Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Idi ini punneh ui ini, luk kiling ngaceku Keristus Yésus kuan muyuh lun pupu baken, sembayang pa kiung Allah.

² Kali' rungen muyuh pangen neninger ratnan kekamen luk biré Allah kuanku maya' katuNeh, pad ui ngacing luk do' kuan muyuh.

³ Allah nengegala' luk inalumNeh ineh kuanku dengan dalan bala luk linio, mepad kudeng luk pangeh inayudku kuan muyuh atun dengan sesuut bala.

⁴ Idi kudeng muyuh maca' ineh, miak muyuh kali' luk nekali'ku ratnan luk inalum Keristus.

⁵ Idi mon luk inalum ineh nateh bida' kuan lemulun, mepad kudeng luk pangeh ginala' Roh nekini kuan rasul-rasul idi nabi-nabi luk meligan.

⁶ Ini luk inalum ineh: dengan dalan Bala luk Do' ineh lun pupu baken ngalap babpat perian Allah pad-pad dengan lun Yahudi. Ideh mangun ku babpat sebuleng burur, idi ngalap babpat bang jani' Allah luk pijani'Neh bang Keristus Yésus.

⁷ Ui pangeh inau' ku lun luk mada' Bala luk Do' maya' katu Allah luk biréNeh negku ngaceku tueh laludNeh ineh.

⁸ Idi kuanku ini luk pelaba dat rat arang amung-amung lun manu, katu ineh pangeh biré pad ui miak mada' Bala luk Do' kuan lun pupu baken ratnan do' Keristus luk na kekipedneh,

⁹ idi ngegala' kuan amung lemulun kudeng apeh pian Allah luk inalum miak uen ngacing. Allah luk nemudut luk amung-amung pangeh nenapung ineh tuda'-tuda' io,

¹⁰ pad bang kareb ini tuda'-tuda' ileh Allah miak badén sidang kuan amung-amung luk ngimet idi lalud luk déi' surga.

¹¹ Allah nenganau' ini maya' pinianNeh luk meruked luk inau'Neh lutep bang Keristus Yésus Tuhan tau.

¹² Bang Keristus ineh, idi ngaceku anu tau Neneh, tau mekuu' amé' matun Allah dengan merapet.

¹³ Ngaceku ineh ui mutuh pad muyuh na metalang niat ngerawé derehku kuan muyuh luk mangun ku peruan kuan muyuh.

¹⁴ Idi ini punneh ui tekeradung pa kiung Taman ineh.

¹⁵ Rat Neneh anid-anid pupu déi' surga idi bang tana' pana' inan ngadan.

¹⁶ Idi ui mutuh pad Ieh maré kuan muyuh ratnan rayehNeh luk mela, lalud ratnan RohNeh luk nganau' nemuyuh metueh bang niat muyuh,

¹⁷ pad Keristus tudo bang niat muyuh ngaceku anu. Ui mutuh pad muyuh inan uat idi diri bang awa,

¹⁸ pad muyuh dengan amung lun manu miak kali' tuda' kirayehneh, kikadangneh, kidita'neh, idi kidalemneh, awa Keristus.

¹⁹ Matu, do' muyuh kali' awa Keristus — sagan pana' awaNeh ineh na miak kali' kidalemneh — pad muyuh miak uen manu' ku amung-amung peruan Allah dengan elaNeh.

²⁰ Idi kuan Allah luk melalud nganau' dengan ela-ela anun-anun luk pituen tau idi luk teruayen tau pana', maya' laludNeh luk ngakem bang netau:

²¹ idi rayeh kuan Allah bang sidang idi bang Keristus Yésus, pad macing amung-amung inul, ruked-ruked peh. Amin.

Efesus

Video Efesus 3

Ikuti Kami:

KONTAK | PARTISIPASI | DONASI