Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Appakaramulami Ayub a’bicara siagang nasassala’ allo kalassukanna, nakana,
2 "O, Allata’ala, Kitunraimi allo kalassukangku, siagang bangngi appakaramulaku nitianangngang ri ammakku!
3 (3:2)
4 O, Allata’ala, Kipa’jari sassang laloi anjo alloa, pela’mi ri pangngu’ranginTa sa’genna lanynya’; tea tongKi’ lappassangi caya singaraka ansingari.
5 Kipa’jari anjo alloa le’leng pakka’, sassang makkapu’ siagang anremeng; Kikalimbuki siagang saliu’ na rammang, Kitongkoki natanatabaya singara’na alloa.
6 Poro nipattaena lalomi anjo bangngia battu ri bilanna taunga siagang bulanga; teami naniu’rangi pole, tea tommi nibilangngi.
7 Boli’mi kamma bangngia rassi siagang sassang, tena passikarimangngi, tena karannuang.
8 He tu sanroa siagang tuppajappana Lewiatan tujumi anjo alloa siagang passumpa na pattunra;
9 gassingka accayai bintoeng wari-waria, teako pa’biangngi accaya singara’na alloa! Boli’mi kamma sia-sia attayang anjo bangngia ri kabattuanna alloa siagang minasa berua.
10 Nitunraimi bangngi cilakaya ri wattungku nilassukang ri ammakku, siagang nibalang parekang antanggongi pa’risika.
11 Angngapa kutamatea lalang ri battanna ammakku, yareka tappu’ nyawaku ri wattungku nilassukang?
12 Angngapa kuniraka’ siagang niriwa ri ammakku, siagang nipasusu ri susunna?
13 Ebara’ angkana ammoteramma’ anjo wattua, attinroma’ siagang ammari-marima’ sannang kusa’ring,
14 sangkamma sikontu karaenga siagang pamarentaya riolo dudu, ambangung poleangai balla’ lompo jammang riolo dudu.
15 Attinroa’ sangkamma ana’ bura’ne karaeng, amboneai balla’na siagang pera’ na bulaeng.
16 Angngapa natena memang natappu’ nyawaku ri wattungku nilassukang sollanna nyamang siagang sannang tinroku?
17 Anjoreng, lalang ri kuburuka, tau ja’dalaka tenamo na’gau’ ja’dala’, pakaresoa cappu’mi kagassinganna akkullemi ammari-mari poso.
18 Kammayatompa tunitahanga assaumi nasa’ring, bellami ri pangga’gara’na sikamma pajagaya.
19 Anjoreng sangkamma ngasengi taua: tau masahoro’ siagang tau tenaya niassengi arenna. Siagang bebasa’mi kale’bakkanna sikamma ataya.
20 Angngapa natulusu’ nibalang parekang pa’risi’ tallasa’na rupataua? Angngapa nanipassareang singaraka mae ri susaya?
21 Nangaiangngangi ke’nanga kuburuka kala barang-baranga, attayang mate, mingka tena battuna.
22 Nampami akkulle nikasia’ mate’nea punna matemo ke’nanga na nitarawang.
23 Allo ri dallekanna ke’nanga nikalimbuki ri Allata’ala, nitammulili ke’nanga ri Ia battu ri kere-keremae.
24 Sambenna angnganrea, akkunrarenga’, tena ammariku a’rikong.
25 Sikontu kukalussakkanga, iami antuju ngasenga’, sikontu kukamallakkanga, iami ambakkaia’.
26 Tena kasannangngang mae ri nakke, pa’risikka’ tena kale’bakkanna."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA