Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Patolu-tahunkon dob gabe raja si Joyakim i Juda, roh ma si Nebukadnesar, raja ni Babel, hu Jerusalem, anjaha ihubu ma huta ai.
2 Jadi ipadas Tuhan ma hubani tangan ni si Joyakim raja ni Juda, ampa deba humbani parugas na humbani rumah ni Naibata; iboan do ai hu tanoh Sinear, hu rumah ni naibatani, anjaha inahkon ma parugas ai hu rumah parartaan ni naibatani.
3 Dob ai isuruh raja ai ma si Aspenas, ai ma kopala ni juakjuakni ai, ase iboan deba humbani halak Israel, ai ma ginompar ni raja pakon na sangap-sangap.
4 na poso, na so marsining, na majenges, na pandei bani haganup hapentaran, na marpambotoh, na maruhur anjaha na talup marugas i rumah bolon, laho mangajari sidea pasal surat pakon hata ni halak Kasdim.
5 Jadi itotapkon raja ai ma sipanganon siganup ari bani sidea humbani sipanganon ni raja ai ampa humbani anggur siinumonni. Maningon ajaran do sidea tolu tahun dokahni, anjaha dob salpu pe ai, ase boi sidea marugas i lobei ni raja ai.
6 Adong do i tongah-tongah ni sidea ai, na humbani halak Juda, ai ma si Daniel, si Hananya, si Misael ampa si Asarya.
7 Jadi igantih kopala ni juakjuak ai ma goran ni sidea: Si Daniel igoran si Beltsasar, si Hananya igoran si Sadrak, si Misael igoran si Mesak, anjaha si Asarya igoran si Abednego.
8 Tapi anggo si Daniel domma iputuskon ibagas uhurni, na so ra ia pabutak dirini marhitei sipanganon ni raja ai ampa marhitei anggur siinumonni ai; halani ai ipindohon ma bani kopala ni juakjuak ai, ase ipalopas ia mamantangkon ai, ase ulang butak ia.
9 Jadi ibahen Naibata ma si Daniel dapotan idop ampa holong ni uhur humbani kopala ni juakjuak ai.
10 Nini kopala ni juakjuak ai ma dompak si Daniel, “Mabiar do ahu, anggo ididah tuanku raja ai, na dob manotapkon sipanganon ampa siinumon nasiam, merungan nasiam marimbang garama na legan, hasoman nasiam magodang ai, gabe marutang hosah holi ahu halani pambahenan nasiam.”
11 Jadi nini si Daniel ma hubani siparugas, na dob pinabangkit ni kopala ni juakjuak ai marugas bani si Daniel, si Hananya, si Misael ampa si Asarya,
12 “Lajou ham ma lobei hanami juakjuakmu on sapuluh ari on; bere ham ma bennami lowoh bahen sipanganon ampa bah bahen siinumon.
13 Dob ai pardiatei ham ma rupanami sonai rupa ni garama na mangankon sipanganon ni raja ai; jadi bahen ham ma bennami juakjuakmu on romban hubani na nididahmu.”
14 Jadi ibalosi ma sidea pasal ai, gabe iuji ma sidea sapuluh ari dokahni.
15 Dob ai marujung ma na sapuluh ari ai, dearan do rupa ni sidea idahon anjaha momburan marimbang haganup garama, na mangankon sipanganon ni raja ai,
16 gabe ipadaoh siparugas ai ma sipanganon ampa anggur na dob tinontuhon ai bani sidea, anjaha ibere ma bani sidea lowoh.
17 Jadi ibere Naibata ma bani garama na ompat ai habotohon pakon pangarusion pasal haganup surat ampa hapentaran. Ia si Daniel adong do homa hapandeianni pasal panonggoran ampa nipi.
18 Anjaha dob salpu panorang na dob tinontuhon ni raja ai, ase iboan sidea hu lobeini, gabe iboan kopala ni juakjuak ai ma sidea hu lobei ni Raja Nebukadnesar.
19 Iparsahapkon raja ai ma sidea, anjaha seng dong jumpah i tongah-tongah ni sidea na dos pakon si Daniel, si Hananya, si Misael pakon si Asarya; halani ai sidea ma gabe siparugas i lobei ni raja ai.
20 Pasal haganup hapentaran pakon pangarusion, na sinungkun ni raja ai humbani sidea, sapuluh hali lompit do pentaran sidea jumpahsi marimbang haganup siparpambotoh ampa sipartondung na bani haganup gomgomanni ai.
21 Lanjar ijai do si Daniel das hubani tahun parlobei ni raja Kores.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA