Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Mingka appialimi Ayub angkana, "Memang, kuassengi, angkana tena nasala kana-kanannu. Mingka, antekamma lakkulle taua akkara-kara siagang Allata’ala siagang lanibeta?
2 (9:1)
3 Punna nia’ sisa’bu pakkuta’nanNa Allata’ala, manna se’re takkulle napiali rupataua.
4 Allata’ala sanna’ cara’de’na siagang sanna’ koasana; inai akkulle attahang ambaliangi?
5 Napaletteki Allata’ala monconga na tena tau angngassengi, nampa Nabulingkara’ lalang larroNa siagang sekke’Na.
6 Napage’gosoki Allata’ala buttaya sa’genna ta’goccang linoa, siagang a’gio’ benteng pattumpa’na linoa.
7 Akkullei Napisangkai Allata’ala ammumba alloa ri wattu bari’basa’, na Natanakellaia assioro’ sikamma bintoenga ri wattu bangngi.
8 Napaka’rangi langika natena ambali; Naonjo’-onjokangi dongko’na naga tamparanga.
9 Appareki barrisi’ bintoeng timborang ri langika, kammayatompa bintoeng Bidu’, Belantik, siagang Kartika.
10 Takkulleaki’ ampahangi sikontu bate pare’Na, tanikulleai anrekengi sikamma gau’ appakalannasa’Na.
11 Allaloi ri dallekangku, mingka takucinikai; numaloi ri sa’ringku, mingka tena na’nyata mae ri nakke.
12 Punna anrampasaki, inai barani ampisangkai? Yareka barani akkuta’nang angkana, ‘He, apa Nupare’?’
13 Tena Natahangi Allata’ala larroNa siagang bambanna pa’mai’Na; manna sikamma pambantuna Rahab tundu’ ngaseng todong mae ri Ia.
14 Jari antekamma lakkulle kugeakki? Kana-kana apa lakupialiangi?
15 Manna tena nakusala, apa kulleku, pantaranganna appalaka pangngamaseang battu ri Allata’ala Hakingku?
16 Ebara’ angkana appiali punna akkioka’, bata-bata’, maka ero’ tojenji ampilangngeri sa’rangku?
17 Nalicaka’ lalang ri anging puttusu’, na Natambai pa’risikku natena passabakkanna.
18 TaNapa’biangnga’ a’mai’ manna sinampe’ja; ba’lalo Napitambungianga’ pa’risi’ lompo.
19 Jari apaka musti kuewai a’gassingang? Mingka ciniki, antekamma heba’na kagassinganNa! Ebara’ angkana kupaui ri Ia angkana kukabattallangi, inai barani langkioki mange ri pangadelang?
20 Jarreki tappakku ri Ia siagang tena ku’gau’ dosa, mingka bawaku kamma kusa’ring kabalekanna napau; kana-kana assuluka ri muncengku, kamma kusa’ring nasalakanga’.
21 Tena kusala, mingka tena kujampangi. Lanrema’ attallasa’. Untu’ inakke tenamo parallu; tau salaya siagang tau annabaya, sangkammaji sarenna: rua-rua laNapanraki ngasengi Allata’ala.
22 (9:21)
23 Punna mate silalonna tau tenaya salana, poro ammakala’ji bawang Allata’ala.
24 Napassareangi Allata’ala buttaya mae ri tu dorakaya, siagang Napa’jari buta ngasemmi sikamma hakinga. Kammaminjo Nagaukang ngaseng Allata’ala, punna tena naIa, inai pole anggaukangi kammaya?
25 Allalo karo-karomi sikamma allo tallasakku, nampa allanynya’ natena nabaji’ nasa’ring.
26 Sanrapang biseang kancang, allalomi linta’ tallasakku, sallinta’ balangkoa’ anri’ba’ naung angngalle ana’ jangang.
27 Punna erokka’ ta’muri siagang ammakkala’ rannu, punna kucoba angkaluppai pa’risikku, battui ammotere’ susaku, angngondanga’; saba’ kuassengi, tuli Nasalakanga’ Allata’ala.
28 (9:27)
29 Jari punna kamma, apa kujampangi?
30 Tena sabung akkulle antangkasi dosaku!
31 Natallangnganga’ Allata’ala lalang ri ra’masaka, sa’genna manna pakeangku nakana ngaseng appakaringi’-ringika’.
32 Ebara’ angkana rupatau anjo Allata’ala, akkullei kupiali; nampa a’lampa ikambe mange andallekang ri pangadelang untu’ ampa’le’baki sikamma pa’beserangku siagang Ia.
33 Mingka tena haking ri alla’na ikambe akkulle angngadeli ikambe sipa’rua.
34 Dasi-dasi Nammari Allata’ala anghukkunga’ na Napakabella kahebakkang larroNa battu ri nakke.
35 Tena kumalla’ ri Ia na kula’bicara kamma-kamma anne, saba’ kuassengi pa’mai’ kalengku.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA