Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 "Kenca nggo ikernepken TUHAN Dibatandu rayat negeri si IberekenNa AteNa man bandu e, janah kenca ibuatndu kota-kota ras rumah-rumahna dingen nggo kam tading i negeri e,
2 bagi telukenlah daerah e. I bas tep-tep sada daerah litken sada kota si la ndauhsa i bas kota si deban nari, gelah adi lit kalak munuh banci ia kiam cebuni ku kota e.
3 (Ul 19:2)
4 Adi lit sekalak munuh alu la iarapna, janah si ibunuhna e labo musuhna banci ia kiam ku sada kota i bas kota si telu e, maka ia aman i je.
5 Umpamana, lit dua kalak lawes ku kerangen nabah kayu. Sanga nabah kayu, sekalak i bas si dua e lepas kapakna i bas tangkena nari, dingen ngkenai temanna ndai seh mate; emaka banci ia kiam ku sada kota i bas kota si telu ndai gelah ia aman.
6 Adi sada ngenca kota ingan aman, banci jadi ndauhsa ku je, emaka keluarga si ertanggung jawab erbahan pembalasen i bas pembunuhen e banci kari nangkap si munuh e, janah perbahan rawana, ibunuhna kalak si la ersalah, sedangken kalak ndai munuh labo alu sengaja, sabap labo musuhna si ibunuhna e.
7 Em sabapna maka kusuruh kam nerapken telu kota.
8 Adi ipebelang TUHAN Dibatandu daerahndu alu mereken man bandu kerina daerah si IpadankenNa sue ras si IkatakenNa man nini-ninindu,
9 maka arus ipilihndu telu kota nari. (Adi atendu keleng man TUHAN Dibatandu, nggeluh rikutken si IajarkenNa, janah ilakokenndu asa kai si kuperentahken man bandu wari enda, ibereken TUHAN man bandu kerina negeri e.)
10 Lakokenlah emaka ula kam erdosa erkiteken ngukum mate kalak si la ersalah i negeri si ibereken TUHAN AteNa man bandu.
11 Tapi umpamakenlah lit sekalak nggempangi imbang-imbangna, dingen alu sengaja munuh imbangna e jenari lompat ia ku salah sada kota e guna ndatken perlindungen.
12 Adi bage soalna, peminpin-peminpin kotana jine nuruhsa gelah ia itangkap, jenari iendeskenna man keluarga si ertanggung jawab erbahan pembalasen i bas pembunuhen e, gelah banci ia ibunuh.
13 Ula cidahken perkuah ate man bana. Bersihkenlah Israel i bas pembunuh si bage, gelah kam selamat."
14 "Ula piser baleng juma temanndu si balengen, si nggo itentuken nai-nai nari i negeri si ibereken TUHAN Dibatandu man bandu."
15 "La cukup adi sekalak saksi ngenca mbuktiken kejahaten sekalak jelma; si sitikna arus lit dua kalak saksi.
16 Adi lit sekalak jelma atena meneken kalak si deban alu erbahan pengadun palsu kerna sada kejahaten,
17 arus maka duana ia iadapken ku ingan ersembah, gelah iadili imam ras hakim si sanga ertugas paksa e.
18 Arus maka manjar-anjar iselidiki hakim persoalen e. Adi pengadunna kerna temanna kalak Israel e terbukti palsu,
19 ia arus iukum sue ras ukumen si arusna kin ialoken kalak si iadukenna e. Alu bage ibersihkenndu me kejahaten si bage rupana.
20 Kenca bage tentu kerina kalak si deban si megi kejadin e; mbiar ia, emaka ndigan pe lanai ilakoken kalak perbahanen si jahat e.
21 Ula cidahken perkuah atendu i bas persoalen si bage rupana. Ukumen kalak si bage, eme kesah gancih kesah, mata gancih mata, ipen gancih ipen, tan gancih tan, ras nahe gancih nahe."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA