Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Jadi dob ibogei munsuh ni halak Juda pakon Benjamin, na dob ipauli halak na mulak hun habuangan ai use sada rumah panumbahan bani Jahowa, Naibata ni Israel,

² roh ma sidea marayak si Serubabel pakon kopala ni mar sasaompung, nini ma dompak sidea, “Hasoman nasiam ma hanami paulihon, ai hanami pe isombah hanami do Naibata nasiam in, usih songon nasiam, anjaha manggalang do hanami tongtong hu Bani olat ni panorang ni si Asar-Hadon, raja ni Assur, na marsuruh hanami tangkog hujon.

³ Tapi nini si Serubabel pakon si Jesua ampa na tading humbani kopala ni halak Israel mar sasaompung ai ma dompak sidea, ʻSeng talup rap nasiam pakon hanami paulihon rumah panumbahan bani Naibata; pitah hanami sandiri do na paulihon bani Jahowa, Naibata ni Israel, songon na pinarentahkon ni Raja Kores, raja ni Persia, bennami.ʼ”

⁴ Jadi jondo ma halak Juda ibahen pangisi ni nagori ai, ipambiar-biari ma sidea paulihon ai,

⁵ anjaha ibere ma sisip bani menteri ni raja, laho mangimbang sidea, manlanglangi sura-sura ni sidea ai, sadokah manggoluh si Kores, raja ni Persia, das ronsi harajaon ni si Darius, raja ni Persia.

⁶ Anjaha dob bangkit raja si Ahasveros, bani mungkah ni harajaonni ai ope, itongos sidea ma surat pangaduan dompak pangisi ni Juda ampa Jerusalem.

⁷ Age sanggah harajaon ni si Artasasta manongos surat do si Bislam, si Mitredat, si Tabeel ampa hasoman ni sidea sahorja hubani si Artasasta, raja ni Persia; tarsurat do surat ai ibagas hata Aram rap pakon alimanni.

⁸ Hata Aramni: Si Rehum, wali negara ai pakon si Simsai, jurutulis ai, manongoskon sada surat pasal Jerusalem hubani raja Artasasta, sonon,

⁹ “Ia hanami: Si Rehum, wali negara ai, pakon si Simsai jurutulis ai, pakon hasoman ni sidea na legan ai, panguhum-panguhum, panrajai-panrajai, gamot-gamot, halak Persia, halak na hun Erek, halak Babel, halak na hun Susan, ai ma halak Elamit,

¹⁰ ampa bangsa na legan, na binoban ni si Asnapar na bolon anjaha na sangap ondi, anjaha na binahenni marianan i huta-huta ni Samaria pakon i propinsi na legan, na i dipar ni Bah Eprat,

¹¹ anjaha on do hata ni surat, na tinongos ni sidea bani, ʻMarayakkon Raja Artasasta! Hanami juakjuakmu, halak na marianan i propinsi, na i dipar ni bah in, tabi ma bamu.ʼ

¹² Tontu domma ibotoh raja in, ia halak Jahudi na roh tangkog hu bennami, domma laho hu Jerusalem. Ipauli sidea do nuan huta panggeori ampa na jahat ai, domma pala laho dob tembokni anjaha ipauli do onjolanni,

¹³ On pe, ibotoh raja in ma, anggo ipauli ma use huta ai anjaha dob tembokni, seng anjai galaron ni sidea be balasting, sohei barang gogoh ni tanoh in, gabe marharugian ma bahenon ni sidea raja-raja in.

¹⁴ Tapi halani mangankon garam hanami hun rumah ni raja in, anjaha seng patut patoggor-tonggoronnami bador raja in, halani ai do ase itongos hanami surat on laho pagolpahon,

¹⁵ ase ipareksa ma buku pardingatan ni ompung-ompung na lobei. Jadi jumpah ham ma bani buku pardingatan ai, anjaha botohonmu, ia huta on huta panggeori do, sibahen hasunsahan bani raja-raja pakon nagori-nagori, anjaha humbani sapari nari pe sai masa do hageoron ibagas huta ai. Halani ai do ase iparseda huta ai.

¹⁶ Mardomu hujai ipabotohkon hanami ma bani raja in, anggo ipauli use huta ai anjaha dob use tembokni ai, seng anjai adong be tading bamu gomgoman i dipar ni bah banggal in.

¹⁷ Itongos raja ai ma balosni, ʻHubani si Rehum, wali negara ai, pakon si Simsai, jurutulis ai, pakon hasoman ni sidea na legan ai, na marianan i Samaria pakon bani ianan na legan i dipar ni bah banggal ai, tabi ma bani nasiam.ʼ

¹⁸ Ia surat, na tinongos nasiam bennami, domma ibasa tulimat i lobeihu.

¹⁹ Mintor huparentahkon ma, ase ibahen pamareksaan, gabe jumpah ma, panggeori do tongon huta ai dompak raja-raja humbani sapari nari, anjaha sai masa do hageoron pakon panlawanon ibagas ai.

²⁰ Anjaha raja-raja parkuasa pe adong hinan do na mamarentah i huta Jerusalem, na manggomgom ganup tanoh, na i dipar ni bah banggal in, anjaha manggalar balasting, sohei pakon gogoh ni tanoh do halak bani sidea.

²¹ On pe, parentahkon nasiam ma, ase iparontihon na marhorja ai, ase ulang ipauli use huta ai, paima roh use parentahku.

²² Ai pe, jaga ma nasiam, ulang lansei pasal ai, ase ulang lambin banggalni hasedaon ai, na mambahen rugi raja-raja.”

²³ Jadi dob ibasa salinan ni surat ni Raja Artasasta ai i lobei ni si Rehum pakon si Simsai, jurutulis ai, ampa hasoman ni sidea na legan ai, gabe ilanglangi ma sidea marhitei paksa pakon gogoh.

²⁴ Jadi tarlanglang ma horja na bani rumah ni Jahowa na i Jerusalem ai; anjaha soh do ai ronsi padua-tahunkon dob manrajai si Darius, raja ni Persia.

Ezra

Video Ezra 4

Ikuti Kami:

KONTAK | PARTISIPASI | DONASI