Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Dob ai nini si Job ma mambalosi,

² “Torang do hubotoh, sintong do sonai; anjaha sonaha ma tarbahen jolma in pintor i lobei ni Naibata?

³ Anggo mardabuh-dabuh uhurni pakon-Si, humbani na saribu, sahali pe lang mangasup ia mambalosi-Si.

⁴ Paruhur na pentar do Ia, anjaha surung Bani hagogohon. Ise ma na pahengkeng uhurni dompak-Si lanjar boi marsonang-sonang?

⁵ Ia do na paosor dolog, seng ibagas botoh ni sidea. Ia do na pabalikkon ai ibagas ringis-Ni.

⁶ Ia do na mambahen rebad tanoh on humbani iananni, meleng-eleng tiang partunggulni.

⁷ Ia do na marsahap hubani mata ni ari gabe seng poltak, anjaha ihurung do bintang marhasoman tokan.

⁸ Ia sandiri do na paherbang langit, anjaha mardalan Ia i atas gilumbang ni laut.

⁹ Ia do na manjadihon bintang pariama pakon bintang sidongdong, bintang hala pakon bintang pardangsina.

¹⁰ Ia do na mambahen habanggalon na so tardadap, ampa tanda halongangan na so tarbilangi.

¹¹ Tonggor ma, Ia montas hun lambungku, tapi lang huidah, Ia lopus hun lobeihu, tapi lang huahapkon.

¹² Anggo Ia manontapkon, ise ma na boi mangolati? Ise ma na pag mangkatahon Bani, ʻAha do na binahe-Mu in?ʼ

¹³ Seng ra Naibata pahombunkon ringis-Ni, manombah do age siurupi si Rahab Bani.

¹⁴ Sonaha ma boi balosanku Ia, tarpilihi ahu ma hata sibaloskononku Bani?

¹⁵ Age pe pintor ahu, seng tarbalosi ahu Ia, maningon mangindo holong ni atei ahu humbani Siuhum ahu.

¹⁶ Anggo dilo-dilo ahu, anjaha itangihon ahu, lanjar seng iparhatongon uhurhu, na dob tinangihon-Ni ai sorangku.

¹⁷ Ai iropuki do ahu marhitei habahaba, anjaha ipabuei ugahku seng marhala;

¹⁸ seng ilopas ahu pahosahkon, tapi ibosuri do ahu bani hapaeton.

¹⁹ Anggo pasal sigogohan do, Ia ma ai; anggo pasal uhum do, ise ma na boi mangaduhon-Si?

²⁰ Age pintor ahu, pamanganku sandiri do mamapai ahu; age pe lang marsalah ahu, dong do tong na simbei tuduhkonon-Ni.

²¹ Seng dong pamandangon ahu; seng masuk hira bangku hosahku, sobalan ma ahu bani goluh on.

²² Dob do hape ganup, halani ai ningku do, ʻRap imasabkon do na so marpipot ampa siparjahat.ʼ

²³ Anggo sompong lonsing-lonsing-Ni mamunuh, tawa do Ia mangidah pandoleian ni jolma na so marpipot.

²⁴ Domma iondoskon tanoh on bani tangan ni parjahat, ipapitung do mata ni panguhumni; anggo seng Ia mambahen ai, tor ise ma?

²⁵ Dorasan do ari-aringku salpu humbani siparlintun; habang do ai, seng sampang mangidah hadoharon.

²⁶ Podas do ai salpu songon solu hotang, songon haluhuy na manangkis sorohanni.

²⁷ Anggo huhatahon, ʻHulupahon ma hasombuhonku, hupadaoh ma posi ni bohingku, minar ma bohingku!ʼ

²⁸ Mintor bajoraon ma ahu halani sitarononku, halani hubotoh, seng tumaram seng marpipot ahu hatahononmu.

²⁹ Siparsalah do ahu, mase ma anggo sonai nunutonku loja soya-soya?

³⁰ Age pe huparidi diringku bani salju, anjaha hupaborsih tanganku marhitei sabun,

³¹ usobkonon-Ni do ahu hubagas rawang, anjaha magigi pakeianku mangidah ahu.

³² Ai seng jolma Ia songon ahu, gabe tarbalosi ahu Ia, gabe rap hanami laho hu paruhuman.

³³ Seng dong sipanolahi i tongah-tongahnami, na mangampeihon tanganni bennami na dua.

³⁴ Sai ipadaoh ma namin humbangku simambu-Ni, anjaha songgot-songgot-Ni ulang ipambibiari ahu,

³⁵ ase boi ahu marsahap Bani, seng pala mabiar; tapi seng sonai ope ahu nuan, lang tenger uhurhu.