Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Iaté lulunia, aku néné sipuoni si Paulus, atupenjaraaké aku, kalulut Jesus Kristus, sibailiu puuktunganmui kam, taú sipuoni tai Jahudi.
2 Kupaatu anuarep'an kam, kalulut erut bagania Taikamanua, akénangan ka tubukku galajet néné, kalulumui.
3 Aipatoilá samba aipoiliat ka tubukku Taikamanua, rencanania, kelé sara keleatnia. (Néné akusurat'akéan siboikí, tápoi tá mananta,
4 ké nubatsa baí kam nia ka kam, agaimuian nia ka kam, keleat pagalaiat tubut Kristus, kelé agaiku nia kaku.)
5 Siburú, bulat beri poiliatna nia ka sirimanua, keleatnia néné. Tápoi kineneiget, bulat tubut Ketsat Sipunenan'an lé, amasipoiliat, ka tubudda tai apostel, sambat ka tubudda tai nabinia.
6 Keleat Taikamanua néné, iaté: Kalulut Katuareman Simaerú, silórangan nia, ka sia taú sipuoni tai Jahudi, panukanan sibara ka Taikamanua. Siburú panukanan néné, sarat uktukra lé saratda bangsa Jahudi aitutarek'aké. Sia taú sipuoni tai Jahudi, aibailiuan sia laddou sara tubu simakeré, samba leú et sia, néné rasisiló leú te ka sia sangamberi sitonéakenen Taikamanua, sibara ka tubut Kristus.
7 Aiaké kaku Taikamanua panguruat, iaté galajet masipakakra Katuareman Simaerú. Oto sibara ka geget Taikamanua sipugagalai ka tubukku lé, akusiló panguruat néné.
8 Ka talagat sangamberi paamian Taikamanua, aku lé bulat sigoisó tiboi tubu. Tápoi kenanen kisedda, ka tubukku lé, aiaké nia Taikamanua, panguruatnia néné: iaté galajet masipakakra Katuareman Simaerú, pagalaiat pukayoat Kristus, sitá anai kasappurat, ka tubudda taú sipuoni tai Jahudi;
9 bulé kalulut aku, agairangan nia, ka sia sangamberi sirimanua, kipa ipaeerú Taikamanua, Sibaraaké manua sambat polak néné, igalaiaké sirencanaakenennia, sipinakele nia, baranangan ka panandaatnia peilé, ka tubudda taikapolak.
10 Sipinaatunia poí ka sia Taikamanua, bulé kineneiget, kalulut sapaamian, agairangan nia sangamberi sibara gege ka manua, ngamataat pusisikut paatuat Taikamanua.
11 Sigalaiakenen Taikamanua néné, iaté ka siripokat sirencanaakenennia, sitaitatakkí, baranangan siburú, iaté simatotoilá, ka sigalaiakenen Jesus Kristus Tuhanta.
12 Oto kaputotonem baga ka tubut Kristus, samba kalulut pusaraatta ka tubunia, akénangan ka sita kebebasan, masilegeri Taikamanua, bulat sibara ka tonem baga simasut.
13 Bulat paniddogatku ka tubumui iaté; buí imakarat bagamui, kalulut pangoringan siorikku kalulumui, aipoí sangamberinia néné, sibailiu katuerukatmui lé.
14 Iaté lulunia kupurerekkuk, maniddou ka matat Ukkui.
15 Sibara ka tubunia lé, arasiló ka sia sangamberi sikukuddu ka manua sambat ka polak, galai tubudda sikokoiakenen.
16 Amaniddou aku ka tubut Taikamanua sipulubeunan, bulé iparon pupaatuananmui, kalulut Ketsatnia.
17 Bulé kalulut tonem bagamui ka tubut Kristus, kuddu Kristus ka bagat paatuatmui, oto nuntut bagangan lé ipubobongan samba ikukup-kup'aké puririmanuamui.
18 Amaniddou aku ka tubut Taikamanua, bulé makeré kaooi nia nukeruji kam nia sambamui sapaamian Taikamanua, kipa lionia, nantania, buaknia, samba kerunia nuntut bagat Kristus,
19 sitaioi isinogi nia pupaatuananda sirimanua. Bulé nuagai kam nuntut bagat Kristus, pat tim ka tubumui pagalaiat putubuat Taikamanua simasut.
20 Oto kalulut geget Taikamanua, sipugagalai ka tubutta, galaiakénangan nia ka tubutta Taikamanua, saliu peilé siniddouta elé sipinaatutta.
21 Bulé sarat Taikamanua tuumun'aké simariu-riu, pat paninínangan tubunia ka paamian, kalulut Jesus Kristus. Tuumun'aké lé Taikamanua, teret buru-burú! Amen.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA