Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 I bas tahun si peteluken sangana Joyakim jadi raja Juda, kota Jerusalem iserang Nebukadnesar, raja Babilon. Kota e ikepungna,
2 janah ipelepas TUHAN ia naban Raja Joyakim ras ngerampas sada bagin erta-erta Rumah Pertoton. Ibabana piga-piga kalak tabanen ku rumah pertoton dibata-dibatana i Babilon, janah erta-erta si irampasna ndai isimpanna i kamar perbendaharan rumah pertoton e.
3 Kenca bage isuruh raja me si Aspenas, eme penghulu juak-juakna, lako milih piga-piga anak perana i bas kalak Israel si ibuang e nari, si kesusuren raja ras sibayak.
4 Kalak si ipilih e arus mejile rupana pentar kal, mbages pemetehna, pedas nangkap pelajaren, janah la lit sitik pe man pandangen i bas kulana, gelah banci ia atan erdahin i bas istana raja. Aspenas arus ngajari kalak ndai ngoge ras nuratken cakap Babilon.
5 Iperentahken raja ka pe tole maka tep-tep wari arus ibereken man kalak e pangan ras anggur, seri ras si ibereken man kalak si ringan i bas istana raja. Kenca telu tahun ndalani latihen si bage, kalak ndai arus ngadap i lebe lebe raja.
6 I bas kalak si terpilih e ikut me Daniel, Hananya, Misael, ras Asaria. Kalak enda kerina i bas suku Juda nari.
7 Gelar kalak enda empatna isambari pengulu juak-juak jadi Beltasar, Saderah, Mesah ras Abednego.
8 Nggo itetapken Daniel i bas ukurna maka la ia nggit ngelanggar aturen agamana aminna pe man bana isikapken pangan ras inemen lau anggur i bas istana. Emaka ipindona penampat man Aspenas,
9 janah bekas jujuren Dibata, melias ras mesayang kal Aspenas man Daniel.
10 Tapi amin bage pe, erkiteken mbiar Aspenas kempak raja, ikatakenna man Daniel nina, "Nggo itetapken raja kai si man pangan ras inemenndu, janah adi la pagi mbestang dagingndu bagi anak perana si deban, tentu ibunuh raja aku erkiteken kam."
11 Emaka ijumpai Daniel penjaga si nggo isuruh Aspenas ngurus Daniel ras temanna si telu kalak nari.
12 Nina Daniel man penjaga e, "Pepayolah kami i bas sepuluh wari enda. Bereken gule-gulen saja pangan kami dingen lau saja inemen kami.
13 Kenca bage pepayo apai si mbestangna: kami ntah anak perana si man pangan si isikapken i bas istana e. Jenari bahanlah keputusenndu rikutken pengidahenndu kerna kami."
14 Nggit ia ngaloken pemindon kalak ndai gelah icubaken i bas sepuluh wari.
15 Kenca nggo seh si sepuluh wari ndai, teridah maka ulin rupana dingen mbestangen dagingna asangken kerina kalak si man pangan raja ndai.
16 Emaka mulai i bas paksa e nari ibere penjaga ndai ia terus man gule-gulen saja. Pangan raja ras lau anggur lanai ibereken man bana.
17 Man anak perana si empat e, Dibata mereken pemeteh ras kebeluhen kerna erbage-bage surat rikut ras kepentaren si deban. Tambah si e man Daniel ibereken Dibata pe kebeluhen lako ngertiken pengenehenen ras nipi.
18 Kenca seh paksana si telu tahun ndai, ibaba Aspenas kerina anak perana e ngadap man Raja Nebukadnesar.
19 Ercakap-cakap raja ras ia kerina, janah i bas si e, si ngenana kal ate raja eme Daniel, Hananya, Misael ras Asaria. Emaka ialoken me ia jadi pegawai istana.
20 Ula kenca la kai gia penungkunen raja tah persoalen si kuga gia si ibahan raja, anak perana si empat e beluhen njabapsa sepuluh kali lipat asangken kerina guru-guru si beluh ngoge nasip ntah pe guru-guru permangmang si lit i bas kerajan e.
21 Daniel tetap ringan i bas istana seh ngayak Kores, raja Persia naluken Babilon.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA