Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Anggo domma rasei ibahen Jahowa Naibatamu bangsa sipajuh begu-begu simada tanoh sibereon ni Jahowa Naibata bamu, gabe isoluk ham tanoh ni sidea ai, anjaha iiani ham huta pakon rumah ni sidea,
2 maningon papuligonmu do bamu tolu huta i tanohmu, na sihol bereon ni Jahowa Naibatamu bahen parbagiananmu.
3 Maningon pasirsironmu do dalan hujai, anjaha bagi tolu bahenonmu parbalogan ni tanohmu, sibereon ni Jahowa Naibatamu bamu bahen parbagiananmu, ase boi maporus hujai sibunuh jolma.
4 On do uhum bani sibunuh jolma, na maporus hujai ase manggoluh ia: Anggo ibunuh sada halak hasomanni, tapi seng niutuskonni, anjaha seng dong sogam ni uhurni hinan hu bani,
5 (limbagani, laho ma sada halak rap pakon hasomanni hu harangan laho manroboh hayu, iambungkon ma hapakni laho manroboh hayu ai, hape mistak ma mata ni hapak ai humbani songkirni, ihonai ma hasomanni ai lanjar matei), jadi boi ma ia maporus hu sada humbani huta ai, ase manggoluh ia,
6 ase ulang iayak sipambalas ai jolma pamunuh ai ibagas milas ni uhurni, gabe jumpahsi halani daoh ni dalan ai, anjaha ibunuh ia, age pe namin seng patut ope uhum hamatean mangonai bani, halani na so sogam hinan uhurni bani.
7 Halani ai do ase huhatahon hu bamu, maningon papuligonmu do bamu tolu huta.
8 Anjaha anggo lambin ipabolag Jahowa Naibatamu parbaloganmu, songon na dob binulawankon-Ni hubani ompungmu, anjaha saud ibere bamu ganup tanoh, na dob pinarbagah-bagah-Ni bereon-Ni hubani ompungmu,
9 anggo ihaporluhon ham do mangkorjahon haganup tonah on, na hutonahkon bamu sadari on, laho mangkaholongi Jahowa Naibatamu pakon marparlahou bani dalanni sadokah ham manggoluh, maningon tambahonmu ope tolu nari huta ambah ni na tolu huta ondi,
10 ase ulang durus daroh ni na so marpipot i tongah-tongah ni tanohmu, na sihol bereon ni Jahowa Naibatamu bamu bahen parbagianan, ase ulang marsapata bamu daroh ai.
11 Tapi anggo sogam uhur ni sada halak mangidah hasomanni, gabe ionggopi ia anjaha idorab, anjaha ihonai ia pala matei, dob ai lintun halak ai hu sada humbani huta ai,
12 maningon suruhon ni pangintuai ni huta ai ma suruhanni mangalopisi hunjai, anjaha ondoskononni ia hu tangan ni sipambalas ai, ase matei ia ibunuh.
13 Seng bulih malang uhurmu mangidahsi, maningon purpurhononmu do sapata ni daroh na so marpipot hun Israel, ase marhasonangan ham.
14 Seng bulih paosor-osoronmu parbalogan ni hasomanmu, na pinasuk ni ompung na lobei ibagas parbagiananmu, na sihol teanonmu i tanoh sibereon ni Jahowa Naibatamu bamu bahen parbagiananmu.
15 Seng asi sahalak saksi jongjong mangimbang sada halak pasal parkara hajahaton barang dousa, atap na ijahanin pe, na dob hinorjahonni; maningon na sinaksihon ni dua barang tolu saksi do ase sah hata ai.
16 Anggo jongjong sada saksi parladung mangimbang sada halak laho mangaduhonsi pasal sada panlanggaron,
17 maningon jongjong ma dua halak na marsalisih ai i lobei ni Jahowa, i lobei ni malim pakon panguhum na marhorja bani panorang ai.
18 Dob ai tangkas ma pareksaon ni panguhum ai parkara ai, anjaha tonggor ma, anggo sisaksihon ladung do saksi ai, anjaha lepak do pangaduanni ai dompak hasomanni ai,
19 jadi maningon bahenon nasiam ma bani usih songon na sinurahon ni uhurni sihol bahenonni bani hasomanni ai; sonai ma purpurhononmu hajahaton ai hun tongah-tongahmu,
20 ase ibogei halak na legan ai, gabe mabiar sidea, anjaha lang be inunut mangkorjahon hajahaton na sonai ai i tongah-tongahmu.
21 Seng bulih malang uhurmu mangidahsi, maningon hosah do abul ni hosah, mata abul ni mata, ipon abul ni ipon, tangan abul ni tangan, nahei abul ni nahei.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA