1 Aku'oi ki Paulus, pinonjara lantaran nogaid kon oaíidan i Kristus Yesus sing kopontingan monimu intau inta de'eman Yahudi.
2 Aim bidon dinongog monimu, kong ki Allah in lantaran kopopia ing gina-Nya, daí inogoian-Nyadon in tugas tana'a in aku'oi sing kopontingan monimu.
3 Aim pinoguman i Allah in roncana-Nya inta binuni-Nya tua bo aim pinota'au-Nya ko'i nakoí. (Soaáḷ tana'a pinaiskudon kino poḷok kolimonik,
4 bo aka kobaca'andon monimu intua, yo komangaleandon monimu onu inta no'ibunipa soaáḷ ki Kristus, naí kinomomangaleku kon tua.)
5 Kolipod, onu inta no'ibuni tua diaí dodai onda pinota'au kon intau, ta'e tana'a, aim pinonyata in Roho i Allah kon rasul mita bo kon nabi-Nya mita.
6 Na'abií inta no'ibuni tua: Pinongin Habar Mopia tatua, intau de'eman Yahudi mo'itakin domandon mokorasa kom barakat mita i Allah inta kolipod tongaí sinadia kon intau mita in Yahudi. Intau mita inta de'eman Yahudi nobaliídon toaíwakan in awak inta tobatuí tua, bo mo'itakin doman motarima kon onu inta pinodandi i Allah pinongin i Kristus Yesus.
7 Ki Allah ain noponotabi ko'i nakoí in oaíidan mopoyaput magií-makow in Habar Mopia tatua. Sinarimaku in totabi tatua pinongin kawasa i Allah inta nogaid kom bonu in awakku na'a.
8 Kon sigad im bayongan umat i Allah, yo aku'oibií na'a im paling moko'oyak. Ta'e ki Allah ain noponotabi in oaíidan tana'a ko'i nakoí; oaíidan mopoyaput in Habar Mopia soaáḷ kokaya'an i Kristus inta diaí modai-dait;
9 bo aku'oi im pinakeí doman i Allah mogaid kon oaíidan tatua simbaí bayongan intau monota'au kon naonda in cara i Allah inta nomia kon dunia na'a, mogaid kon roncana-Nya inta binuni-Nya kon dunia na'a nongkon tungkuḷ intua.
10 Makusud i Allah tua im baí tana'a makow jama'at-Nya mopota'au im bayongan yagi-yagi soaáḷ kabijaksana'an i Allah kom pomarentah mita bo kom bayongan inta nongawasa kon soroga.
11 Tua inaidan i Allah podudui in roncana-Nya inta mononoi, inta inaidan-Nya pinongin i Kristus Yesus, Tuhan naton.
12 Lantaran mopirisaya ko'i Kristus bo lantaran notobatuídon takin-Nya, daí kita inogoiandon in daḷan dimiug ko'i Allah takin totu-totu'u mopirisaya.
13 Tuamai na'a in igumonku: dona'aibií molia-liau ing gina moko'ontong kon rorigaku inta lantaran mo'ikow, sim bayongan rorigaku tua, untukbií kopia'an monimu.
14 Managka intua aku'oi sinumungkud kon tayowon i Amaí.
15 Nongkon i-Niabií intua, bayongan koluarga kon soroga bo kon dunia na'a motarima kon sipatnya tontanií.
16 Mosambayang in aku'oi simbaí ki Allah inta totok im momulia tua mo'ibog moginrigon kom batinmu takin Roho-Nya.
17 Igumondon makow ki Kristus inta pinirisaya monimu mogutundon kom bonu ing gina monimu bo mo'ikow im mobiag mo'idoyon kom bonu in tabi.
18 Aku'oi umuran mosambayang, simbaí mo'ikow takin bayongan umat i Allah monota'audon kong kobobarakat, koḷoḷanggoí, koḷoḷantud bo kododaḷom in tabi i Kristus,
19 inta aka tongaí podoyon kon raian intau yo diaíbií monota'au kon tua moaíko-akow. Sambayanganku simbaí mo'ikow monota'audon kon tabi i Kristus tua, sahingga mo'ikow kawasa'andon in sipat i Allah inta nosempurna.
20 Takin kawasa i Allah inta tantuí mo'igonuí kom bonu ing gina naton, mota'au ing ki Allah mogaid kon lebe mobayong nongkon onu inta mota'au igomon andeka inta koraian naton.
21 Ki Allah musti umuran dayowon, turun-tumurun kom bonu in jama'at, pongin i Yesus Kristus. Dinayo-dayowdon ki Allah modapot ing kopaḷutannya! Amin.

Studi Alkitab lengkap, silahkan lihat Alkitab SABDA :: Efesus 3
Studi Alkitab mobile, silahkan lihat Alkitab Mobi :: Efesus 3

Download Aplikasi Alkitab Karaoke (BETA) Android:
https://play.google.com/store/apps/details?id=org.sabda.alkitabkaraoke