Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Jadi, haitu pura-pura sabana yaku, Paulus, nosambaya ka Alatala. Yaku nitarunggu sabana nompatolele Kareba Belo i Yesus Kristus ka komiu tona ledo toYahudi.

² Natantu niepemiumo Alatala nombadekei ka yaku pokarajaa mompatolele Kareba Belo ka komiu tona ledo toYahudi. Pokarajaa haitu nidekeiNa ka yaku lako ri kabelo nu raraNa.

³ Ia mboto nompopaisani patujuNa ka yaku anu dopa nisani nu manusia bara ipia. (Nitulisiku sakide ri bavona,

⁴ bo ane rabacamiu, rasanimiu muni anu nipopaisani ka yaku, haitumo, patuju nu Alatala anu nipakadupa riara nggatuvu i Kristus.)

⁵ Ri tempo nggaulu nia haitu dopa nipopaisani ka manusia. Tapi sii-sii Nosa Gasa nu Alatala nompopaisani nia nu Alatala haitu ka kami suro-suroNa bo *nabi-nabiNa.

⁶ Iveimo nia nipopaisaniNa: tona ledo toYahudi mantarima belo lako nte Alatala mosanggani-nggani ante *toYahudi. Bo tona ledo toYahudi mosanggani-nggani nte toYahudi majadi sipa-sipa ri sangu karo, haitumo karo i Kristus. Bo ratarimara munimo pura-pura anu nijanji nu Alatala ka tona nosangu rara nte i Yesus Kristus. Pura-pura haitu ratarimara sabana niparasayara Kareba Belo.

⁷ Lako ri kabelo nu raraNa, Alatala nombadekei ka yaku pokarajaa nompatolele Kareba Belo. Bo lako ri kuasaNa anu nokarajaa riara ntaiku, nipopompakuleNa yaku mompapola pokarajaa haitu.

⁸ Yaku natueipa pade pura-pura todea nu Alatala ntanina. Tapi naupa ivesia, Alatala nabelo mpuu nte yaku bo nidekeiNa ka yaku pokarajaa mompatolele Kareba Belo ka komiu tona ledo toYahudi. Kareba haitu notesaki kabelo i Kristus anu naoge mpuu, ledo rapakuleta mombarekena.

⁹ Yaku nidekeika pokarajaa muni mompopaisani ka pura-pura tona berimba Alatala nompakadupa niaNa, haitumo, niaNa mompopakasangu toYahudi bo tona ledo toYahudi lako ri posangu rarara nte i Kristus. Lako ri lamba pamulana, Alatala Topompajadi dunia hitu dopa nompopaisani niaNa haitu.

¹⁰ PatujuNa ala sii-sii pura-pura *malaeka bo anu nakuasa ri langi mangisani notoNa nompasiayu mpengaya-ngaya, sabana rakitara niaNa haitu rapakadupa ante todea topomparasaya i Kristus.

¹¹ Alatala novia pura-pura haitu nangoseaka patujuNa anu nipakatantuNa mami lako ri lamba pamulana. Bo patujuNa haitu nipakadupaNa ante kakava nTuputa Yesus Kristus.

¹² Kita nomparasaya i Kristus bo kita nosangu rara ante Ia, jadi domo makaja rarata mosinggava nte Alatala riara posambayata, bo nisanita ratarimaNa.

¹³ Jadi, sampesuvu-sampesuvu, kuperapi nte komiu, nee maupu raramiu nangepe yaku nitarunggu, sabana pura-pura kasusa nirasaiku sii-sii manggeni belo ka komiu.

¹⁴ Jadi, ane yaku nantora kanoto nu Alatala bo niaNa lako ri lamba pamulana, yaku nantaputu nosambaya ri ngayo nTuamata Alatala.

¹⁵ Iamo Tuama nu pura-pura anu naria, nau kita ri dunia, nau isi suruga.

¹⁶ Naoge mpuu kuasa bo kabelo nu Alatala! Jadi kuperapi ala Ia mpuu-mpuu mompakaroso rara ntaimiu ante Nosa GasaNa

¹⁷ sampe i Kristus bate-batena monturo riara ntaimiu sabana komiu nomparasaya Ia. Bo kuperapi ala katuvumiu rakuasai nu tove i Kristus bo toveNa haitu mokale riara ntaimiu.

¹⁸ Kuperapi nte Alatala ala komiu mosanggani-nggani ante pura-pura todeaNa ntanina, mamala mangisani bo mombarasai kaoge nu tove i Kristus ka kita. Ledo rapakule nu manusia mombapaha ntoto tove i Kristus haitu bo ledo rapakuleta mombasuka kambasona. Kuperapi nte Alatala ala komiu bate-batena mombarasai tove i Kristus haitu riara katuvumiu, ala mamala rapasialamiu pura-pura inggu nu Alatala.

¹⁹ (3:18)

²⁰ Alatala masipato rabilata! Nabaraka mpuu kuasaNa anu nombatulungi kita riara katuvuta. Ante kuasaNa haitu, Alatala nompakule novia nelabipa pade pura-pura raperapita atau rapekirita.

²¹ Alatala masipato ratoiya ntodea topomparasaya. Ia masipato ratoiya sii-sii bo sampe ri kasae-saena sabana anu nipovia i Yesus Kristus. Amin!

Efesus

Video Efesus 3

Ikuti Kami:

KONTAK | PARTISIPASI | DONASI