Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai nini si Job ma mambalosi,
2 “Sadiha dokah on sai pusokannima uhurhu, anjaha ripukonnima ahu bani hata-hata?
3 Domma sapuluh hali ahu isalig-saligi hanima, anjaha seng maila hanima mangarsik-arsik ahu.
4 Porini pe tongon ahu marsalah, ai lang mangonai bangku do salahkai?
5 Atap sihol hanima mangunsagah dompak ahu, anjaha papintoronnima ahu marhitei panreheion?
6 Botoh hanima ma, Naibata do na paunduk ahu, anjaha na mangkonahon siding-Ni bangku.
7 Tonggor ma, hudorakkon pe, ʻPangkilangon!ʼ Tapi seng dong na mambalosi. Mangindo pangurupion ahu, tapi seng dong na mamintori.
8 Domma irungga dalanku, gabe seng tarbontas ahu, anjaha irungkubkon do hagolapan bani dalanku.
9 Domma itanggali humbangku hamuliaonku, anjaha domma ibuat sortalingku humbani ulungku.
10 Domma iripuki ahu bani haganup, magou mando ahu, anjaha domma iurbat pangarapanku songon pangurbat-Ni bani sada hayu.
11 Domma gajag ringis-Ni dompak ahu, anjaha doskon munsuh-Ni do ahu ihira.
12 Marsada uhur do marrohan bala-Ni, roh sidea mandorab ahu, anjaha ihubu sidea do lampolampongku inggot.
13 Seng huidah be saninangku, anjaha seng itandai hasomanku magodang be ahu.
14 Seng itandai sindohorhu be ahu, anjaha domma ihalupahon huan-kuanku ahu.
15 Juakjuakku naboru pe ihira do ahu songon halak, songon halak na legan do ahu iahap sidea.
16 Ia hudilo juakjuakku, seng ibalosi ahu, maningon mangelek-elek mando ahu bani.
17 Oyakon do parinangonku manganggoh hosahku, age saninangku manganggoh baungku.
18 Gari dakdanak pe mandoruni ahu, anggo hehe ahu ipambebeoti sidea do ahu.
19 Magigi do haganup huan-kuanku na sangkan mangidah ahu, anjaha halak na huhaholongi marbalik mangimbang ahu.
20 Tardos bani holiholingku mando hulingkuling pakon sibukku, pitah siratanku mando na so hona.
21 Holong, holong ma uhurnima bangku, nasiam hasomanku, ai domma mangonai tangan ni Jahowa bangku.
22 Mase ipardakdak hanima ahu, songon pardakdak ni Naibata? anjaha seng sobalan ope hanima na mangarsik ahu ai?
23 Ambit isuratkon ma namin hatangkai, anjaha iuhir ibagas pustaha.
24 Anjaha ilatapkon namin bani panurat bosi pakon simbora, bani dolog batu bahen pardingatan sadokah ni dokahni.
25 Tapi torang do hubotoh, manggoluh do Sipagoluh ahu, anjaha Ia parpudi jongjong i atas orbuk.
26 Anjaha dobkonsi malantur hulingkulingkon, anjaha tanggal ahu humbani dagingku, idahonku ma Naibata.
27 Tongon, ahu sandiri ma mangidah-Si gabe hatuahonku, matangku sandiri mangidah-Si, seng halak na legan. Itutung-tutung piah-piahku ibagas diringku halani siholni.
28 Anggo ihatahon hanima, ʻSonaha ma bahenonta mardakdaksi, anjaha padapot bonsir ni pahara on bani?ʼ
29 Marhabiaran ma hanima bani podang, ai mangonai do ringis bani halak siparsalah, ase ibotoh hanima adong do hape Sipanguhum.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA