Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Turi-turin enda jadi tupung paksa pemerentahen Ahasweros, raja Persia. Kerajanna lit 127 propinsi, mulai i India nari seh ku Etiopia.
2 Ia merentah i Susan nari, ibukota Persia.
3 I bas tahun si peteluken kenca ia jadi raja, ibahanna pesta man-man guna kerina pembesar ras pegawai-pegawaina. Tentera Persia ras Medi pe ikut i bas pesta e, bage pe gubernur-gubernur ras bangsawan-bangsawan i bas propinsi-propinsi nari.
4 Enem bulan dekahna icidah-cidahkenna kebayaken istana kerajan rikut ras kemulianna si mbelin bage pe kehaganna si medolat.
5 Kenca dung si e, ibahan raja ka pesta man-man guna kerina kalak si ringan i kota Susan, subuk si bayak tah musil. Pesta enda ibahan i bas peken istana, pitu wari dekahna.
6 Kesain istana ihiasi alu kire-kire uis biru ras mbentar, si iiket salu nali lenen halus, ungu rupana, janah igantungken ku tiang-tiang marmar salu cincin-cincin pirak. Bale-bale emas ras pirak, itama i bas kesain e. Lante kesain e ibahan i bas marmar mbentar, batu kristal megara, kulit mutiara si erndilap, ras batu meherga si deban nari.
7 Inemen iidangken tare calung emas, tempasna kerina pelain-lain, janah raja seh kal melumbarna mereken inemen.
8 Inemen si iidangken la lit sibarna. Nggo iperentahken raja man kerina pelayan istana maka tiap kalak arus iidangi sue ras pemindonna.
9 Radu ras si e, i bas istana, Kemberahen Wasti pe erbahan pesta man-man guna kerina si diberu.
10 I bas wari pepituken, tupung raja minem-minem, meriah kal iakapna. Emaka idilona pitu kalak suruh-suruhenna si ertugas khusus guna raja, eme Mehuman, Bista, Harbona, Bigta, Abagta, Setar, ras Karkas.
11 Iperentahken raja ngelegi Kemberahen Wasti, tupung kemberahen e ermahkota denga. Kemberahen e seh kal jilena, emaka icidah-cidahken raja atena kinijilen kemberahenna man kerina pegawaina ras temuena.
12 Tapi tupung suruh-suruhen ndai nehken perentah raja man Kemberahen Wasti, la ia nggit reh. Erkiteken si e nembeh kal ate raja.
13 Bagi semalna adi lit persoalen, isungkun raja lebe kalak si meteh undang-undang. Emaka idilona penasehatna, lako nungkunisa kai arus ibahan.
14 Kalak si rusurna isungkunina eme Karsena, Setar, Admata, Tarsis, Meres, Marsena, ras Memukan; pituna kalak enda pembesar bangsa Persia ras Medi, si katawari pe banci ngadap man raja, janah pangkatna me si meganjangna i bas kerajan.
15 Nina Raja Ahasweros man kalak ndai, "Nggo kusuruh juak-juakku ngelegi Kemberahen Wasti, tapi la ia nggit reh. Kuga nge arus ibahan man bana, sue ras undang-undang?"
16 Emaka nina Memukan man raja ras pegawai-pegawaina, "Alu perbahanenna e si tuhuna Kemberahen Wasti nggo megombang man raja ras man pegawai-pegawaina. Labo terjeng je saja, tapi kerina dilaki i bas kerajan enda pe nggo igombangina.
17 Adi perbahanen kemberahen e nggo pagi seh beritana man kerina diberu-diberu i bas kerajan enda, ugapa pe lanai ia mehamat man perbulangenna. Sabap nina pagi, 'Iperentahken raja kemberahenna ngadap, tapi la ia nggit reh.'
18 Katawari pagi ndehara pembesar-pembesar Persia ras Medi megi kerna lagu langkah kemberahen e, i je ka nge minter iturikenna man perbulangenna. Erkiteken si e, ijapa pe pagi ndehara lanai mehamat man perbulangenna, janah perbulangen pe merawa-rawa man ndehara.
19 Dage, adi mehuli iakapndu o raja, pedaratlah perentah maka Wasti lanai banci ndigan pe ngadap man raja. Perentahkenlah maka si e isuratken jadi undang-undang Persia ras Medi gelah lanai banci ndigan pe iubah. Kenca bage pangkatna selaku kemberahen ibereken man diberu si deban si ulin asangken ia.
20 Kenca perentahndu e imomoken i belang-belang kerajanndu si mbelin enda, tentu kerina ndehara mehamat man perbulangenna bagi patutna, subuk perbulangenna e bayak tah musil."
21 Usul si enda mehuli iakap raja ras pembesar-pembesarna. Emaka minter ibahan raja bagi si ikataken Memukan.
22 Ku tep-tep propinsi kerajan ikiremken raja perentah i bas cakap ras tulisen penduduk propinsi e. I bas surat perentah e ikataken maka perbulangen nge pengulu i bas jabuna, janah kata perbulangen arus ibegiken.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA