Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Bani tahun parlobei dob raja si Darius, anak ni si Ahasveros, humbani ginompar ni halak Madai, na bangkit gabe raja manggomgom halak Kasdim,
2 bani tahun parlobei ni panrajaionni ai, ahu si Daniel, dapot uhurhu ma ibagas surat-surat in bilangan ni tahun domu hu bani hata na nilumbahon ni Jahowa hubani Nabi Jeremia, ai ma pasal Jerusalem, na maningon tarulang pitu puluh tahun dokahni.
3 Dob ai hudompakkon ma Tuhan Naibata, marsombah marhitei tonggo, elek-elek, puasa, marhiou guni ampa margulu abuan.
4 Martonggo ma ahu bani Jahowa Naibatangku, hubahen ma panopotion dousa, ningku ma, “Ham Tuhan, Naibata na timbul anjaha na majombut, siramotkon padan ampa idop ni uhur dompak halak na mangkaholongi Ham ampa na mandalankon parentah-Mu.
5 Domma mardousa hanami anjaha marsalah, manjahati anjaha manlawan; manimbil do hanami humbani parentah-Mu ampa humbani titah-Mu.
6 Seng itangihon hanami juakjuak-Mu, nabi-nabi ai, na marsahap ibagas goran-Mu hubani raja-rajanami, kopala-kopalanami, ompungnami ampa hubani haganup bangsa na i nagori in.
7 Bamu do Tuhan hapintoron in, tapi maila do anggo hanami nuan, hanami halak na hun Juda, pangisi ni Jerusalem ampa haganup halak Israel, ai ma na dohor ampa na daoh marianan bani haganup nagori pambuangan-Mu bani sidea, halani pangoseion ni sidea Bamu.
8 Ham Jahowa, patut do hanami tarbador, age raja-rajanami, kopala-kopalanami ampa ompungnami, ai mardousa do hanami dompak Ham.
9 Tapi Bamu do Tuhan, Ham Naibatanami, idop ni uhur ampa hasasapan ni dousa. Tongon, sipanlawan do hanami,
10 anjaha seng itangihon hanami sora ni Jahowa Naibatanami marhitei na mambalosi titah-Ni, ai ma na pinadas-Ni bennami marhitei juakjuak-Ni nabi-nabi ai.
11 Haganup do Israel manlanggar titah-Mu anjaha marbalik, manjua manangihon sora-Mu. Jadi mangonai ma bennami bura-bura pakon bija na tarsurat bani buku titah ni si Musa, juakjuak ni Naibata, halani na mardousa ai hanami dompak Naibata.
12 Ipasaud ma hata-Ni, na dob niluarhon-Ni ai bennami ampa bani sipanrajai, na manguhum hanami, marhitei na parohkon hamagouan banggal bennami, ai ma na seng ongga masa i toruh ni langit, songon na masa bani Jerusalem ai.
13 Romban hubani na tarsurat bani titah ni si Musa, sogop do haganup hasedaon on bennami, tapi lanjar do seng isubut hanami uhur ni Jahowa, Naibatanami, marhitei na paubahkon uhur humbani hajahatonnami ampa na mardiateihon hasintongan-Mu.
14 Halani ai do ase isurahon Jahowa hamagouan on anjaha ipamasa bennami, ai pintor do Jahowa Naibatanami bani haganup pambahenan-Ni, na binahen-Ni ai, tapi lanjar do seng itangihon hanami sora-Ni.
15 Ai pe, Ham Tuhan Naibatanami, na dob mambobahon bangsa-Mu luar hun Masir marhitei tangan na gogoh ampa na pajongjong goran Bamu ronsi sadari on, sipardousa do hanami anjaha siparjahat.
16 Ham Tuhan, domu hubani haganup hapintoron-Mu, sai pasurut Ham ma ringis-Mu pakon gajag ni gila-Mu hun Jerusalem, dolog-Mu na pansing ai; tongon halani dousanami ampa halani hajahaton ni ompungnami do, ase gabe umpama Jerusalem ampa bangsa-Mu bani bangsa na inggot hanami.
17 Ai pe, Ham Naibatanami, tangihon Ham ma tonggo ni juakjuak-Mu pakon pangindoanni, anjaha halani goran-Mu, Ham Tuhan, sondangkon Ham ma bohi-Mu bani ianan na mapansing in, na dob tarulang in.
18 Ham Naibatangku, sai pateleng Ham ma pinggol-Mu, anjaha tangar Ham ma; mangkawah ma Ham, tonggor Ham ma hasedaonnami on ampa huta in na dob targoran bani goran-Mu! Tongon sedo halani hapintoronnami ase isombahkon hanami pangindoannami on Bamu, tapi halani idop ni uhur-Mu na banggal in do.
19 Ham Tuhan, tangihon Ham ma! Ham Tuhan, maidop ma uhur-Mu! Ham Tuhan, pardiatei anjaha pasaud Ham ma in! Ulang ma padokah-dokah Ham marhalanihon ni Ham, ale Naibatangku! Ai huta-Mu ai ampa bangsa-Mu in, marpanggorani hu Bamu do.”
20 Jadi sanggah na marsahapi ai ope ahu anjaha martonggo, mansopotkon dousangku pakon dousa ni bangsangku halak Israel, anjaha hupadas pangindoankai hu lobei ni Jahowa, Naibatangku, ai ma pasal dolog ni Naibatangku na mapansing ai.
21 Sanggah na marsahapi ai ope ahu ibagas tonggo, roh ma si Gabriel, ai ma halak na dob huidah ibagas pangungkabon, habang doras manjumpahkon ahu, ai ma bani panorang panggalangonkon bodari.
22 Roh ma ia, nini ma hu bangku, “Ale Daniel, na roh do ahu laho patugahkon bam hatorangan ampa pangarusion.
23 Bani pamungkah ni tonggomu, luar do sada hata, anjaha roh do ahu laho pabotohkon ai bam, ai haholongan ni uhur ni Naibata do ho; halani ai parimbagaskon ma hata in anjaha artihon pangungkabon in.
24 Pitu puluh tahun minggu do itotapkon pasal bangsamu ampa hutamu na pansing in, ase marujung hajahaton ai, salosei dousa ai, ase ibahen pardearan pasal hasalahan ai, iparoh hapintoron sisadokah ni dokahni, ipasaud pangungkabon ampa panjahaion ai, anjaha iminaki ianan na tang pansing ai.
25 Ase botoh anjaha paruhurhon ma: Humbani panorang dob luar hata ai, ase ipasuang anjaha ipauli use Jerusalem ronsi panorang parroh ni na mininakan ai, raja ai, pitu tahun minggu ampa onom puluh dua tahun minggu do; ulakan do paulihon huta ai, maralaman ampa marpasar, age pe panorang hasosakan ai.
26 Anjaha dob salpu na onom puluh dua tahun minggu ai, ibunuh ma sada halak na mininakan seng pala mardalan uhum, anjaha iparseda bala ni raja na sihol roh ai ma huta ampa ianan na pansing ai. Roh do ujungni ai marhitei bah banggal, anjaha sai masa do ronsi ujungni hasedaon, songon na dob tinontuhon hinan.
27 Anjaha ibahen ia ma padan na toguh hubani buei halak, sada tahun minggu dokahni; satongah tahun minggu parontihononni do galangan sisayaton ampa galangan sipanganon; anjaha masa do bani ianan ma mapansing ai hagigi na mabajan, paima iuseihon hasedaon ampa hamagouan bani sipangagou ai.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA