Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali saba etu, aku, i Paulus, makai-kai resi i Pue Allah mampokaika komi. Aku ratarungku si’i-si’i apa saba aku mangika palaong i ngKerisitu Yesu resi komi to si’a to Yahudi.
2 Wali komi bara re’e mangandonge mangkonong palaong to nasarumakaka i mPue Allah aku. Etu semo mampakarebaka resi komi to si’a to Yahudi mangkonong kanotoNya.
3 Wali palaongingku etu mangalulu songka i mPue Allah to tawa nansani ntau tempo ruyu. SongkaNya etu i Pue Allah semo to mampaponsanika aku. Pasi aku room mangantulis sangkodi mangkonong to etu.
4 Wali ane komi mangabasa gombongku etu komi damanasa ewa wimba aku rapaponsanika mangkonong songka to rawuni etu mangkonong i Kerisitu.
5 Songka etu tawa rapaponsanika resi tau to tempo owi. Pei si’i-si’i pomakau i Yesu pasi to pantuntu tuntu i mPue Allah to i Pue Allah Puenya sira room napaponsanika i Nosa Mapasing songka etu.
6 Wali songka to tamo rawuni etu, songka etu mangkonong tau to si’a to Yahudi sira maya mangarata seja tilanya sindara-ndara pei to Israel. Pasi sira seja mawali samba’a koro pei to Israel pasi mangarata seja anu to naparajanjika i mPue Allah. Naka pei sira mangarata samparia to etu apa sira seja samba’a pei i Kerisitu saba mangaya kareba matao.
7 Wali aku nawaika i mPue Allah mawali to papolaong to mampakarebaka kareba matao etu. Palaong etu semo sora to nawaika i mPue Allah aku yako ri kanotoNya. Pasi yako ri kuasaNya see naka aku kukurang mangika palaong etu.
8 Wali aku ipu rayangku mampobuuka i Pue Allah mangawaika aku palaong to bae kojo batuanginya etu. Apa yako samparia tau to i Pue Allah Puenya, aku semo to kodi kojo angganya. Pei nempo ewa see, aku nawaika i mPue Allah kanotoNya see aku maya mampakarebaka komi to si’a to Yahudi kareba mangkonong rasi to nawai i ngKerisitu. Rasi etu raporapaka ewa kasugi to taa nakurang ntau mangarekeng.
9 Pasi i Pue Allah mangawaika aku mampakanasaka samparia tau ewa wimba naika i mPue Allah see mawali songkaNya to rawuni tempo ruyu. Apa i Pue Allah, to mangampake i Yesu Kerisitu mampapowali samparia anu to re’e, Ia semo to mangawuni songkaNya etu tempo owi.
10 Pei tempo si’i Ia mampaponsanika to lino songkaNya etu. Naka pei Ia mampaponsani songka etu, see damampapokitaka makole-makole pasi anu to yusa to mangkuasang ndate yangi mangkonong kapandeNya. Apa tempo sira mangangkita samparia tau to mangaya roomo rapasimba’a mawali tauNya, sira damangansani i Pue Allah pande kojo apa samparia to inikaNya kono kojo.
11 Wali i Pue Allah mangika samparia palaong to etu mangalulu songka to inikaNya yako singkasaenya. Pasi Ia mangampake i Kerisitu Yesu, Pue ngkita, mangabanang songkaNya etu.
12 Wali saba kita samba’a pei i Kerisitu Yesu pasi saba kita mangaya Ia, see naka kita taa meka pasi taa seja bata-bata raya ngkita mampotango i Pue Allah.
13 Wali see naka aku mamporapika resi komi ne’e mayu’u raya ngkomi mampobuuka kasesa to aku mangarata apa saba palaong to inikangku resi komi. (Aku buya rayangku mangarata kasesa etu apa aku manga’angga komi. Wali see naka tau to yusa mangangkita komi masipato ra’angga.)
14 Wali etu sabanya naka pei aku mambokotu ri tango i mPue Allah, Pa’a i Yesu Kerisitu, Pue ngkita.
15 Pasi aku seja manganto’oka Ia Pa’a. Naka pei aku manganto’oka Ia Pa’a, apa kita samparia, nempo to ndate saruga pasi to re’ewa ri sambawo lino, kita samparia samba’a Pa’a.
16 Wali aku makai-kai resi i Pue Allah anu bae kojo kayawaNya. KayawaNya etu raporapaka ewa kasugi to bae kojo. Wali aku mamporapika resi Ia see yako ri kayawaNya etu Ia mangawaika komi karoso to mampakaroso raya ngkomi. Pasi Ia damangampake i Nosa Mapasing mangika palaong to etu.
17 Pasi aku makai-kai see i Kerisitu damasanang maroo ri raya ngkomi pasi masingkatao pei komi apa saba pangaya ngkomi. Apa ane ewa see, komi danapakaroso yako pamporayangiNya see komi mawali ewa kaju to maroso kalenya pasi ewa banua to maroso pondasinya.
18 Apa ane komi maroso ewa wetu, komi, sewaju pei samparia tau to yusa to i Pue Allah Puenya, re’e kuasa damangansani ewa wimba kabaenya pamporayang i ngKerisitu. PamporayangiNya etu raporapaka ewa anu to bae kojo katiwaanya pasi karadenya pasi kalanganinya pasi kayombunya.
19 Pamporayang i ngKerisitu etu kamonsonya taa nakoto nto lino mampobuuka ewa wimba kabaenya. Pei nempo ewa see aku tiroo mamporapika resi i Pue Allah see Ia damangansawang see komi mangansani pamporayangiNya etu. I Pue Allah masilonga kojo, pasi ane komi mangansani pamporayang i ngKerisitu, ane ewa see samparia kasilonga i mPue Allah etu paka re’e seja ri raya ngkomi. Wali etu semo pokai-kaingku mampokai-kaika komi.
20 Wali bae kojo kuasa i mPue Allah to mapalaong ri raya ngkatuwu ngkita. Yako ri kuasaNya etu Ia nakurang mangika mayabi yako samparia anu to kita mampobuuka, taa manto’o to kita mamporapika resi Ia. Tare to Ia taa nakurang mangika.
21 Wali masipato Ia nabarong ngkita samparia to mangaya to rato’oka tauNya pasi to samba’a pei i Kerisitu Yesu. Masipato Ia rabarong ri tempo si’i pasi ri tempo to darata pasi rataka singkasaenya. Amin.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA