Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Keranaq nike tiang, Paulus, tebui lantaran Deside Isa Almasih jari kepentingan side pade dengan bangse-bangse lain.

² Pasti side pade sampun dengah mengenai tugas saq tepercayeang lẽq tiang jari nyampẽang rahmat Allah tipaq side pade.

³ Allah nyatayang rahasie rencane-Ne lẽq tiang langan wahyu. (Mengenai hal niki sendẽqmanne sampun tiang tulis secare singket,

⁴ dait lamun side pade bace, side pade gen paham rahasie mengenai Almasih, maraq saq tiang pahamin.)

⁵ Laẽq rahasie nike ndẽq uwah tesampẽang tipaq manusie, laguq mangkin Roh Allah sampun nyatayang tipaq rasul-rasul dait nabi-nabi-Ne.

⁶ Rahasie nike maraq niki: Langan Kabar Solah nike, dengan saq ndẽq Yahudi milu jari ahli-ahli waris dait anggote lẽman sopoq awak, dait milu nerimaq napi saq tejanjiqang siq Allah langan Deside Isa Almasih.

⁷ Tiang niki hambe lẽman Kabar Solah nike, sesuai rahmat saq teicanin siq Allah. Tiang nerimaq rahmat nike menurut karye kuase Allah.

⁸ Lẽq antare selapuq dengan-dengan saq tehususang bagi Allah, tiang saq paling hine. Laguq Allah ngicanin tiang rahmat niki: Tugas jari beriteang Kabar Solah tipaq dengan-dengan saq ndẽq Yahudi mengenai kesugihan Almasih saq ndẽq iniq bis nike;

⁹ dait ẽndah adẽq langan tiang selapuq dengan nenaoq berembẽ Allah, pencipte alam semeste niki, ngelaksaneang rencane-Ne saq lẽman laẽq gati terahasieang tipaq dunie.

¹⁰ Maksut Allah nike adẽq mangkin, langan jemaah, tesampẽang macem-macem hikmat Allah tipaq pemrẽntah-pemrẽntah dait penguase-penguase lẽq sorge.

¹¹ Allah ngelaksaneang nike pade maraq rencane-Ne saq kekel, saq Ie laksaneang siq perantarean Deside Isa Almasih, Junjungante Saq Mulie.

¹² Lẽq dalem Almasih ite jari bani parek tipaq Allah siq penoq keyakinan langan imante tipaq Ie.

¹³ Keranaq nike, saq tiang tunas: Ndaq putus ase serioq penderitean tiang lantaran side pade, sẽngaq selapuqne nike kemulieande.

¹⁴ Keranaq nike tiang sujut lẽq arepan Bapa.

¹⁵ Lẽman Ie sebilang keluarge lẽq sorge dait lẽq gumi nerimaq aranne.

¹⁶ Tiang bedo'e adẽq Allah menurut kemuliean-Ne saq melimpah neguqang batinde siq Roh-Ne.

¹⁷ Sehingge siq iman side pade, Almasih meneng lẽq dalem atẽnde, dait side berakah kuat maraq lolo kayuq dait tedasarang lẽq dalem kasih.

¹⁸ Tiang bedo'e semoge bareng-bareng kance selapuq dengan saq tehususang bagi Allah, side pade bau paham mengenai berembẽ galuh dait bẽlone serte atasne dait dalemne kasih Almasih,

¹⁹ saq menurut akal manusie ndẽqne bau tepahamin sedalem-dalemne. Tiang bedo'e adẽq side pade kenal kasih Almasih nike, sehingge side pade tepenoqin dalem selapuq kesempurnean Allah.

²⁰ Bagi Allah, saq sanggup ngelaksaneang jaoq luwẽqan lẽman napi saq ite do'eang atao pikirang, sesuai kuase-Ne saq bekarye lẽq dalem ite,

²¹ bagi Ie kemuliean lẽq dalem jemaah dait lẽq dalem Deside Isa Almasih turun temurun jangke selaẽq-laẽqne! Amin.

Efesus

Video Efesus 3

Ikuti Kami:

KONTAK | PARTISIPASI | DONASI