Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 “Bani manara parjagaanku do ahu sihol jongjong, bani tembok ai hupajongjong bangku, laho mangidah atap aha na sihol hatahonon-Ni bangku, anjaha aha balos-Ni pasal adu-aduankai.”
2 Jadi nini Jahowa ma mambalosi ahu, “Suratkon ma pangungkabon on, anjaha uhirhon ai torang-torang bani batu panuratan, ase boi ai basaon ni halak age sanggah montas.
3 Ai mangonai panorang na sihol roh ope pangungkabon ai; tapi mangolos ma ai mangayaki ujungni, anjaha seng marladung ai. Porini pe hunlambat, paima-ima ma ai, ai maningon roh do ai; seng tumaram lang saud.
4 Tonggor ma, halak na so pintor uhurni ibagas, sai na hurleh do, tapi halak parpintor, manggoluh do halani haporsayaonni.
5 Jaga ma pangapasi sipangosei-osei, halak na jungkat maruhur, na so ongga marnasungkup, na pangangangkon tolonanni songon nagori toruh, na so ra bosur songon hamatean, na patumpuhon sagala bangsa bani anjaha na pasadahon sagala marga bani.
6 Ai lang parumpamahonon ni sidea ma ia, doding-dodingkononni salig-salig bani anjaha hatahononni, ʻMulih ma ia, na patumpuhon bani na so ia simadasi (sadiha dokah nari tumaran?), anjaha na pajunjun bani dirini buei utang!ʼ
7 Ai lang sompong ma tumaram jongjong sidea na maridou bam, anjaha hehe sidea sihol mangarsik ho, anjaha gabe taban ma ho bani sidea?
8 Halani na dob tinabanmu buei bangsa, gabe tabanon ni bangsa-bangsa na tading ai ma ho, halani sapata ni daroh ni jolma ampa odoh-odoh bani nagori, bani huta-huta ampa na marianan ibagas ai.
9 Magou ma halak na mambuat pansarian na so tiba dalanni hubagas rumahni, sihol mambahen asarni bani na gijang, bahen haluahonni humbani parmaraan!
10 Na manranggihon habadoron do ho bani rumahmu, marhitei na isiapkon ho buei bangsa; na mambahen tonduymu do ai mardousa.
11 Ai dilo-dilo do age batu ibagas tembok ai, anjaha tiang-tiang ni rumah ai pe mambalosi do.
12 Magou ma halak na paulihon huta marhitei daroh, anjaha na pajonamkon benteng marhitei hagedukon.
13 Tonggor ma, ai lang marharorohan humbani Jahowa do ai? Marhangaluton pe bangsa-bangsa bahen panganon ni apuy do, anjaha ilojai bangsa-bangsa pe dirini, laho mangkopkop na lang do!
14 Ai maningon gokan do tanoh on bani parbinotohan pasal hasangapon ni Jahowa, songon bah na manrungkub dasor ni laut.
15 Magou ma halak na painumkon hasomanni humbani panginuman ni ringisni, anjaha na pamabukkonsi laho mangidah hatalanjangonni.
16 Ho pe maningon pabosuron ma bani habadoron gantih ni hasangapon. Ho pe minum ma ase rebad-rebad ho. Bam ma nuan roh panginuman na bani tangan siamun ni Jahowa, anjaha habadoron ma sogop bani hasangaponmu.
17 Hajahaton na binahenmu hubani Libanon maningon rungkubonni do ho, anjaha pansedai ni binatang mangkirjati ho, halani sapata ni daroh ampa hajahaton na bani nagori ai, bani huta-huta ampa na marianan ibagas ai.
18 Ai aha ma guna ni gana-gana na pinaulini ai, gana-gana na tinuang ampa sipartondung sipangoto-otoi, ase marhatengeran hujai tukang ai, anjaha itukangi sisombahon na longah?
19 Magou ma halak na mangkatahon bani hayu, “Puho ma”! Ampa bani sada batu na longah, “Jongjong ma”! Boi ma ai mambere pangungkabon? Tonggor ma, ilampis do ai bani omas ampa pirak, tapi otik pe seng dong hosah ibagas.
20 Tapi ibagas rumah hapansingon-Ni do Jahowa, sip ma ganup tanoh on i lobei-Ni.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA