Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Musuh-musuh kalak Juda ras Benyamin megi maka kalak si nggo mulih i pembuangen nari iulihina ka majekken Rumah Pertoton TUHAN, Dibata Israel.
2 Erkiteken si e ijumpai kalak ndai Serubabel ras pengulu-pengulu terpuk Juda ras Benyamin nina, "Berelah kami ikut majekken Rumah Pertoton e, sabap Dibata si isembahndu e ka nge isembah kami. Kidekah kami isuruh Esarhaddon, raja Assur, ngiani negeri enda, kami nggo tetap mpersembahken persembahen man BaNa."
3 Megi si e nina Serubabel, Josua, ras pengulu-pengulu terpuk e ngaloi, "La kami perlu penampatndu i bas majekken Rumah Pertoton man TUHAN Dibata kami. Kami saja majekkenca, sue ras perentah Kores, raja Persia."
4 Kenca bage iusahaken kalak si ringan i bas negeri e gelah urak ukur kalak Jahudi. Ipebiar-biarna dingen iambatina ia majekken Rumah Pertoton e.
5 Pegawai-pegawai pemerentah Persia pe isogokna gelah gelah ula dung dahin e. Si enda ilakokenna kidekah pemerentahen Kores janah seh pe ku pemerentahen Darius.
6 I bas permulan pemerentahen Raja Ahasweros, kalak si ringan i bas negeri e ngaduken kalak Jahudi si ringan i Juda ras Jerusalem alu sada surat.
7 Tole pe, i bas pemerentahen Artasasta raja Persia, si Bislam, Mitredat, Tabeel, ras teman-temanna, erbahan surat man raja. Surat e ibahan i bas cakap Aram janah arus iterjemahken asum ngogesa.
8 Si Rehum pe, sekalak gubernur, ras Simsai, sekretaris propinsi erbahan surat si tersena arah teruh enda man Artasasta kerna Jerusalem:
9 "I bas gubernur Rehum, Simsai sekretaris propinsi i bas teman-temanna nari, eme hakim-hakim ras i bas kerina pegawai si deban nari si asalna i Erek, i Babil, ras Susan i negeri Elam nari,
10 rikut ras bangsa-bangsa si deban si ipindahken Asurbanipal, raja si mbelin dingen erkuasa, i bas kutana nari, jenari ringan i bas kota Samaria ras i bas ingan si deban i propinsi Eprat Barat."
11 Enda me surat si ikiremna e: "Man Raja Artasasta si mehamat, i bas suruh-suruhen Raja nari si ringan i Eprat Barat.
12 Ipebetehken kami man bandu o, Raja, maka kalak Jahudi si reh ku jenda i bas daerah-daerahndu si deban nari, genduari nggo ringan i Jerusalem, janah ipajekkenna ka mulihi kota si jahat dingen rusur berontak e. Nggo ibenakenna majekken tembok kota e, janah lanai ndekah dung me.
13 O Raja, adi kota enda ipajekken mulihi janah bentengna nggo dung, pendudukna lanai nggit nggalar pajak, emaka duit si bengket ku kerajanndu reh sitikna.
14 Dage, erkiteken kami ertanggung jabap man bandu, la ate kami jadi si enda. Emaka iusulken kami
15 gelah iperentahkenndu ndarami surat-surat si ibuniken nini-ninindu nai. Arah e tentu idatndu maka kota enda gelgel e nari kin pe rusur nge berontak janah nai-nai nari nuhsahi raja-raja ras pemerentah propinsi-propinsi. Rayatna seh kal serana ngaturkensa. Eme sabapna maka kota e icedaken.
16 Erkiteken si e tek kami maka adi ipajekken kin kota enda mulihken dingen bentengna nggo dung, lanai kam ngasup ngkuasai propinsi Eprat Barat. I bas kami nari, Suruh-suruhenndu Kalak Eprat Barat."
17 Enda me balasen surat e i bas raja nari: "Man gubernur Rehum, Simsai sekretaris daerah ras man teman-temanna si ringan i Samaria ras ingan-ingan si deban i Propinsi Eprat Barat. Mejuah-juah.
18 Surat si ikiremkenndu nggo iterjemahken dingen iogeken man bangku.
19 Nggo kuperentahken gelah iselidiki, janah tuhu-tuhu nggo tangkas maka nai-nai nari Jerusalem nggo berontak ngelawan kuasa raja janah kota e dem alu pemberontak ras pengacau.
20 Raja-raja si megegeh nggo pernah erkuasa i je janah iperentahna kerina daerah propinsi Eprat Barat, dingen ipepulungna pajak ras upeti.
21 Erkiteken si e pedaratlah perentah maka la banci lang ngadi kalak e majekken kota e mulihken seh kubereken ka perentahku.
22 Minterlah lakoken enda, gelah ula tambah kecedan ras kerugin nandangi raja."
23 Kenca surat Artasasta iogeken man Rehum, Simsai ras teman-temanna, minter lawes pedas-pedas ku Jerusalem. Ipaksana kalak Jahudi e gelah ngadi majekken kota e mulihi.
24 Dahin majekken Rumah Pertoton e nggo ipengadi janah lalap la iterusken seh tahun si peduaken pemerentahen Darius, raja Persia.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA