¹ Tingare Pilipik de Kristus hun de zeraha-en gwen wenya kip, hen zewe de Kristen zi mo nol-nola kip, hen Kristen zi mo tahasa de tri so gwen wenya kip, Kristus mo nganak de syal en zi darena, Paulus ne Timotius ne onakon:
² Dawem! Nere mae mo Bian Alap ne Bian Kristus Yesus ne sa kwasang-kwasangna mamkam ebe mae hap ol gwizimdi. Hen nen zere nik mo taha terenak esa lowehe gwer.
³ Ëe, Paulus, kime emsa enlala gwibirida gwenan, ee dekam ama Alap hap dawemsa gol gweblanan.
⁴ Hen ee kime kitak ebe mae hap Alapsa abe ta gwenan, dekam isrip-sri nabane gu sone gweblanan.
⁵ Sap em mese ano tahana tri koso gwek– dekam de Alap onakore ol dawemsa gol halada gwen hapye, nonol lone sennak kime ebon mae hatak, hendep angkam namae tri koso gwenan.
⁶ Ëe kime ebon mae onak hatak, Alap Zena dekam zep emsa ese yang tabin makan de li ta sonebinkim kon gwesibirida hanaka. Ëe in zebe anakan taibliblaꞌan: Zen sa etan kire syala eno mae mo enhonak sul sonezim zahera– hendep Yesus mo lwa halzan hap de yaklanak de hataꞌak.
⁷ In airis tangan– ee de kirekam emsa enlala gwibiridan naye. Sap em in ano dang tininak dena. Sap em orep mese ano tahana ap tri koso gweblak, hendep bwinak awe de gwennak namae asa mas e gweblaꞌan. Sap em mese ano syala anakan dam ulsuk, “Zen Alap zere mo kwasang-kwasang nakon wei yul soneblaka– dekam de engaya gwen hap de ol dawemsa golasas gwe-gwen hap denaye.”
⁸ Alap tawana: Ëe ama kitak emsa Kristus onakore kwasang-kwasang nakon enlwan gwibirida gwenan.
⁹ Zep ee a kirekame mo ebe mae hap Alapsa abe ta gwenanye, “Bian, dikire zeno mae mo kwasang-kwasangna mam gwesik song gwek, hen zen diki zen anakan tame gul gwen hen klis gul gwen, ‘Ëe kirekam asa aha zi hip kwasangna oltrei gwizim.’
¹⁰ Zen diki zen ere mo dwam gwibinni anakan klis gul gwen, ‘An dawemna. Hwena an diki zen tangan dawem tangan wenyaye’– dekakim enho lalakkam hen kles gwesin sremkam lowehe gwek, hendep Kristus mo lwa halzan hap de yaklanak de hataꞌak.
¹¹ Sap zen hen mes Tane om Yesus hun neraha-en gwek, zep dikire zebon mae onakon hen dawemna wet so gwek. Desa de kirekam hlauludankam, zen dekam tangan sa tingare zini ere mo bosena teip nulsublunda gwer.”
¹² Aya wal oso wal, ee ama dwam gweꞌan– em dikim abe hap dena ansa etawa gwen hap: Zen sap man edwam gwe-gwenan– ano eksa de ap mat sosublun hap, zep asa karek da gwenan. Hwena zen mes ki Alap mo dwam gwibin sin lwak– Yesus hup de ol dawemna insa dikim etan gollanga gwesik haladan hap.
¹³ Hendep zep tingare Roma mo teipsin zisi de kara ta gwen hap de jana nabare zini hen awe dena kitak mes anakan asa nasalblak, “Zen Kristus hup de jal hap bwinak gweꞌara.”
¹⁴ Sap eiwa, ee bwinake gwe gweꞌan, hwena tateme nama zauk gweꞌan. Zen dekon zep awe de Kristen zini Biansa de taibliblannak mes etan etatete gwek. Hendep zep airin sremkam etan enlala tatete naban Yesus hup de ol dawemkam donbirida gweꞌan.
¹⁵ Sap eiwa kirekam, hwena ahakon enlala lalak naban hom Yesus hup de ol dawemna donbirida gwenan. Zen hwena anakare enlala naban donbirida gwenan, “Paulus de nama bwinak gwenkam, ee asa hwena jematnak awe mam gwer, hen asa zisi beyakam ere osan dep hlilin gwer.” Hwena ahakon hen enho dawem naban donbirida gwenan– kire enlala sremkam.
¹⁶ Zen abe hap de kwasang tola ban donbirida gwenan. Sap zen mes anakan tame nuk, “Yesus mes Paulussu dam tasiki– dekam de zere hap de ol dawemsa golasas gwe-gwen hapye. In zep tol hendep bwinak gweꞌara.”
¹⁷ Hwena ahakore wenya in, zen aha-ere enlala naban hom Yesus hup de ol dawemna donbirida gwenan. Zen hwena zere mae mo bosesa dikim mam gun hup de enlala naban donbirida gwenan. Zeno mae mo enlalana anakan lwa gwizimnira, “Paulus mo enlala dekakim bwi nakon beya gweblaka, sap ee an angkam ama emam-mam gweꞌan.”
¹⁸ Hwena abe hap bana hom! Sap sa ahakon kire enlala naban Yesus hup dena donbirida gwer. Hwena abe hap men zen tangan bol-zaun gweblaꞌan, diki Kristus hup dena zen langa gwesik haladan. Ëe in zebe isrip-sri naban gwe gwenan. Hen ee asa isrip-sri gwe tine gwer,
¹⁹ sap ee tawana: Em ema abe hap Alapsa abe la gwenan, hen Yesus zere mo Enho nakore sosonkam sa asa mas gwe-gweblala. Zen zep asa jalom ek tihina an kon wet sol.
²⁰ Ëna hen zebe Alap hap enlala zon tasiblin naban anakan dwam gwe-gweꞌan, “Ëe babe karekkam ton gwen. Hendep dekon babe saher gwen– nonol tanganna angkam. Diki asa anakan zen enlala gwe-gweblan, ‘Zen dawemkam Kristussu de taibliblannak tatem zauku, hen zebe hap de ol dawemna udobe naban golasas gwe-gweka.’” Dekam sa tingare zini Kristus mo bosena abon onakon teip nulsublunda gwer– sap ee de nama gwennak, sap hen asa de tan hyanak.
²¹ Sap ee mese ere mo gwenna kitak Kristus en hon blol gwek, hen ee Kristus en habe gwe gweꞌan. Hen ee de tinni airis, sap dekam ee Kristus hun asa aha-erenak e gwer.
²² Hwena ee de nama ngaya nik gwenkam, ee dekam dawem enkam de Kristus mo nganak syal gwe-gwen hap asa alp gwe tine gwer. Zep angkam tin hip denaban ngaya gwen hap denaban ee home kles soꞌan.
²³ Hwena dan-dan in airis. Hwena aena emsa de hli yuludan hap denakae tangan dwam gwe-gwibiꞌin– dekam de Kristus hun apdekam e gwen hap. Sap zen dawem tangan wenya zen.
²⁴ Hwena na-en tangan babe emsa hli yuludan. Sap em namae asa dwam e gweblaꞌan– dekam de emsa mas gwibirida gwen hapye.
²⁵ Sap ee kirekame tame guk, zen in zep asa nama Yesus osan dep dikim titi ta gwibin hip emsa golelowehe gwer– eno mae mo ei nik dekakim bil gwek, hen isrip-sri dekakim taman kini gwek.
²⁶ Kirekam de lwankam, ee de hendep etan ebon mae hata zankam, em esa tangan Kristus mo bosena teip ulsublul.
²⁷ Zep banakare mae de abon lwankam, eno mae mo apdekam de lowehe gwenna, zen diki Kristus hup de ol dawem naban de apde ne gwek. Zep ee de emsa amjanbinkim, ahaksa langa nakon de salbiridankam, dekam sa anakare ola wet so gwer, “Zen nama Yesussu de taibliblannak tatem ezauk gweꞌan, sap zen aha-ere enlalakam lowehe gwenan. Zen hen kitak engaya gwen hap de ol dawemsa de golasas gwennak dowal mo kigi hon de syal ta gwen zi niban eijan makan lowehe gweꞌan.
²⁸ Men zen sap Yesussu de taibliblan hap jalse neibirida gwenan, zen hwena hom desa nairibirida gwenan.” Zen zep, kirekam de em zeno mae mo nwenak lowehe gwenkam, zen dekam sa anakan dam nulsuk gwer, “Alap sa desa en ngaya tabiri. Nen hwena esa juwer.”
²⁹ Sap Alap in kim emsa zere mo kwasang-kwasang nakon kwang guludaka, zen Kristussu de taibliblan en hap hom. Hwena Zen hen dekam de Kristus mo bose hap kareksa goltowe gwen hap emsa kwang guludaka.
³⁰ Zep nen apdekam Kristus mo jana zi makane karekna oltowe gwenan– in kirekame asa kara la gwek, men kime nama emsa golelowehe gwekke. Hen men kirekame ner hom asa asalblak, ee namae kirekam nebe mae hap de jal zi niban goleeija gweꞌan.