Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Le’baki anjo nakio’mi Ishak anjo Yakub, nampa nabarakkaki na nakana, "Teako a’buntingi siagang tulolo bansa Kanaan.
2 A’lampako mange ri Mesopotamia, ri bijanna Betuel, toanu, nampa a’bunting mako siagang kalase’renna ana’na purinannu Laban.
3 Poro Allata’ala Kaminang Koasaya ambarakkaki pa’buntingannu siagang nasareko jai ana’-cucu, sa’gennu a’jari boena jaia bansa!
4 Poro Nabarakkakiko Batara siagang turungannu, sangkamma le’ba’na Nabarakkaki Abraham. Kammayatompa poro nukammai anne butta nupammantangngia, le’baka Napassareang Allata’ala mae ri Abraham!"
5 Kammaminjo nanalappassammo Ishak anjo Yakub a’lampa mange ri Mesopotamia, mange ri Laban, ana’na Betuel anjo tu Aram. Anjo Laban iamintu daenna Ribka, amma’na Yakub siagang Esau.
6 Nalangngere’mi Esau angkanaya le’ba’mi nabarakkaki Ishak anjo Yakub siagang nalappassammi a’lampa mange ri Mesopotamia untu’ a’boya baine anjoreng. Kammayatompa naassemmi angkanaya ri wattunna nabarakkaki Ishak anjo Yakub, napisangkaimi Yakub a’bunting siagang tulolo bansa Kanaan.
7 Pantaranganna anjo naasseng tommi angkanaya naturuki Yakub kananna manggena siagang amma’na, siagang a’lampami mange ri Mesopotamia.
8 Jari napahammi Esau, angkanaya anjo Ishak manggena, tanangaiyai tubaine Kanaan;
9 lanri kammana a’lampami Esau mange ri Ismael, ana’na Abraham, nampa a’bunting siagang ana’na Ismael niarenga Mahalat, andi’na Nebayot.
10 Nabokoimi Yakub Bersyeba nampa a’lampa mange ri Haran.
11 Ri wattu labunamo alloa anrapi’mi ri se’reang tampa’, nampa a’bangngi anjoreng. Anra’bami ero’ attinro, nania’mo batu napare’ pa’lungang.
12 Nampa asso’namo lalang tinrona. Nia’ nacini’ tuka’ ammenteng ri buttaya nampa cappa’na ta’rapiki ri langika. Siagang nia’mo malaeka’ nai’-naung ri anjo tukaka.
13 Na ri sa’rinna ammentemmi Batara siagang Nakana, "INakkemi Batara, Allata’ala napakalompoa Abraham siagang Ishak. LaKupassareangi mae ri kau siagang mae ri turungannu anne butta nupanra’baia.
14 Turungannu lasangkammai limbu’buka ri lino jaina. Lanapakaluaraki daerana ke’nanga mange ri kere-kere mae. Siagang tete ri kau siagang turungannu nalaKubarakkaki sikontu bansaya ri lino.
15 U’rangi, angkanaya laKutulungko siagang laKujagaiko, manna kemae lampanu. Kammayatompa laKururungangko ammotere’ mae anrinni ri anne pa’rasanganga. Tena nalaKubokoiko sa’genna le’ba’ ngaseng Kugaukang apa le’baka Kupa’janjiang mae ri kau."
16 Ambangummi Yakub battu ri tinrona nampa nakana, "Niaki Batara anrinni, ri tampaka. Mingka nampami kuasseng kamma-kamma anne."
17 A’jari malla’mi siagang nakanamo, "Teai sipato’ karrasa’na anne tampaka! Ma’nassa Balla’Na Allata’ala anne, pakke’bu’ lompona suruga."
18 Ammukona bari’basa’, ammentemmi Yakub, nampa naalle anjo batu napareka pa’lungang. Napaentemmi anjo batua a’jari batu pangngu’rangi. Natirikimi minynya’ zaitun mabau’ irateanna anjo batua untu’ KalenNa Allata’ala.
19 Naaremmi anjo tampaka Betel. (Riolo arenna Lus.)
20 Nampa assumpamo Yakub angkana, "Punna Natulunga’ siagang Najagaia’ Batara lalang ri anne pa’lampangku, siagang Nasarea’ kanre siagang pakeang,
21 sa’gengku akkulle ammotere’ mange ri balla’na manggeku siagang salama’, Batarami la’jari Allata’alaku.
22 Nampa lakupassareang mae ri Batara bage sampulona sikontu apa Napassareanga Batara mae ri nakke. Anne batu pangngu’rangi kupaentenga la’jari tampa’ panynyombang mange ri Batara."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA