Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kai ual᷊ingu ene iạ, i Paulus nitahungkụ ual᷊ingu i Kristus Yesus baugu pandungang i kamene wal᷊ine Yahudi.
2 Mamben těngadẹ̌ i kamene semben nakaringihẹ̌ u Ruata e ual᷊ingu kapian naung'E, seng něngonggọu munara ini si siạ baugu pandungang i kamene.
3 Duata e napakal᷊ahẹu ral᷊irung u timonane mase nịlahabare si siạ. (Mạanung hal᷊ẹ̌ ene sen takụ niwohẹ dasị suwowone ringangu manimbụ
4 kụ kereu i kamene mẹ̌basa ute sarung kapangěnnaěngbeng kamene ral᷊irung mạanung Kristus kerẹewe sen takụ kinaěnnaěng.)
5 Nạung kạngerẹ e ral᷊irung ene e tawe nipẹ̌pakasingkạ su taumata, arawe orasẹ̌ ini ute Rohkẹ̌ u Ruata e seng napakal᷊ahẹ su manga rarolohange ringangu manga nabin'E.
6 Rahasia ene ute kai ini: Bọu Injilẹ̌ ene, i sire wal᷊ine tau Yahudi mal᷊aing nakapěndang manga al᷊amat'u Mawu kụ nạung kal᷊imona nisadia kẹ̌tạbeng baugu tau Yahudi. Taumata apam bal᷊ine tau Yahudi e seng nakoạ laesu wadang sěmbaụ dingangu měnẹ̌narimạ sěngkapěnarimạ apan nikẹ̌don Duata e si Kristus Yesus.
7 Mawu Ruata e něngonggọu al᷊amatẹ̌ si siạ kụ kai nakoạ mělahabaru Injilẹ̌. Iạ e nakatarimạ al᷊amatẹ̌ e ual᷊ingkeng kawasan Duata pinẹ̌karadiahange si siạ.
8 Sutal᷊oaran patikụ umat'u Mawu e iạ kakạdodokange. Kaiso kahian tatal᷊ěntụ u Ruata e, iạ e nighěllirang u hal᷊ẹ̌ku měhabar'u Injilẹ̌ si sire wal᷊ine tau Yahudi e mạanungkeng kakalạ i Kristus e tawẹ kahěpusange;
9 dingangu l᷊ai tadeạu ual᷊ingu iạ e tangu kěbị taumata e makakasingkạu kereapa Mawu Ruata, Něndiadi dunia ini patikụ e, seng napakariading karakin'E reng kal᷊amona-mona ilẹ̌l᷊irung su dunia.
10 Timonan Duata e ute kai tempo ini e bọetewen jamaatẹ̌ kěbị apan mạngumpaedẹ̌ kawasa su wowon langị e masingkạben sipirang u Ruata mapapia su patikụ haghine.
11 Mawu Ruata e měkẹ̌koạ kerene tụtuhụ karakin'E kakalẹ̌, kẹ̌koateng e ringangi Kristus Yesus Mawung kitẹ.
12 Dingangu pangangimang si Kristus kụ ual᷊ingu nasěmbaụ dingang'E, i kitẹ e nighělirangu loahe mẹ̌těngkasandigu Mawu Ruata ringangu kasěllahu pangangimang.
13 Batụu ene, iạ e mědẹ̌dorong si kamene, kumbahangbe i kamene ghuměnggang u tatumbiagẹ̌ si siạ ual᷊ingu i kamene, batụu patikụ tamai ene kai waugu mapakapiang kamene.
14 Ual᷊ingu ene ute iạ e němul᷊angengke su těngon Amang.
15 Kai wọ'i Sie apan balagẹ̌ su sorga dingangu l᷊ai su dunia nakatarimạ u kakakoạ e nitani.
16 Iạ e měkẹ̌kal᷊iomaneng mal᷊owọko Ruata limembong makěndagẹ̌ e mapakatoghasu pangangimang i kamene ual᷊ingu Rohkẹ̌'E.
17 Mal᷊owọko ual᷊ingu i kamene mạngimang si Kristus, ute i Kristus mạtanạ su ral᷊ungu naung i kamene, dingangu pẹ̌bawiah'i kamene matoghasẹ̌ ual᷊ingu kakěndagẹ̌ e seng nẹ̌banua.
18 Iạ měkẹ̌kal᷊iomaneng mal᷊owọko ringangkeweng kěbị kawanuan Duata, i kamene makasěsui kai kerene karal᷊unge ringangu kanandụe ringangu karangẹ e ringangu kawěnahe kakěndag'i Kristus,
19 kụ dingangu akal᷊u taumata tawe makasěsui karal᷊unge. Karimạko i kamene makakiral᷊a kakěndag'i Kristus e, takadeạu i kamene masukụ u kapapian Duata.
20 Dingangu kawasan Duata měngkai měkẹ̌karadiahang su ral᷊ungu watangeng i kitẹ, Duata e makakoạ limembong kakěpal᷊e wọu apang gẹ̌gausang arau tẹ̌tiněnnang i kitẹ.
21 Karimạko Ruata e mang bẹ̌bantughang bọu hěnto sarang hěnto su ral᷊ungu jamaatẹ̌, ual᷊ingu i Kristus Yesus. Dalo su Ruata wọu kakal sarang kakalẹ̌! Aming.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA