¹ Zen in zep, aya-wal oso-wal, zen kirekam em Bian Yesussu de taibliblannak tatem ezaun. Em ano kwasang gwibirida gwen wenya– men desae sap hlauludan hap embwan gwibirida gwenanke. Em in zen tangan ano isrip-sri gwibiridan wenyaye.
² Yudia ne Sintike ne, ee ama emsa titi soꞌan: Aha-ere enlalakam emki en, sap em apdekam mese Kristus hun eraha-en gweka.
³ Hen Sizigus Bak, em eiwa ano syal bose dawem. Emki we darena insa mas gwizimdin– zen dekakim enlalasa aha-en lak. Sap ee kime iwe syal gwe-gwek, zen ano tahasa ap tri koso gweblak– dekam de Yesus hup de ol dawemsa golluwe gwen hap. Zen Klemen Bak Swe mae han apdekam ano tahasa ap tri noso gweblak. Ëe ama taibliꞌan: Zeno mae mo bosem-sena mes ngatan zi mo langnak hendep de engaya gwen hap de wenyik mo bosemse nabare bukunak ale dabik.
⁴ Em dwan Bian mo bi gwibiridan nakake. Zen in zep em eisrip-sri gwe tine gwen. Etan emsa gubiridaꞌan: Em eisrip-sri gwe tine gwen.
⁵ Dikire tingan emsa anakan hla nulida gwek, “Zeno mae mo enhona sae-sae tanganna. Jakal-jakala tawa naka hom.” Zen kirekam em lowehe gwen, sap Bian Yesus man angkam hatan hap golek de gweꞌara.
⁶ Bahem banakare mae hap engalap gwe-gwen. Diki Alap hap em tingan anakan kira gul gweblan, “Ëe ama tol kire hap tahalha gweꞌan,” ahaksa, “Ëe kire kareksae goltowenan.” Hen deban dawemsa em golbla tine gwen.
⁷ Nen de kirekam Alap hap kitak yaing gil gweblankam, Zen dekam sa anakan dikim tame gul gwen hap de enlalana nebe mae hap ing ta sone gwizimdi, “Nen an eiwa zere mo taha terenake lowehe gwenan.” Mensa Alap kirekam ing ta sone gwizimnira, zini desa toton bejen tame gun– Kristus hun de zeraha-en gwen sremkamye.
⁸ Zep aya-wal oso-wal, aumwa hap ee ama emsa gubiridaꞌan: Emki ere mae mo enhonak anakare enlala dawem ensa ing ta sone gwen: Eiwa de enlala, kwasang-kwasang enlala, dam-dam enkam de gwen hap de enlala, enho kles gwesin sremkam de gwen hap de enlala, sae-saekam de lowehe gwen hap de enlala, hen Alap en hon dikim tal gwesin hip de enlalasa.
⁹ Mensa ee emsa tawa ta gwibik hen ayang gul gwizimk, sap olkam ahaksa enaka de ebe mae hap erak tazimdinkim, zen kire enkam lowehe gwek. Dekam Alap, men Zen zere mo tahana nep deisu guzimꞌira, Zen sa emsa golelowehe gwera.
¹⁰ Eno mae mo zi lup gul sonenna kim yaing gwezak, ee ama dekam Biansa dawemkam isrip-sri gweblak. Sap ee holokame dwam gwe-gwek– dekam de ebon mae onakore olsa sane gwen hapye. Hendep em kime ner hom asa mas eblak, ee dekam zebe hen emsa anakan tawa gwibiridak, “Zen nama asa kwasang ne gweblanan.” Em home sap asa de kwasang gweblanna olzausuk. Hwena ee an langanake gwe gwenan, zebe eno mae mo abe hap de kwasangna insa tawa gwibir srem gwe-gwek.
¹¹ Hwena ee home anakan eisbik, “Zen mes asa da dasik.” Sap ano enlalana mes tangan hohle gweka– sap banakare tahalha mae naban de gwen, hwena dekam sowe henkam de gwen makane eis gwibirin.
¹² Zep ee sap de tahalha naban gwen, hen sap tahalha sremkamye, ee hwena sowe henkam de gwen makane eis gwibirin. Zep ee mese tangan dam gulsuk– mensa zini serkam dei gwibirinye! Zen in zep sap banakare maesa de goltowen nakon, sap itri naban de sowe henkam gwenna, sap hen usak naban de tahalhakam gwenna, ee nama asa sowehen enkam de gwe gwen makan eis gwibir.
¹³ Sap banakare maesa de goltowe gwenkam ee nama asa isrip-sri naban gwe gwer, sap Kristus man abe hap sosonna insa gol gweblanda.
¹⁴ Hwena sap kirekam, em ema tangan esam gwesik– ano tahalhana insa de ap sul soneblankamye.
¹⁵ Hen Pilipik de zini, ena tawana: Ëe kime ese tak ere mae mo langna Makedoniasa hli yuk– ol dawemsa dekon etan aha lang san gol haladan hap, dekam em ene ano tahalhana ap su kul sone gweblak. Hen zini kim ano ol toran nakon Yesussu daibli gweblak, dekam hen em ene ano isrip-srina eis gwibik.
¹⁶ Hen Tesalonikak kime tahalhakam gwe gwek, zewe hen-henkame ano tahalhana ap su kul sone gweblak.
¹⁷ Hwena bahem asa kil tin, “An sawe olsa ki asa gu sonebiridaka.” Bejene. Diki ee ama tangan dwam gweꞌan– em dikim anakan etawa gwen hap, “Alap sa abe mae hap dawemna mam gulsuzimdi, sap ee ama Paulussu mas e gweblak.”
¹⁸ Eno mae mo asa de mas gwe-gweblanna mes tangan sowehek. Zep in syake. Ëe angkam dawem enkame gwe gweꞌan, sap Epafroditus Bak mes eno mae mo abe hap de gol soneblanna golhata zaka. Eno mae mo asa de mas gwe-gweblanna in man Alap hon nwe-mase gwe-gwenan– san de otweransa de zebe hap tru tasikse gweblanna kiye. Alap man tangan sam gwesik gwibiꞌira.
¹⁹ Zep tingare eno mae mo tahalhana sa hen nere mae mo Bian Alap Kristus onakore serkam de kae-kaekam sul sone gwizimdi.
²⁰ Dikire hendep denaban Bian Alap mo bosena teip nulsublunda gwek! In eiwa tangan.
²¹ Dawem! Ano dawem gol sonenna an amki hen tingare Kristus hun de zeraha-en gwen wenya enbiridak. Eno mae mo eKristen gwen wal bose wal om men zen aban mae lowe heꞌan, zen hen dawem ensa ebe mae hap nol sonezimk.
²² Hen tingare ahakore Romak de Kristus hun de zeraha-en gwen wenya kirekam hen dawem ensa ebe mae hap nol sonezimk– nonol tangan men zen Roma mo teipsin tangan zi mo golak syal ta gwenanke.
²³ Dikire Bian Kristus Yesus mo kwasang-kwasangna eno mae mo enhonak lwa gwek.