia erdalan, doni mugur-ugur, ItulihkenNa saja, bangsa-bangsa nggirgir. Deleng-deleng si nggo lit nai-nai nari pecah, uruk-uruk si paguh gedap ku teruh; InganNa erdalan nuria nari.
7 Kuidah bangsa Kusan mbiar, bangsa Midian nggirgir
8 Lau belin kin si mahanca AteNdu nembeh TUHAN? Lawit kin si mahanca gara AteNdu, seh maka iersakndu KudaNdu, ras gereta perang KemenangenNdu?
9 Kam nggo sikap make PanahNdu sikap manahken anak PanahNdu. PerkasNdu mahanca doni beka.
10 Tupung deleng-deleng ngidah Kam, nggirgir ia; lau mambur i langit nari. Lau si i teruh doni ergeruhguh, galumbang mbelin ergalun-galun.
11 Matawari ras bulan la miser ibahan anak panahndu si kabang erbinar ibahan sinalsal LembingNdu si erndilap.
12 Alu pusuh gara IsiarNdu doni enda; alu pernembeh AteNdu IperjakiNdu bangsa-bangsa.
13 Berkat Kam engkelini BangsaNdu engkelini raja PilihenNdu. IdumpangNdu peminpin kalak jahat pengikut-pengikutna IkernepkenNdu seh keri.
14 Anak PanahNdu nelpusken takal puanglima tupung ia reh desken banjir lako engkernepken kami, si ermeriah ukur desken kalak si nggo nelen kalak musil erbuni-buni.
15 Lawit IperjakiNdu alu KudaNdu, emaka lau si mbelang rugup-ugup.
16 Nggo kubegi si e kerina, emaka nggirgir aku; biberku pe nggirgir ban biarku. Tulan-tulanku tempa-tempa medate, nahengku siantuken i teruh. Alu teneng kutimai paksa si reh i ja iukum Dibata kalak si reh nerang kita.
17 Aminna pe batang ara la erbunga batang anggur la lit buahna, aminna pe batang saitun la lit asilna, perjuma la rulih gia, aminna pe biri-biri mate kerina, dingen nggo keri lembu i bas karangna,
18 tetap nge aku ermeriah ukur i bas TUHAN erkiteken Dibata kap si ngkelini aku.
19 TUHAN kap si mereken gegeh man bangku desken nahe belkih, paguh IbahanNa perdalanku; emaka la celus nahengku aminna erdalan pe aku i deleng-deleng si meganjang.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA