Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ “Hape sonari, halak siposonan humbangku manartawai ahu, bapa ni sidea hurang tunggung hinan huahap mangkasomani baliang sijaga biribiringku.

² Tapi aha ma gunani bangku gogoh ni tangan ni sidea ai? Ai bani sidea pe domma salpu hagogohon ai.

³ Marhalanihon ni na hurang ampa lohei, gabe laho do sidea manggagat hu tanoh horah ampa halimisan,

⁴ laho mambuat pahu hun tongah-tongah ni poyon-poyon, ampa suhat panganon ni sidea.

⁵ Hona usir do sidea hum bagas huta, anjaha hona surak do sidea songon halak panangko.

⁶ Ibagas lombang bagas mando sidea marianan, Ibagas lubang-lubang atap ibagas liang ni dolog batu.

⁷ I tongah-tongah ni rambah sidea doruh-doruh, i toruh ni tatada manggompang.

⁸ Halak na oto anjaha na mahiri do sidea, na binogbogan luar hun nagori on.

⁹ Hape sonari gabe sidoding-dodingkonon ni sidea do ahu, gabe siparumpamahonon ni sidea.

¹⁰ Magigi do sidea bangku, mandaoh-daoh sidea humbangku; anjaha itijuri do ahu bani bohingku.

¹¹ Halani domma itanggali Naibata tali ni lampolampongku anjaha ipatoruh ahu, seng malang be sidea i lobeihu.

¹² Hampit siamunku mandurgak halak na janglas-janglas, ikaiskon ahu, ipajunjun sidea dompak ahu hamagouan ni sidea.

¹³ Iparseda sidea do dalanku, anjaha ipabanggal sidea hamagouanku, anjaha ise pe lang na mangulangi sidea.

¹⁴ Songon humbani buntas ni partoguh sidea roh mandorab ahu, hun tongah-tongah ni haruntason ai sidea marrohan.

¹⁵ Songgot-songgot do manlingkubi ahu; songon pinurpurhon ni alogo hasangaponku, anjaha hasonanganku masab songon hombun.

¹⁶ Halani ai usei do uhurhu ibagas, anjaha ari-ari panaronon manjorot ahu.

¹⁷ Songon tinobak do hulingkulingku borngin, anjaha borit ni angkulangku seng marnamaronti.

¹⁸ Isontap Naibata do hiouhu ibagas hagogohon, gabe tarsongkik ahu binahenmu ai.

¹⁹ Domma isampakkon Naibata ahu hubagas hubang, gabe doskon orbuk pakon abuan do ahu.

²⁰ Doruh-doruh do namin ahu Bamu, tapi seng itangihon Ham ahu; jongjong do ahu i lobei-Mu, tapi seng marpanatap Ham dompak ahu.

²¹ Mubah do Ham bangku gabe na so paridop ni uhur; ipardakdak tangan-Mu na margogoh in do ahu.

²² Iangkat Ham do ahu laho mamurpurhon bani logou, anjaha ipaturut Ham do ahu ihabangkon habahaba.

²³ Tongon, hubotoh do, sihol bobanon-Mu do ahu hu hamatean, hu rumah, partumpuan ni sagala na manggoluh.

²⁴ Tapi tene, ai lang durdurhonon ni halak na laho mogap do tanganni, anjaha doruh-doruh bani parmaraanni ai?

²⁵ Ai lang tangis do ahu mangidah halak na susah? Ai lang horu do uhurhu mangidah halak na musil?

²⁶ Na madear do namin hupaima-ima, tapi hasedaon do roh, na siang do namin huarapkon, tapi hagolapan do das.

²⁷ Bulinsah do uhurhu ibagas, seng ra soh; ari hamagouan do mandorab ahu.

²⁸ Birong do ahu mardalani, tapi seng binahen ni mata ni ari; jongjong do ahu i tongah-tongah ni tumpuan, anjaha tangis mangindo pangurupion.

²⁹ Domma gabe hasoman ni baliang harangan ahu, gabe huan-kuan ni burung unta.

³⁰ Gabe birong do hulingkulingku anjaha mardabuhan humbangku, anjaha horah do holiholingku halani milasni.

³¹ Mubah do sora ni husapingku gabe tangis-tangis, anjaha sora ni tulilangku gabe doruh-doruh.”