Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Laguq perlu tiang tegesang: Sengonẽq ahli waris masih kodẽq, araq dengan saq ngawasin ie dait ngurus kepentingan-kepentinganne jangke ie cukup umurne, maraq saq sampun tetentuang siq bapaqne. Ie teperlakuang pade maraq sopoq hambe, timaq setetune ie ẽpẽn dowẽ selapuq kesugihan nike.

² (4:1)

³ Maraq nike ẽndah halne ite: Sengonẽq ite ndẽqman dẽwase, ite tejariang panjak siq roh-roh saq nguasein dunie niki.

⁴ Laguq lẽq waktu saq tepat, Allah ngutus Bije-Ne ojok dunie. Ie tebijeang siq sopoq dengan nine dait idup lẽq bawaq kekuasean Hukum Taurat.

⁵ Siq care nike Ie nebus dengan-dengan saq idup lẽq bawaq kekuasean Hukum Taurat; adẽq ite ẽndah bedowẽ hak jari bije-bije dowẽn Allah.

⁶ Keranaq side pade bije-bije dowẽn Allah, Allah mrẽntahang Roh Bije-Ne tame ojok dalem atẽnde dait atẽn tiang, nike Roh saq bemanik, "Bapa, ya Bapa."

⁷ Jari, side pade ndẽqne malik hambe, laguq bije. Dait lantaran side pade bije dowẽn Allah, make side ẽndah jari ahli-ahli waris lantaran Allah.

⁸ Laẽq side pade ndẽq kenal Allah, keranaq nike side pade jariang diriqde hambe lẽman kuase-kuase saq setetune ndẽqne Allah.

⁹ Laguq mangkin side pade kenal Allah, atao tepatne malik Allah kenal side pade. Nah, kembẽq side pade mẽlẽ tulak malik tipaq roh-roh dunie saq lemah dait miskin? Kembẽq side pade mẽlẽ tejariang panjak siq roh-roh nike?

¹⁰ Side pade taat lẽq jelo-jelo saq husus, bulan-bulan saq husus, dait taun-taun saq husus.

¹¹ Tiang kuatir, ndaq-ndaq usahe tiang lẽq side pade jari sie-sie doang.

¹² Semeton senamian! Sanget siq tiang tunas lẽq side pade adẽq side pade jari maraq tiang. Sẽngaq tiang ẽndah sampun jari maraq side pade. Side pade ndẽq uwah miaq kesalaqan lẽq tiang.

¹³ Side pade pasti masih inget napi saq jari penyebap lẽq penembẽqne tiang beriteang Kabar Solah nike lẽq side. Nike lantaran tiang sakit.

¹⁴ Lẽq waktu nike side pade ndẽq merase kenjering lẽq tiang, timaq keadaan awak tiang jari cobe belẽq umaq side pade. Malahan side pade nerimaq tiang maraq nerimaq malaẽkat Allah atao maraq nerimaq Deside Isa Almasih mẽsaq.

¹⁵ Side pade bahagie gati waktu nike. Laguq mangkin, lẽq mbẽ kebahagiean nike? Tiang nenaoq bahwe lẽq waktu nike side pade rẽde congkẽl penentengde mẽsaq jari bẽng tiang, lamun nike bau telaksaneang.

¹⁶ Napi mangkin side pade sampun anggep tiang musuh, lantaran tiang nyatayang saq kenaq tipaq side?

¹⁷ Dengan-dengan saq lain nike semanget gati boyaq side pade, laguq maksut-maksut ie pade lengẽ. Ie pade cume mẽlẽ kelin side pade lẽman tiang, adẽq side pade besemanget turut ie pade.

¹⁸ Mule bagus besemanget lẽq hal-hal saq solah, asal tetep maraq nike, dait ndaq cume lamun tiang araq bareng kance side pade.

¹⁹ Bije-bije tiang saq tiang kasihin! Mangkin tiang niki menderite malik lantaran side pade. Tiang menderite maraq sopoq inaq saq menderite sewaktu nganak. Tiang gen tetep menderite, lamun sipat-sipat Almasih ndẽqman tetu-tetu araq lẽq dalem diriqde!

²⁰ Tiang melẽt gati araq lẽq tengaq-tengaq side pade mangkin, adẽq tiang bau ngeraos kance side siq care saq lain, sẽngaq tiang ndẽq nenaoq malik mẽlẽ piaq napi lẽq side pade!

²¹ Semeton-semeton saq mẽlẽ idup lẽq bawaq kekuasean Hukum-hukum Taurat, cobaq dengahang tiang! Tiang gen badaq side napi saq setetune tetulis lẽq dalem kitab Hukum Taurat.

²² Lẽq derike tetulis bahwe Ibrahim bedowẽ due bije: Inaq lẽman bije saq sopoq nike sopoq hambe, dait inaq lẽman bije saq lain nike sopoq dengan saq merdẽke.

²³ Bije lẽman dengan nine saq jari hambe tebijeang biase lantaran kemẽlẽq manusie. Laguq bije lẽman nine saq merdẽke, tebijeang sẽngaq tejanjiqang siq Allah.

²⁴ Niki bau tekadu jari perumpamean. Due dengan nine nike ibarat due perjanjian: Saq sopoq asalne lẽman Gunung Sinai -- nike Hagar; bije-bijene tebijeang sebagẽ hambe.

²⁵ Jari, Hagar nike Gunung Sinai, lẽq negeri Arab. Ie jari lambang kote Yerusalem saq araq mangkin, sẽngaq ie idup sebagẽ hambe bareng kance bije-bijene.

²⁶ Laguq Yerusalem saq lẽq sorge nike dengan nine saq merdẽke, dait ie saq jari inaqte.

²⁷ Sẽngaq lẽq dalem Kitab Suci tetulis, "Pade gembire side hai dengan nine saq bangkol, saq ndẽq uwah nganak! Pade besukecite dait besurak-surakan hai side saq ndẽq uwah idap sakitne nganak! Sẽngaq dengan nine saq tebilin siq semamene gen mauq bije luwẽqan tebanding dengan nine saq idup bareng kance semamene."

²⁸ Semeton senamian! Pade maraq Ishak, side pade bije-bije lẽman janji Allah.

²⁹ Lẽq waktu nike bije saq tebijeang menurut kemẽlẽq manusie, nganiaye bije saq tebijeang lantaran pekayunan Roh Allah. Maraq nike ẽndah mangkin.

³⁰ Laguq napi saq tetulis lẽq dalem Kitab Suci? Lẽq derike tetulis maraq niki: "Sediq hambe nine nike bareng kance bijene, sẽngaq bije lẽman hambe nine nike ndẽqne gen jari ahli waris bareng kance bije lẽman dengan nine saq merdẽke nike."

³¹ Jari, semeton-semeton, ite niki ndẽqne bije-bije lẽman sopoq hambe nine; ite niki bije-bije lẽman dengan nine saq merdẽke.

Galatia

Video Galatia 4

Ikuti Kami:

KONTAK | PARTISIPASI | DONASI