Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Rato Ahasyweros marenta e Susan, ibu kotthana Persiya. Karaja’anna molae dhari India sampe’ ka Sudan, bannya’na saratos petto lekor propinsi.
2 (1:1)
3 E taon se kapeng tello’ pamarenta’anna, Rato Ahasyweros mabadha pesta raja; se eonjang iya areya sakabbinna kaom oreng agung ban ponggabana. Para panglima Persiya ban Mediya, para gubennor ban om-kaom oreng agung tenggi e si-propinsi padha hadir.
4 Nem bulan abidda rato jareya ngedirragi kasogiyanna karatonna ban kaagunganna sarta kabagusanna karaja’anna.
5 Saellana jareya rato mabadha pesta pole pettong are abidda kaangguy sakabbinna ra’yadda se badha e binteng Susan, se sogi ban se mesken. Pesta jareya ebadha’agi e bun-kebbunanna karaton.
6 Palataranna karaton jareya erengga bi’ bir-tabir dhari kaen linen se abarna bungo ban pote, etale’e bi’ tale linen alos se abarna bungo terrong, epacangke’ ka long-kolong salaka se epasang ka ga-cangga marmar. E baba’anna epobuwi pan-dipan emmas ban salaka e palesteran se erengga bi’ marmar pote, bato akek mera, kole’na motteyara se ngarennyap ban bato pirus se bungo.
7 Rato nyadhiya’agi anggur se biyasana edha’ar rato, talebat bannya’na, eangka’agi ngangguy la-piala emmas se acem-macem.
8 Moy-tamoy jareya mon ngenoma anggur ta’ ebatesse bannya’na, sabaligga keya ta’ epaksa esoro ngenom. Rato makon ka para pangladinna karaton, sopaja moy-tamoy jareya eladine menorot pangaterrona bang-sebang.
9 Sabatara jareya Wasti, dinaju rato, mabadha pesta keya kaangguy babine’an e dhalem karaton.
10 E are se kapeng petto’, rato terros adha’ar aeng anggur sampe’ ce’ peragga. Rato jareya pas nembali pangladin pribadhina se kapetto, iya areya: Mehuman, Bizta, Harbona, Bigta, Abagta, Zetar ban Karkas.
11 Reng-oreng jareya epakon ngone’e Dinaju Rato Wasti epakon ngagem jamang karaja’an, pas epakon bakta ka ajunanna. Dinaju rato jareya ce’ raddinna, ban rato terro ngedirragiya karaddinanna ka om-kaom oreng agung sarta para tamoyya.
12 Tape e bakto para pangladin jareya manapa’ dhabuna rato gella’, Dinaju Rato Wasti ta’ kasokan rabu, sampe’ rato ce’ dukana.
13 Daddi rato laju nembali para panasehadda se tao apa se kodu elakone e dhalem parkara se kantha jareya, sabab rato jareya kabiyasa’anna nyo’on panemmona para ahli e dhalem parkara hokom ban adad.
14 Para panasehadda se paleng seggut etembali rato kapetto, iya areya: Karsena, Setar, Admata, Tarsis, Meres, Marsena ban Memukan. Jareya kabbi om-kaom oreng agung Persiya ban Mediya se neggu’ pangkat paleng tenggi e dhalem karaja’an.
15 Dhabuna rato ka se kapetto jareya, "Sengko’ nyoro tang din-pangladin ka Dinaju Rato Wasti, esoro ngabala ja’ dinaju rato bi’ sengko’ esoro ngadhep. Tape dinaju rato ta’ endha’. Menorot hokom, kodu epabaramma dinaju rato jareya?"
16 Memukan laju mator ka rato ban ka om-kaom oreng agung laenna, "Kalaban cara se kadi ka’dhinto, Dinaju Rato Wasti banne namong ya-nyeya rato, namong jugan sadajana kaom oreng agungngepon junandalem, la’-mala’ saneyap oreng lalake’ e karaja’an ka’dhinto!
17 Sabab se elampa’agi dinaju rato gapaneka bakal ekaedhinga sareng sadajana babine’an, ban babine’an gapaneka tanto pas ta’ kera ngargai lakena bang-sebang. Babine’an gapaneka tanto padha ngoca’ ja’ Rato makon Dinaju Rato Wasti sopaja ngadhebba, namong dinaju rato ta’ kasokan.
18 Daddi, manabi rajina om-kaom oreng agung Persiya sareng Mediya padha mereng parkara se elampa’agi dinaju rato gapaneka, tanto pas padha notorragi parkara gapaneka ka lakeepon bang-sebang. Daddi babine’an tanto ros-terrosan ta’ atoro’ ka oca’na lakena, dineng oreng lalake’ pas ros-terrosan peggel ka rajina.
19 Daddi abdidalem nyo’ona sopaja junandalem motose ja’ Dinaju Rato Wasti ta’ eedine pole ngadhep ka junandalem. Potosan gapaneka kodu ebadhi dhang-ondhang Persiya sareng Mediya, sopaja ta’ kengenga ecabut pole. Saamponna, Dinaju Rato Wasti gapaneka pas gante’e babine’ laen se asaeyan.
20 Manabi potosannepon junandalem ka’dhinto ekaonenge sareng sadajana oreng e karaja’an se lebar ka’dhinto, saneyap oreng bine’ tanto ngargai lakena, sanare se mesken otabana se sogi."
21 Ator rembagga Memukan jareya eanggep bagus bi’ rato sarta om-kaom oreng agung, daddi bi’ rato duli elampa’agi.
22 Rato ngerem sorat ka saneyap propinsi e dhalem karaja’anna, se etoles ngangguy tolesan ban basa se eangguy e saneyap propinsi jareya bang-sebang. Monyena potosan jareya nyebbuttagi ja’ e sabban bengko, se kodu daddi kapalana ban se kodu motose parkara apa’a bai, kodu se lake’.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA