Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
3 Ri makatallun taunna ammarenta, appare’mi acara passua’-suarrang lompo anjo Karaeng Ahasyweros untu’ sikamma tumalompona siagang pagawe-pagawena. Hadere’ tongi panglima tantarana Persia siagang Media ri anjo passua’-suarranga. Kammayatompa sikamma guburnur siagang pagawe-pagawe tinggi battua ri daera propinsi nia’ ngaseng tongi hadere’.
4 Annambulang sallona napappicini’-cinikang karaenga kakalumanynyangnganna ri balla’ karaenga siagang kalompoang kakaraenganna.
5 Le’baki anjo, appare’mi pole acara passua’-suarrang anjo karaenga untu’ sikontu ra’yaka ri kota Susan, baji’ ra’ya’ kalumanynyanga, kammayatompa ra’ya’ kasi-asia. Sidaminggui nigaukang anjo passua’-suarranga, anjoreng ri parang lakkenna balla’ karaenga.
6 Anjo paranglakkenga nibelo-beloi siagang gordeng kaeng lenang gauka nipare’ siagang kaeng lenang kebo’. Nampa nisikko’ anjo kaeng gordenga siagang otere’ kaeng lenang halusu’. Le’baki anjo nipasai’mi ri ponto-ponto niaka nipasang ri benteng-benteng tembo’ accillaka. Irawanganna nia’ niboli’ siapa are koi bulaeng siagang koi pera’, ia ta’dongkoka irate ri dapara’ tembo’ laccuka na kebo’. Anjo daparaka nibelo-beloi tanja’na. Na anjo belo-belona sanrapangi nicini’ kaca eja a’lisereka, siagang kuli’ mutiara accilla’, kammayatompa paramata gau’.
7 Appasadiai karaenga anggoro’ sanna’ jaina ia nipatalaya lalang ri cangkiri’ bulaeng sangka’ rupaya tanja’na.
8 Tena nanisanggai anggoro’na toanaya, yareka nipassai ke’nanga angnginung. Le’baki naparentakang karaenga mae ri sikamma palayanga ri balla’ karaenga, sollanna nilayani toanaya situru’ massing-massing apa nangaia.
9 Na ilalanna todong anjo wattua, ia bainenna karaenga iamintu niarenga Wasti, appare’ tongi acara passua’-suarrang untu’ sikamma bainea lalang ri balla’na karaenga.
10 Ri maka tujuna alloa, angnginung-nginummi karaenga siagang sanna’ sikali rannuna. Lanri kammana nakio’mi tujua palayang untu’ kalenna. Ia arenna ke’nanga iamintu Mehuman, Bizta, Harbona, Bigta, Abagta, Zetar, siagang Karkas.
11 Nasuromi ke’nanga angngerangi Ratu Wasti battu ri dallekanna nanapake songko’ kakaraenganga ri ulunna. Anjo ratua teai sipato’ ga’gana, nampa ero’ napappicini’-cinikang kaga’ganna anjo bainenna mae ri sikamma tumalompoa siagang sikamma toananna.
12 Mingka ri wattunna napabattu anjo sikamma palayanga parentana karaenga mae ri Ratu Wasti, taerokai ratua battu. Sa’genna teaimi sipato’ larrona karaenga.
13 Na nia’ kabiasanna karaenga untu’ appala’ tangara’ mae ri sikontu tucara’deka ri passala’na nikanaya hukkung siagang ada’. Lanri kammana, nakio’mi sikamma tumailalanna, ia angngassengai angkana apa musti nigaukang ri passala’ kammaya anjo.
14 Ia tumailalang kaminang masarroa nikio’ ri karaenga iamintu: Karsena, Setar, Admata, Tarsis, Meres, Marsena, siagang Memukan. Anne ke’nanga sangnging tumailalang ri Persia siagang Media, kaminang tinggia pangka’na lalang ri kakaraenganga.
15 Nakanamo karaenga mae ri anjo tujua tau, "Le’baki kusuro palayang-palayangku mange ri Ratu Wasti untu’ assuroi battu mae ri nakke. Mingka taerokai. Manuru’ atorang, apa musti nigaukang mae ri ia?"
16 Nakanamo Memukan ri karaenga siagang sikamma tumalompoa, "Lanri anjo panggaukanna, teai poro karaeng bawang nahina Ratu Wasti, mingka sikontu pagawena karaenga, ba’lalo sikontu bura’nea anrinni ri kakaraenganga, nahina ngaseng tommi.
17 Nasaba’ anjo panggaukanna ratua lanaasseng ngasengi sikontu bainea, sa’genna massing lanacapa’ ngaseng tommi bura’nenna ke’nanga. Lanacaritami ke’nanga angkana le’baki niparentakang ratua andallekang ri karaenga, mingka taerokai anjo Ratu Wasti battu.
18 Jari, punna nalangngere’ ngaseng sikamma tubai’-bainena sikamma tumalompoa ri Persia siagang Media anjo passalaka, mattantu lanapaui anjo passalaka mae ri massing bura’nenna ke’nanga. Nakale’bakkanna sikamma tubai’-bainea langngewami ri apa naparentakanga bura’nenna, nampa lalarromo tubura’-bura’nea ri tubai’-bainea.
19 Lanri kammana, napalaki ikambe mae ri katte karaeng, sollanta angngalle kaputusang angkanaya tanipa’biangngami pole Ratu Wasti battu andallekang ri karaenga. Anjo kaputusanga musti nipa’jari undang-undang ri Persia siagang Media, sollanna takkullea nipinra ammotere’. Le’baki anjo kipassareammi anjo empoang ratua ri Wasti mae ri baine maraenga, ia bajikangnganga na ia.
20 Punna a’la’bammo anjo apa le’baka kipa’jari kaputusang mae ri sikontu anne kakaraeng luaraka daerana, sikontu tubai’-bainea lanapakalompomi tubura’-bura’nea, baji’na akkalumanynyanga kammayatompa kasi-asia."
21 Nisitujuimi anjo kananna Memukan ri karaenga siagang sikamma tumalompoa, nampa nagaukammo karaenga anjo kammaya.
22 Akkirimmi sura’ parenta mange ri sikontu daera propinsi naparentaya, manuru’ massing bahasaya siagang tulisanga ri anjo propinsia. Ia bonena anjo parentaya iamintu ilalang sikontu ruma tanggaya, musti tubura’-bura’nea a’jari kapala, siagang ia musti angngalle kaputusang ilalang sikontua passala’.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA