Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ilebuh Isak anakna Jakup, ikatakenna mejuah-juah man bana, jenari nina, "Ula kal iempoindu beru Kanaan enda.
2 To lah ku Mesopotami, ku rumah nini bulangndu Betuil. I jah me kam empo, buat sada anak mamandu Laban.
3 Dibata si Mada Kuasa lah si masu-masu perjabunndu, ras mereken man bandu nterem anak, gelah kam jadi nini nterem bangsa!
4 Ialah si masu-masu kam ras kesusurenndu alu pasu-pasu si nggo IberekenNa man Abraham. Janah man bandulah pagi taneh si inganindu genduari enda, si nggo ibereken Dibata man Abraham!"
5 Emaka isuruh Isak si Jakup lawes ku Mesopotami ndahi Laban, anak Betuil, kalak Aram e, turang Ribka. Ribka eme nande Jakup ras Esau.
6 Nggo ieteh si Esau maka nggo ipasu-pasu Isak si Jakup, janah isuruhna pe ia ku Mesopotami erjabu. Itehna kang maka asum ipasu-pasu Isak si Jakup, isuruhna maka ula iempoi Jakup diberu kalak Kanaan.
7 Ietehna pe maka Jakup nggo ngikutken kata nandena ras bapana, janah nggo ia lawes ku Mesopotami.
8 Dage ngerti nge Esau maka bapana Isak, la kal atena ngena diberu bangsa Kanaan.
9 Erkiteken si e lawes Esau ndahi Ismael anak Abraham, jenari iempoina si Mahalat, turang Nebayot, anak Ismael.
10 Itadingken Jakup Berseba, jenari berkat ia kempak Haran.
11 Nandangi sundut matawari seh ia i bas sada ingan, emaka i je ia erberngi. Medem ia, janah ibantalkenna sada batu.
12 Ernipi ia maka iidahna sada redan pajek i babo doni, ujungna seh ku langit; ku teruh ku das i je malekat.
13 Tedis TUHAN i deherna nina, "Aku kap TUHAN, Dibata Abraham ras Isak. Man bandu ras man kesusurenndu Kubereken taneh inganndu medem enda.
14 Kesusurenndu bali pagi ras abu taneh teremna. Ipebelangna daerahna kempak apai pe. Arah kam ras kesusurenndu kerina bangsa i doni enda ndat pasu-pasu i bas aku nari.
15 Inget lah, Aku ras kam dingen ngkawali kam ku japa pe kam lawes, janah Aku ka pagi mbaba kam mulih ku taneh enda. La Kutadingken kam seh nggo dung Kulakoken kerina si Kukataken bandu e."
16 Medak me Jakup, jenari nina, "I jenda kepe TUHAN; ndai la kuteh maka Ia i jenda!"
17 Mbiar ia nina, "Kebiaren kap ingan enda! Ugapa pe rumah Dibata nge enda; ugapa pe ingan enda pintun si talang kempak surga."
18 Lampas erpagi-pagi keke Jakup, ibuatna batu si ibantalkenna ndai, ipajekkenna jadi sada tanda peringet-ingeten. Iamburkenna minak saitun ku batu e tandana nggo ipersembahkenna man Dibata.
19 Ibahanna gelar ingan e Betel. (Ope si e kota enda igelari kalak, Lus.)
20 Kenca bage ersumpah Jakup man TUHAN, "Adi itemani Dibata aku janah adi IkawaliNa aku i bas perdalanenku, janah adi IberekenNa bangku uis ras pangan,
21 adi selamat aku mulih ku rumah bapangku, emaka TUHAN me jadi Dibatangku.
22 Batu peringet-ingeten si nggo kupajekken enda pagi jadi ingan ersembah man Dibata, janah kubereken pagi sepersepuluh i bas kasa kai si IberekenNdu bangku."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA