Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Darius kalak Medi, anak Ahasweros, nggo jadi raja i bas kerajan Babilon.
2 I bas tahun si pemena kenca ia jadi raja aku sangana mpelajari pustaka-pustaka si badia, janah rukur aku kerna paksa si pitupuluh tahun Jerusalem terulang, sue ras si ikataken TUHAN man Nabi Jeremia.
3 Emaka ertoto aku alu tutus man Tuhan Dibata, mindo man BaNa alu mengisngis, erpuasa, make uis guni, janah kundul i bas abu.
4 Ertoto aku man TUHAN Dibatangku dingen kukataken dosa-dosa bangsangku. Ningku, "O Tuhan, Kam kap Dibata si mbelin, emaka ipehaga kami Kam. Kam tetap i bas PadanNdu janah KekelengenNdu la mobah man kalak si erkeleng ate man BaNdu janah ngelakoken kai si IperentahkenNdu.
5 Kami nggo erdosa, jahat, dingen salah perbahanen kami. La ilakoken kami kai si IperentahkenNdu man kami, janah isilahken kami si bujur si IcidahkenNdu man kami.
6 La ibegiken kami nabi-nabi suruh-SuruhenNdu, si ngerana i bas GelarNdu man raja-raja kami, man peminpin-peminpin kami, man nini-nini kami, ras man kerina bangsa kami.
7 O Tuhan, Kam tetap ngelakoken si bujur, tapi tetap ipekitik kami diri kami jine. Si enda kerina nge kami ngelakokenca, subuk si ringan i taneh Juda ras Jerusalem, bage pe kerina kalak Israel si IkerapkenNdu ku negeri-negeri si ndauh ras si ndeher erkiteken la ia patuh man BaNdu.
8 Raja-raja kami, peminpin-peminpin kami, bage pe nini-nini kami, perbahanenna kerina man kemelanken, janah erdosa ia man BaNdu, o Tuhan.
9 Kam melias dingen dem alu pengalemi dosa, aminna gia kami nggo nimbak Kam.
10 La ibegiken kami Kam, o TUHAN Dibata kami, tupung IsuruhNdu kami nggeluh rikutken Undang-undang si NiberekenNdu man kami arah nabi-nabi, suruh-SuruhenNdu.
11 Kerina Israel ngelanggar Undang-UndangNdu, janah la nggit megikenca kai si IkatakenNdu. Erdosa kami man bandu, janah erkiteken si e IdabuhkenNdu man kami sumpah si tersurat i bas Undang-undang Musa, suruh-SuruhenNdu e.
12 Kai si nggo IkatakenNdu, IlakokenNdu kerina man kami ras man peminpin-peminpin kami. Belinen ukumen si IdabuhkenNdu man Jerusalem asangken man kerina kota-kota i doni enda;
13 IdabuhkenNdu man kami kerina ukumen si ituriken i bas Undang-undang Musa. Tapi amin bage gia, o TUHAN Dibata kami, genduari pe lenga icubaken kami mperiahken UkurNdu alu nadingken dosa-dosa kami, tah pe ngikutken kai si ngena AteNdu.
14 O TUHAN, Dibata kami, Kam nggo sikap ngukum kami, janah nggo me kami IukumNdu, sabap Kam tetap ngelakoken si bujur, janah kami la megiken Kam.
15 O Tuhan Dibata kami, IcidahkenNdu KuasaNdu alu maba BangsaNdu ndarat i Mesir nari, janah KuasaNdu e tetap denga nge iinget. Tapi kami nggo erdosa, nggo salah perbahanen kami.
16 Erkiteken KiniulinNdu IcidahkenNdu man kami i bas paksa si nggo lepas, ulanai min AteNdu nembeh man Jerusalem genduari. KotaNdu kap kota e, DelengNdu si badia. Kerina bangsa-bangsa sekelewet kota e, megombang man Jerusalem ras man BangsaNdu erkiteken dosa-dosa kami ras kejahaten si ilakoken nini-nini kami.
17 O Dibata, begiken pertotonku ras pingko-pingkongku. Panteki mulihi Rumah PertotonNdu si nggo ikernepken; pajekken mulihi gelah kerina kalak meteh maka Kam kap Dibata.
18 Begikenlah kami, o Dibata; tataplah kami, janah perdiateken kesusahen kami ras kiniseran kota si igelari alu GelarNdu. Ertoto kami man BaNdu erkiteken Kam perkuah, labo erkiteken perbahanen kami bujur.
19 Tuhan, dengkehkenlah kami Tuhan, alemilah kami Tuhan begikenlah min kami, tedisken! Ulanai pedekah-dekah, gelah kerina kalak meteh maka Kam kap Dibata. Kota enda ras bangsa enda SikerajangenNdu kap."
20 Terus aku ertoto, ngakuken dosa-dosangku ras dosa-dosa bangsangku Israel, janah mindo alu mengisngis man TUHAN Dibatangku gelah IpajekkenNa mulihi Rumah Pertoton si Badia e.
21 Tupung aku ertoto denga, malekat Gabriel, si nggo kuidah i bas pengenehenen si perlebe, reh kabang ku inganku. Sanga e nggo seh paksana mpersembahken persembahen si karaben.
22 Iterangkenna man bangku nina, "O Daniel, aku reh ku jenda nampati kam gelah ierti kam nubuat e.
23 Tupung ibenakenndu mindo alu mengisngis man Dibata, IaloiNa kam. Keleng kap AteNa man bandu, janah erdandanken si e aku reh lako nurikenca man bandu jabapna. Genduari perdiatekenlah dage tupung kuterangken man bandu pengenehenen e.
24 Dekahna paksa si nggo itetapken Dibata guna mbebasken bangsandu ras kotandu si badia e i bas dosa ras kejahaten nari eme pitu kali pitu puluh tahun. Kenca si e dosa ialemi janah keadilen rasa lalap pajek, gelah pengenehenen ras nubuat e jadi, janah Rumah Pertoton si Badia itangkuhken mulihi.
25 Perdiatekenlah enda, janah ertikenlah: Mulai i bas paksa ibereken perentah lako majekken Jerusalem mulihi, seh paksa kerehen sekalak peminpin si ipilih Dibata, dekahna pitu kali pitu tahun. I je ipanteki me mulihi Jerusalem, rikut ras pasar-pasarna ras benteng-bentengna, janah kota e pajek dekahna pitu kali enem puluh tahun. Tapi paksa si e, eme paksa kesusahen.
26 Janah i bas pengkeri-kerin paksa si e, peminpin pilihen Dibata e ibunuh la arah bujur. Kota ras Rumah Pertoton ikernepken tentera raja si erkuasa si reh nerang kota e. Paksa pendungi e, reh desken banjir si mbelin, maba perang ras kecedan si nggo isikapken Dibata.
27 Raja e erbahan perpadanen si nteguh ras melala bangsa pitu tahun dekahna, janah kenca setengah i bas paksa e nggo lepas, ipengadina me persembahen asuh-asuhen ras persembahen si deban. Emaka itamaken me Gana-gana si Mejin i bas ingan si meganjangna i bas Rumah Pertoton e, janah tetap tading i je seh ku bas paksa kalak si namakenca i je mate i bas paksa si nggo itetapken Dibata."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA