Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Tapi genduari aku igombang-gombangi kalak si nguda. Nai, la kuakap lit erga kai pe bapana. Emaka ras biang permakan biri-biringku pe la kubere ia.
2 Man bangku la lit ia gunana, sabap nggo lesap kap gegehna.
3 Geluhna mesera, kekurangen dingen kelihen, seh maka ikilkilina urat kayu kerah-kerah i gurun si melungen.
4 Dukut-dukut si turah i gurun pasir iruahna, jenari ipanna uratna aminna gia la lit nanamna.
5 Ipelawes kalak ia i bas jelma si nterem nari, desken sekalak pinangko, ia isuraki.
6 Terpaksa gua-gua man inganna tading, i bas lubang si ikali i bas taneh, tah i bas lingling.
7 I bas taneh si mesawang erbaung ia bagi rubia-rubia, i teruh rambah-rambah, munpun ia ras teman-temanna.
8 O kalak si la lit ergana, la lit gelarna, kalak si ipaksa lawes nadingken negerina.
9 Tapi genduari aku nggo jadi kuan-kuanna, jadi pertawa-tawan ibahanna.
10 Perban ciga atena aku, ndiri-ndiri ia, alu la alang-alangen ayongku icidurina.
11 Erkiteken nggo kote dingen ipeteruk Dibata aku, emaka rate-ate kalak ndai ngelawan aku.
12 Iteremina nerang aku i lebe nari, emaka terpaksa aku kiam. Genduari sangana ersikap-sikap ia, gelah aku dung ikernepkenna.
13 Dalanku pulah ipeltepkenna, iusahakenna meneken aku, janah ise pe la lit si ngolangisa.
14 Desken banjir si mbelin, irontaskenna bide pertahanenku. Gelah aku getem, iraskenna ndedehi aku.
15 Aku talu i bas kearun; kehaganku nggo masap desken ikabangken angin, janah kesenangenku pe lesap desken perlesap embun.
16 Genduari mate me aku, sabap tep-tep wari itindih kiniseran aku.
17 Adi berngi kerina tulan-tulanku mesui, suina ngetep-ngetep la erngadi-ngadi.
18 Itangkap Dibata kerahung bajungku, seh maka aku nggo icekak uisku.
19 IbenterkenNa aku ku bas kubang, nggo bali ergangku ras sampah.
20 O Dibata, erlebuh aku BaNdu, tapi la IaloiNdu, pertotonku pe la DiateNdu.
21 Kejam kal Kam bangku; IdehkenNdu aku asa GegehNdu.
22 IpelepasNdu aku ikabangken angin, iotar-OtarNdu aku alu angin kaba-kaba.
23 Kuteh maka IbabakenNdu aku ku kematen, ku ingan kerina kalak si nadingken kegeluhen.
24 Ngkai maka la IdadakenNdu TanNdu nampati aku si ndabuh, si terpaksa mindo-mindo ate mekuah?
25 Ma tangis kin gelgel aku ras kalak si kesusahen, janah erkuah ate man kalak si kekurangen?
26 Ngarap kal aku mbarenda dat terang ras keriahen, kepeken si reh eme kegelapen ras kesusahen.
27 Pusuhku getem erkiteken aru ate ras si mesui, kiniseranku ertambah-tambah tep-tep wari.
28 Erdalan-dalan aku alu ceda ate, teman si ngapuli, lanai lit sekalak pe. Tedis aku i tengah jelma si pulung, man bana kupindo penampat janahku ngandung.
29 Ise pe lanai lit jadi temanku ngerana, seakatan serigala ras perik unta ngenca.
30 Kulitku nggo salih jadi mbiring janah melengas, tulan-tulanku nggo kerah erkiteken kulangku melas.
31 Gelgel nari biasa kubegi sora kulcapi ras suling si meriah, genduari nggo salih jadi tangis-tangis ras morah-morah.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA