¹ Sap em in Alap zere mo dang tininak de walas, zen in zep zere mo kim de hen lowehen hap em ealp gwe-gwen.
² Dikire kwasang-kwasangna eno mae mo lowe hennnak mam gwek– men kirekam Kristus nesa kwasang gwibiridakake, hendep zep neno mae mo kareksa dikim ngan gulsuzimdin hip Zenaka zerguku. Zeno syala in, Alap man tangan sam gwesibirki.
³ Emsa mes Alap hlil inki, zep ebe mae hap hom dakastilzimꞌin– auhu-kama hole-hle san de etan ang ta gwen hapye. Zep kahalo hap de hole-hle naban te-ala beya gwen hap de hole-hle naban emki langa sosun. Ki hwena emsa sa aha zi nenbiridal, “Zen Alap mo hlil irin zisi hom.”
⁴ Eno mae mo ek tihi nakon bap zen ol-wak ola wet so gwen– hen swi ol weha mae naye. Kirekam de ola hom ebe mae hap dakastilzimꞌin. Diki eno mae mo ek tihi nakon anakare ol zen wet so gwen– “Bian Alap, Em asa sam ta gwibirida.”
⁵ Emki eenlala gwen, swi enlala enkam de gwen zini, kahalo soson wenya, hen te-ala beya gwen hap de hole-hle wenya, zen molya Alap ne Kristus nik mo irik ginnik biti gwek. Te-ala hap de hole-hlena in, zeno nwe-masena apdenak– yang tasin dowalsa de boklesa kom so gweblan nabanye.
⁶ Bap zen zini emsa anakan boton ta gwibin, “Alap mo jala molye kire nakon hla kuk.” Hwena karek-karekna in, dekon sa ki Alap mo serkam de jala hatal– men zen Zenaka betek nebla srem gwe-gwenan, zebe mae hap denaye.
⁷ Zep kirekam de boton tam zi niban, bahem golesiri gwe-gwen.
⁸ Sap em hen orep enho kawesin nike lowehe gwek, hwena angkam Bian mes enho nakon emsa ngatan tabirki. Zep angkam ngatanna in zao en em lowehe gwen.
⁹ Sap ngatanna in, dekam sa eno mae mo lowehen nakon dawemna wet so gwer– dawemsa de aha zi hip goltrei gwizimdin hip de enlala, dam-dam enkam de gwen enlala, hen eiwa de enlala naye.
¹⁰ Zen in zep em ealp gwe-gwen– ekakim dawemkam tame ul gwek, “An Bian mo dwam gwibinni. An zeno dwam gwibin nika hom.”
¹¹ Kawesinnik de lowehe gwen zi mo syala zen waba hap. Desa emki hwaulsun. Hen anakan emki jalse gwibirida gwen, “Desan bahem ang ta gwen. Zen karekna.”
¹² Sap enlala kawesin zini insa aningkim syal nei gwibirin, ol enkam de desa aisil gwibinkim, zen hom tangan Kristen zini nebe mae hap dakastilzimꞌin.
¹³ Hwena ngatan zi mo lang nakore ngatanna in kim nebon mae zil ane gwenan, zen dekam zebe anakan tame ul gwenan, “Hare kirekam de syal gwibinni, zen karek sake.”
¹⁴ Zen in zep terya anakarekam da gwenan, “Men zen nini truweꞌan, em luk tan. Em in zen tok-tok makan lowe heꞌan, em engaya gwen. Sap Kristus man ebon mae onak zil ineꞌara.”
¹⁵ Zen in zep, ere mae mo lowe henna, emki dawem enkam kara gul gwen. Enlala joblo-top zi mo kim bahem lowehe gwen.
¹⁶ Bian de ebe mae hap dawemsa de aha zi hip goltreizimdin hip de orasa kles tyasik gwizimdinkim, desan en em ang ta gwen. Sap langna an angkam man tangan jal-jala taman kiniꞌan.
¹⁷ Mamakkam bahem lowehe gwen, hwena emki enlalasa anakan langa tasik gwen, “Bian mo abe hap de dwam gwibir-blinna, diki an de kirekam moye.”
¹⁸ Ho mamakna bahem mamkam otde gwibin– dekon de emamak gwe-gwen hapye. Ki hwena eno mae mo lowe henna dekon sa tangan ayang sik mo kim hai gwer. Hwena diki Alap mo Enho Zen eno mae mo enhonak suwen.
¹⁹ Alap hap de terkam em enaka tatete ta gwibin– sap zere mo ebpa ola kore terkam, sap Kristus hup de terkam, hen Alap mo Enho nakore terkam. Eirzi-Biasa de isrip-sri gwizimdin terya dikire eno mae mo enhonak beya gwek.
²⁰ Hen banakare maesa de goltowe gwenkam, emki Bian Yesus mo bosekam Alapsa anakan gu sone gweblan, “Ema asa sam tanda.”
²¹ Nen apdekame Kristus mo timnik biti gwek, zen in zep nen nenaka blikip gwesibirida gwen– san de Kristus Zenaka de blikip gwesiblinna kiye.
²² We walya ere mae mo zisi em blikip gwesibirida gwen– men kirekame Bian Yesussu blikip eisik gweblananke.
²³ Sap Alap mes zi hip golzimki– zen de we walsya nol gwibiridan hap denaye, in kirekam hen Kristus hup golblakake, Zen de jemat-jematsa nol gwibiridan hap. Sap Zen Zen nola. Nen an zeno taha-tana makane lowe heꞌan.
²⁴ Zep jematna nen men kirekame nesa de ngaya tabin hip de Zini Kristussu blikip eisik gweblanan, we walya zen hen kirekam em zi wal omka blikip gwesibirida gwen.
²⁵ Zini we wal omka emki hen kwasang gwibirida gwen– men kirekam hen Kristus zere mo jemat yawala kwasang gwibirkike. Zen zep hendep zere mo timni golguku–
²⁶ dekam de jemat zem insa ngan gwehen tangan naka Zen bi gwibin hipye. Nen zebe baptis tabin sin ang ta gwenan. Dekam zep nwe-mase gwe-gwenan: Zen mes nesa hokam hen zere mo ol dawemkam ngan tasibirki.
²⁷ Zen mae hap ki kirekam nesa syal gwibirki: Dekam de hendep denaban zere mo we makan golgwe gwen hap, serkam de nwe-awes naka. Zen zep nesa aha-en aha-enkam oto tasik gwibirida– nen dikim saher sremkam, karek mae sremkam, hen enho kles gwesin sremkam ngan gwehen nik zere han zergwe gwen hap.
²⁸ Zen in zep hen zini em kirekam em we wal omka kwasang gwibirida gwen– san de ere mo timni kiye. Sap zi de we zemka kwasang gwe-gwibinni, zen apdenak– zere mo timsi de kwasang gwibin nibanye.
²⁹ Zini nen hom tangane nere mae mo timni da kulsuk gwenan, hwena dawemkame kara ul gwenan. Zen kirekam hen Kristus jematna nesa zere mo tim makan kara gul gwenda.
³⁰ Sap jematna nen an eiwa Kristus zere mo timni.
³¹ Men kirekam Alap mo olak lwak, “Zini an-bi zemka hli sonkam– dekam de we zeban aha-en en hapye. We-zi darena in dekam Alap mo nwenak san de aha-ere timni kiye.”
³² Alap mo ola in, zen olk san de tanganna, hwena zeno dam gulsunnu ahana, Kristus de jemat zeban aha-ere tim makan golgwen hap.
³³ Zen in zebe hen emsa gubiridaꞌan: Zini we wal omka em ere mae mo tim makan kwasang gwibirida gwen. Hwena we walya hen zi wal omka em blikip gwesibirida gwen.