Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sengko’ nae’a ka manara tang panjaga’an, anante’a apa ba’nengan se edhabuwagiya PANGERAN ka sengko’, ban baramma dhabuna saellana meyarsa tang serro.

² PANGERAN adhabu ka sengko’ kantha reya, "Mara oker paterrang e papan lempong, apa se enyata’agiya Sengko’ ka ba’na, me’ olle gampang ebaca.

³ Cathet jareya, sabab sateya gi’ banne baktona. Tape sa’at jareya tanto duli napa’, ban apa se enyata’agi Sengko’ tanto kalakon. Maske katonna gi’ abit, tape nante’ bai! Sa’at jareya masthe napa’ ban ta’ epanyoroda pole.

⁴ Ban kaenga’e: Oreng se jahat ta’ kera salamet, tape oreng se ajalannagi kasokanna Allah bakal odhi’a polana kaestowanna ka Allah."

⁵ Kasogiyan reya salanjangnga co-ngoco oreng. Oreng se dhakka reya angko ban ngalengsang. Padha ban maot, oreng jareya arassa korang malolo; sa-bangsa egilir ekobasae gan settong.

⁶ Tape bi’ reng-oreng se epatellok jareya oreng gella’ bakal emon-semmonana ban eco-kocowa. Reng-oreng jareya bakal ngoca’a kantha reya, "Mandar ba’na ta’ salamedda, sabab ba’na nembuk barang se banne andhi’na! Gi’ saapa pole abidda ba’na masogiya aba’na kalaban maksa reng-oreng se andhi’ otang ka ba’na sopaja majar otangnga?"

⁷ Tape ba’na ta’ apangrasa, ba’na se la matellok oreng laen, tanto aotanga keya ban bakal epaksa’a majar budhu’na. So-mosona ba’na bakal dhatengnga sampe’ ba’na katako’an. Dhi’-andhi’na ba’na bakal erampoga bi’ so-mosona jareya.

⁸ La bannya’ sa-bangsa se erampok bi’ ba’na, tape ba’na bakal erampoga keya bi’ sa-bangsa se salamet dhari ba’na, polana ba’na la mate’e oreng, ban polana kakejjemmanna ba’na ka ra-nagara, tha-kottha ban pandhudhu’na.

⁹ Mandar ba’na ta’ salamedda! Ba’na masogi balana bi’ kaontongan se ekaolle kalaban jalan se kejjem, sopaja bengkona ba’na dibi’ aman ban lopot dhari kasossa’an sarta balai.

¹⁰ Tape sajjana ba’na jareya pera’ matodhusan balana ba’na dibi’. Kalaban arampok sa-bangsa sabannya’na, ba’na marogi aba’na dibi’.

¹¹ La’-mala’ to-bato e geddhung ra’-era’an abasto ba’na, ban ga-canggana bengko aera’ kantha jareya keya.

¹² Mandar ta’ salamedda ba’na, ya! Ba’na maddek kottha edhasare kajahadan sarta kalaban mate’e reng-oreng.

¹³ Sa-bangsa se epatellok bi’ ba’na tadha’ gunana se alako berra’, ban pa-apa se la epaddek sa-bangsa jareya obus ekello’ apoy. Jareya kabbi kasokanna PANGERAN Se Mahakobasa.

¹⁴ Tape akantha tase’ raja se epossa’e ban aeng, bariya keya bume reya bakal possa’a ban pangataowan parkara PANGERAN ban kobasana.

¹⁵ Mandar ta’ salamedda ba’na, ya! Ba’na ya-nyeya ban matodhus ga-tatanggana; reng-oreng jareya bi’ ba’na epadaddi akantha oreng mabu’ se dhing-tabarindhing.

¹⁶ Sateya la napa’ giliranna ba’na epamalowa oreng, banne ehormadana. Kahormadanna ba’na bakal aoba’a daddi kanespa’an. Bi’ PANGERAN ba’na bakal epaksa’a ngenom dhari piala se aesse okoman kaangguy ba’na. Ba’na bakal ngenoma ban bakal dhing-tabarindhinga.

¹⁷ Ba’na moger ka’-bungka’an e alas Libanon, ban sateya ba’na dibi’ se bakal epogerra. Ba’na mate’e ban-keban e alas jareya, ban sateya ba’na bakal tako’a ka ban-keban jareya. Jareya kabbi bakal kadaddiyana polana ba’na la mate’e reng-oreng sarta ngalakone kakejjemman ka ra-nagara, tha-kottha ban pandhudhu’na.

¹⁸ Mandar ta’ salamedda ba’na, ya! Ba’na ngoca’ ka kaju sakerra’, "Mara jaga!" otabana ka bato se raja, "Mara manjeng!" Ba’ bisa’a arca acaca ka ba’na? Olle daddi arca jareya ekole’e emmas ban salaka, tape tadha’ nyabana. Apa gunana arca brahala? Arca jareya coma gabayanna manossa. Dhari arca jareya se ekaolle ba’na coma kalecegan malolo. Parcoma oreng se agabay brahala jareya parcaja ka barang gabayanna tanangnga dibi’, se ta’ tao acaca jareya.

¹⁹ (2:18)

²⁰ PANGERAN reya badha e dhalem Padalemmanna se socce; mara sakabbinna oreng e bume neng-enneng, ja’ acaca’an e ajunanna.

Habakuk

Video Habakuk 2

Ikuti Kami:

KONTAK | PARTISIPASI | DONASI