Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Kedungenna ngerana Jop, isumpahina wari tubuhna. Nina,

² "O Dibata, sumpahilah wari tubuhku; sumpahilah berngi kejadinku.

³ (Ayb 3:2)

⁴ Salihkenlah wari e jadi gelap, o Dibata; ndigan pe ulanai inget wari e, ndigan pe ulanai pelepas terang ersinalsal ku je.

⁵ Bahanlah wari e wari si geltem dingen gelap mesangat; tutupilah e alu embun mekapal, dingen sasapken matawarina.

⁶ Sasapkenlah berngi e; ulanai kira i bas wari-wari bulan tah tahun.

⁷ Bahan berngi e berngi si melungen; berngi i ja la lit keriahen.

⁸ Suruh tukang sihir numpahi wari e, kalak si beluh merentahken nipe nagan.

⁹ Ula pelepas bintang erpagi-pagi ersinalsal; ula bere pengarapen kerna matawari pultak erpagi-pagi,

¹⁰ erkiteken ipelepasna aku tubuh, dingen ijemjemkenna aku kempak kesusahen ras ceda ate.

¹¹ Madin kuakap aku mate i bas bertin nandeku, ntah mate tupung paksa aku tubuh.

¹² Ngkai maka iampu nandeku aku? Ngkai maka ipepinemna aku?

¹³ Adi mate aku tupung si e, tentu senang-senang kuakap genduari,

¹⁴ medem bagi raja-raja ras menteri-menteri, si mulihi majekken istana-istana si adi.

¹⁵ Jenari banci aku medem bagi anak raja-raja si ndemi rumahna alu emas ras pirak;

¹⁶ ntah pe medem bagi anak si mate tupung tubuhna.

¹⁷ I bas kuburen, kalak jahat ngadi erbahan jahat, dingen kalak si latih erdahin, ndatken pengadi-ngadin.

¹⁸ Kalak tabanen pe ngenanami kedamen, lanai isergangi, lanai iperentah alu kata mesergi.

¹⁹ Kalak si kugapa pe lit i je, si terberita ras si la itandai; budak-budak pe kedungenna bebas i je.

²⁰ Ngkai maka manusia ipelepas nggeluh i bas kiniseran? Ngkai maka ibereken terang man kalak si sangana erceda ate?

²¹ Itimaina kematen, tapi lalap la reh, ulin akapna kuburen asangken erta si meherga.

²² La atena malem adi langa ia mate, dingen ikuburken.

²³ Kai gunana manusia nggeluh, adi la terarapkenna wari si pepagi? Adi ikarangken Dibata nge ia?

²⁴ Nakan pe la terpan tapi tangis ngandung aku, ndehereng aku lanai terpengadi.

²⁵ Asa kai si kuaruken ras kubiari nggo tuhu jadi.

²⁶ La lit kedamen i bas aku, la lit kesenangen, kesusahenku lalap la erkedungen."